13-Oct-2024

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ) ବଲାଙ୍ଗୀର ବନଖଣ୍ଡର ବଲାଙ୍ଗୀର ସଦର ରେଞ୍ଜ୍ ରେ ଗତକାଲି ପୁଣି ଏକ ଦନ୍ତାହାତୀର ମୃତଦେହ ଠାବ କରାଯାଇଛି। ସୁଲିଆ ଓ ଭୀମଡୁଙ୍ଗୁରି ସଂରକ୍ଷିତ ଜଙ୍ଗଲରେ ପୁରୁଣାପାଣି ଗ୍ରାମ ନିକଟସ୍ଥ ସୁଲିଆ ଘାଟୀରେ ବନବିଭାଗ ଠାବ କରିଥିବା ଏହି ହାତୀଟିର ମୃତ୍ୟୁ ଦୁଇଦିନ ତଳେ ଘଟିଥିବା ଅନୁମାନ କରାଯାଉଛି । ଏହି ମୃତ ଅଣ୍ଡିରା ଦନ୍ତା ହାତୀଟିର ବୟସ ୪୫ ରୁ ୫୦ ବର୍ଷ ମଧ୍ୟରେ ହୋଇଥିବା ବନବିଭାଗର ଅନୁମାନରୁ ପ୍ରକାଶ । ତେଣୁ ହାତୀଟିର ମୃତ୍ୟୁ ବୟସାଧିକ୍ୟ ହେତୁ ସ୍ବାଭାବିକ୍ ବୋଲି ଏହି ସୂତ୍ରରୁ ପ୍ରକାଶ । ତେବେ ଶବବ୍ୟବଚ୍ଛେଦ ପରେ ପ୍ରକୃତ କାରଣ ଜଣାପଡିପାରିବ । 

ଉଲ୍ଲେଖନୀୟ ଯେ, ବନ୍ୟପ୍ରାଣୀ ସପ୍ତାହରେ ଗତ ୮ ତାରିଖରେ ଏହି ରେଞ୍ଜ୍ ର ମଠଖାଇ ସଂରକ୍ଷିତ ଜଙ୍ଗଲର ଅସୁରଡୁଙ୍ଗୁରି ଗ୍ରାମ ନିକଟରେ ମିଳିଥିବା ଅଣ୍ଡିରା ଦନ୍ତାହାତୀଟିର ଗଳିତ ମୃତଦେହକୁ ଦେଖି ପ୍ରଥମେ ବିଭିଗ ପକ୍ଷରୁ ତାହାକୁ ମଧ୍ୟ ସ୍ବାଭାବିକ ମୃତ୍ୟୁ ବା ସଂକ୍ରମଣରୁ ମୃତ୍ୟୁ ବୋଲି କହିଥିଲା ।  ଗଣମାଧ୍ୟମରେ ମଧ୍ୟ ଏହାକୁ ହାତୀଦାନ୍ତ ତସ୍କରୀର ଭ୍ରମରେ 'ଦାନ୍ତ ପାଇଁ ଦନ୍ତା ହତ୍ୟା' ବୋଲି ରୋଚକ ଶୈଳୀର ଖବର ପ୍ରକାଶ ପାଇବା ପରେ ତଦନ୍ତରେ ଗ୍ରାମର ୫ ଜଣଙ୍କୁ ଗିରଫ କରାଯାଇ ଗତକାଲି କୋର୍ଟ ଚାଲାଣ କରାଯାଇଛି। ଗିରଫ ଅଭିଯୁକ୍ତ ମାନେ ହେଲେ ସେଇ ଅସୁରଡୁଙ୍ଗୁରୀ ଗ୍ରାମର ଅନି ମାଝୀ (୪୫), ପଦୁଁ ମାଝୀ (୨୦), ତରଣୀ ମାଝୀ (୨୫ ), ଲବ ଭୁଏ (୨୫) ଓ ସରୋଜ ବରିହା ( ୨୩ ) । ସେମାନେ ଜଙ୍ଗଲୀ ବାର୍ହା ମାରିବାକୁ କିଛିଦୂରରୁ ବିଦ୍ୟୁତ୍ ସବ୍ ଷ୍ଟେସନରୁ ଚୋରା ତାର ଲମ୍ବାଇଥିବା ଓ ସେଥିରେ ହାତୀଟି ଲାଗିଯାଇ ମୃତ୍ୟୁବରଣ କରିଥିବା ସ୍ବୀକାର କରିଥିବା ବନବିଭାଗ ସୂତ୍ରରୁ ପ୍ରକାଶ । ତେବେ ମୃତହାତୀଟିର ଦୁଇଟିଦାନ୍ତରୁ ଗୋଟିଏ ଦାନ୍ତ କେହି କାଟିନେଇଥିବା ଓ ଅଦ୍ୟାବଧି ଏହା ଧରାଯାଇ ପାରିନାହିଁ । 

ଏଠାରେ ଗୁରୁତର ବିଷୟ ଏହି ଯେ , ହାତୀଙ୍କର ଗତିବିଧି ତଦାରଖ କରିବାକୁ ସରକାରୀ ଅର୍ଥରେ ଏଲିଫ୍ୟାଣ୍ଟ୍ ଟ୍ରାକର ମାନଙ୍କୁ ନିୟୋଜିତ କରାଯାଇଛି । ବିଡମ୍ବନାର ବିଷୟ ଯେ ଏମାନଙ୍କୁ ବିଭାଗୀୟ ଅଧିକାରୀଙ୍କ ଘରୋଇଚାକର ଭାବରେ ବେଠି ଖଟିବାକୁ ପଡୁଛି  l ହାତୀଟ୍ରାକର , ପାରାଷ୍ଟାଫ୍ ଓ ଅସ୍ଥାୟୀ କର୍ମଚାରୀଙ୍କୁ ବରିଷ୍ଠ ବିଭାଗୀୟ ଅଧିକାରୀଙ୍କ ଅବୈଧ ଘରୋଇ ସେବାର ଅଭିଯୋଗ ବହୁଦିନରୁ ହୋଇ ଆସୁଥିବା ସତ୍ତ୍ୱେ , ସରକାର ଏହାକୁ କର୍ଣ୍ଣପାତ ସୁଦ୍ଧା ନ କରିବା କ୍ଷୋଭର ବିଷୟ l ଏଣୁ ଜଙ୍ଗଲରେ ହାତୀଙ୍କର ଗତିବିଧି ଦେଖିବାକୁ କେହିନାହିଁ । ଓଲଟା ଉପରଠାଉରିଆ ଭାବରେ ରିପୋର୍ଟଟିଏ କରିଦେଇ ତଳିଆ କର୍ମଚାରୀମାନେ ନିଶ୍ଚିନ୍ତ । ଉପରୋକ୍ତ ମାତ୍ର ୪ ଦିନ ଅନ୍ତରରେ ଦୁଇଟି ହାତୀଙ୍କର ମୃତ୍ୟୁ ପୂର୍ବରୁ ଏଇ ହାତୀମାନେ ସୁସ୍ଥ ଥାଇ ବୁଲୁଥିବା ବନରକ୍ଷୀମାନେ ରିପୋର୍ଟ କରିଥିବା ବେଳକୁ ସେହି ଦୁଇଟି ପ୍ରାଣୀଙ୍କର ମୃତ୍ୟୁ ଘଟିସାରି ମୃତଦେହ ପଚି ଯାଇଥିଲା।

ଆହୁରି ମଧ୍ୟ ବିଦ୍ୟୁତ୍ ବିଭାଗର ଏ ଦିଗରେ ଚରମ ଦାୟିତ୍ୱହୀନତା ଲକ୍ଷ୍ୟ କରାଯାଇଛି । ପ୍ରଥମ ଅସୁରଡୁଙ୍ଗୁରିର ହାତୀମୃତ୍ୟୁ ଘଟଣାରେ ବିଦ୍ୟୁତ୍ ବିଭାଗର ଅଧିକାରୀମାନେ ଘଟଣାସ୍ଥଳକୁ ଯାଇ ତାଙ୍କର କିଛି ଦୋଷ ନଥିବା ସଫେଇ ଦେଇ ଫେରି ଆଆସିଥିଲେ l ସର୍ବୋପରି ବଲାଙ୍ଗୀର ବନଖଣ୍ଡ ସମେତ ଅନଗୁଳ ତଥା ସାରାରାଜ୍ୟରେ ଚୋରା ବିଦ୍ୟୁତ୍ ତାର ଫାଶରେ ବାର୍ହା ଓ ବନ୍ୟଜନ୍ତୁ ଶିକାର ବୃଦ୍ଧି ପାଇଥିବା ଚିନ୍ତାଜନକ କଥା l