09-Dec-2024

ତୁଷୁରା (ପଞ୍ଚାନନ ନାଏକ) ଜଣେ ଯୁବକଙ୍କୁ ମାରାତ୍ମକ ଆକ୍ରମଣ ଘଟଣାକୁ ନେଇ ତୁଷୁରା ଥାନା ପରିସରରେ ରବିବାର ପୋଲିସ-ଜନତା ମୁହାଁମୁହଁ ହେବା ଫଳରେ ୫ଜଣ ଆହତ ହୋଇଥିବା ଜଣାପଡିଛି। ଘଟଣା ସ୍ଥଳରେ ବଲାଙ୍ଗୀର ଏସପି ରିଷିକେଶ ଖିଲାରି ପହଞ୍ଚି ଘଟଣା ସ୍ଥଳ ଅନୁଧ୍ୟାନ କରିଥିବା ବେଳେ ଏସଡିପିଓ ପ୍ରଦୀପ ସାହୁ ଲୋକଙ୍କୁ ବୁଝାସୁଝା କରି ଅଭିଯୁକ୍ତଙ୍କୁ ଗିରଫ କରିବା ପ୍ରତିଶୃତି ଦେବା ପରେ ଲୋକେ ଶାନ୍ତ ହୋଇ ଥିଲେ।ପ୍ରାୟ ତିନି ତଳେ ଗୁଦାମପଡା ସ୍ଥିତ ଏକ ଦୋକାନକୁ ପତିତପାବନ ପଡାର କିଛି ଯୁବକ ଯାଇ ଦୁର୍ବ୍ୟବହାର କରିଥିବା ନେଇ କେଶବ ସରଭଙ୍ଗିଆ ତୁଷୁରା ଥାନାରେ ଅଭିଯୋଗ କରିଥିଲେ। ଏହାକୁ କେନ୍ଦ୍ର ରବିବାର ପତିତପାବନ ପଡାର କିଛି ଯୁବକ ତୁଷୁରା ବସଷ୍ଟାଣ୍ଡରେ ଗୁଦାମପଡାର ଯୁବରାଜ ହରପାଳଙ୍କୁ ଦେଖି ସଂଘବଦ୍ଧ ଆକ୍ରମଣ କରିଥିଲେ। ଯୁବକ ଦୌଉଡି ଦୌଉଡି ପଳାଇବାକୁ ଚେଷ୍ଠା କରିଥିଲେ ମଧ୍ଯ ରାମ ମନ୍ଦିର ପାଖରେ ମାଡ ମାରିଥିଲେ। ଫଳରେ ହରପାଳ ଗୁରୁତର ଆହତ ହୋଇ ଥିଲେ। ତାଙ୍କୁ ପ୍ରଥମେ ତୁଷୁରା ପ୍ରାଥମିକ ଚିକିତ୍ସାଳୟକୁ ଅଣାଯାଇଥିଲା । ତାଙ୍କ ଅବସ୍ଥା ଆହୁରି ଗୁରୁତର ହେବାରୁ ତାଙ୍କୁ ବଲାଙ୍ଗୀର ଭୀମଭୋଇ ମେଡିକାଲକୁ ସ୍ଥାନାନ୍ତରିତ କରାଯାଇଥିଲା। ଅନ୍ୟ ପଟେ ଗୋଦାମ ପଡାର ମହିଳାପୁରୁଷ ତୁଷୁରା ଥାନା ପରିସରରେ ରୁଣ୍ଡ ହୋଇ ପ୍ରତିବାଦ କରିବା ସହ ଥାନା ପରିସରରୁ ପ୍ରାୟ ପାଞ୍ଚ ଶହ ମିଟର ଦୂରରେ ଏହି ଘଟଣା ଘଟିଥିଲେ ମଧ୍ଯ ପୋଲିସ ନିରବ ସାଜିଥିବା ନେଇ ଲୋକେ ଅଭିଯୋଗ କରିଥିଲେ। ଏହି ପ୍ରତିବାଦକୁ ଦେଖି ପୋଲିସ ପତିତପାବନ ପଡାର ଜଣେ ଯୁବକକୁ ଜିପରେ ଥାନ ପରିସରକୁ ଆଣୁଥିବା ବେଳେ ଉପସ୍ଥିତ ଗୋଦାମ ପଡାର ମହିଳାପୁରୁଷ ଉକ୍ତ ଯୁବକକୁ ପୋଲିସରୁ ଛଡାଇବାକୁ ଚେଷ୍ଟା କରିଥିଲେ। ଏହି ସମୟରେ ପୋଲିସ-ଜନତା ମୁହାଁମୁହିଁ ପରିସ୍ଥିତି ସୃଷ୍ଟି ହୋଇ ଥିଲା। ପୋଲିସ ଭିଡକୁ ନିୟନ୍ତ୍ରଣ କରିବାକୁ ଯାଇ ଲାଠିମାଡ କରିଥିବା ବେଳେ ଗୋଦାମ ପଡାର ଆୟୁସ ସରଭଙ୍ଗିଆ, ହିମାଶିନୀ ହରପାଲ, ମନିଷ ହରପାଲ, ୟୁନିସ ସରଭଙ୍ଗିଆ, ମନୋଜ ହରପାଲ ଆହତ ହୋଇଥିଲେ। ପରେ ଆଉ ଜଣେ ଯୁବକଙ୍କୁ ଆଣି ପୋଲିସ ପଚରା ଉଚରା ଚଲାଇ ଥିବା ବେଳେ ଉକ୍ତ ଦୁଇ ପଡାରେ ପୋଲିସ ପକ୍ଷରୁ ପ୍ଳାକମାର୍ଚ୍ଚ କରିଯାଇଛି । କିଛି ଅଘଟଣକୁ ଏଡାଇ ପାଇଁ ଥାନା ପରିସରରେ ଏକ ପ୍ଲାଟୁନ ପୋଲିସ ଫୋର୍ସ ମୁତୟନ କରାଯାଇଛି।