11-Oct-2024

ବଲାଙ୍ଗୀର (ପ୍ରେରଣା ଖବର): ପଶ୍ଚିମଓଡିଶାର ପ୍ରସିଦ୍ଧ ଦେବୀ ପୀଠ ମଧ୍ୟରୁ ବଲାଙ୍ଗିର ସଦର ବ୍ଲକ ଅନ୍ତର୍ଗତ କିରାବାହାଲ  ଓ ରାଣୀପାଲିର ମାହେଶ୍ୱରୀ ଶକ୍ତିପୀଠ ହେଉଛି ବହୁ ପ୍ରାଚୀନ। ଏଠି ମା ଦୁର୍ଗା ମାହେଶ୍ୱରୀ ଦେବୀ ରୂପରେ ପୂଜା ପାଆନ୍ତି।ଡୁମାଲ ସମ୍ପ୍ରଦାୟର ଇଷ୍ଟଦେବୀ ହେଉଛନ୍ତି ମା ମାହେଶ୍ୱରୀ । ପୁଅଜୁଇନ୍ତିଆ ଠାରୁ ପୂଜା ଆରମ୍ଭ ହୋଇ ଦଶମୀ ଦିନ ପର୍ଯ୍ୟନ୍ତ ଏଠି ପୂଜା ହୋଇଥାଏ। ଏହି କ୍ରମରେ ଆଜି ହେଉଛି ମହା ନବମୀ।ପ୍ରତ୍ୟେକ ବର୍ଷ ଭଳି ଚଳିତ ବର୍ଷମଧ୍ୟ ପୂର୍ବତନ ଆଇନ ମନ୍ତ୍ରୀ ନରସିଂହ ମିଶ୍ର ଆଜି ରାଣୀପାଲି ଓ କିରାବାହାଲ ଗସ୍ତ କରି ଉଭୟ ଗ୍ରାମକୁ ଯାଇ 

ଦେବୀ ମା ଙ୍କୁ ଦର୍ଶନ କରି ମା ଙ୍କ ଠାରୁ ଆଶୀର୍ବାଦ ତଥା ଅଂଚଳବାସୀଙ୍କ ସୁଖସମୃଦ୍ଧି କାମନା କରିଥିଲେ l ଦଳମତ ନିର୍ବିଶେଷରେ ଅଂଚଳ ସାମାଜିକ ଓ ଅର୍ଥନୈତିକ ବିକାଶ ପାଇଁ ସମସ୍ତେ ଉଦ୍ୟମ ଜାରି ରଖିବା ଆବଶ୍ୟକ ବୋଲି କହିବା ସହ  ସଂସ୍କୃତି, ପରମ୍ପରା ଓ ଐତିହ ସମ୍ପନ୍ନ ଏହି ଯାତ୍ରା ଆୟୋଜନକୁ ଶ୍ରୀ ମିଶ୍ର ଭୁରିଭୁରି ପ୍ରଶଂସା କରିଥିଲେ l

ସୁକତେଲ ନଦୀ ଉପରେ ନିର୍ମିତ ଭୂତଳ ଜଳ ପ୍ରକଳ୍ପ ଦ୍ବାରା ଏହି ଅଂଚଳର ଅର୍ଥନୈତିକ ବିକାଶ ହେବା ସଙ୍ଗେସଙ୍ଗେ ଭୂତଳ ଜଳସ୍ତର ଆଗାମୀ ଦିନରେ ବୃଦ୍ଧି ପାଇବ ବୋଲି ଶ୍ରୀଯୁକ୍ତ ମିଶ୍ର ନିଜ ବକ୍ତବ୍ୟରେ କହିଥିଲେ l ଏହି ଗସ୍ତ ଅବସରରେ ଶ୍ରୀଯୁକ୍ତ ମିଶ୍ରଙ୍କ ସହ ଟଂକଧର ଗଡତ୍ୟା, ଶୁଭ୍ରାଂଶୁ ପଣ୍ଡା, ଲମ୍ବୋଦର ମହାକୁର, ଗୋପୀ ପଟେଲ, ଧନୁ ସିଂ ପ୍ରମୁଖ ଉପସ୍ଥିତ ଥିଲେ l