07-Oct-2024

(ଦେବବ୍ରତ ଦାସ)
ବୌଦ୍ଧ ନିର୍ବାଚନ ମଣ୍ଡଳୀରେ ଆରମ୍ଭ ହେଲା ବିଜେଡ଼ି ଜନସମ୍ପର୍କ ପଦଯାତ୍ରା । ହରଭଙ୍ଗା ବ୍ଲକ ବିଧାୟକ ସରୋଜ ପ୍ରଧାନଙ୍କ ପଂଚାୟତ ରୁ ଆରମ୍ଭ ହୋଇଛି ବିଜୁଜନତା ଦଳର ଜନସମ୍ପର୍କ ପଦଯାତ୍ରା । ପୂର୍ବତନ ମନ୍ତ୍ରୀ ତଥା ବରିଷ୍ଠ ବିଜେଡ଼ି ନେତା ପ୍ରଦୀପ କୁମାର ଅମାତଙ୍କ ନେତୃତ୍ୱରେ ତିଳେଶ୍ୱର ପଂଚାୟତରୁ ଜନସମ୍ପର୍କ ପଦଯାତ୍ରାରେ ଗ୍ରାମପଞ୍ଚାୟତ ଠାରେ ଶହ ଶହ ବିଜେଡି କର୍ମୀ ଏକାଠି ହୋଇ ବଜାର ଦେଇ ଏକ ପରିକ୍ରମା କରିଥିବା ବେଳେ ପୁରୁଣାକଟକ ପଂଚାୟତର ରଥସାହି ବଜାର ପରିକ୍ରମା କରି ଭୈରବୀ ମନ୍ଦିର ପହଂଚିଥିଲା । ସେହିପରି ହରଭଙ୍ଗା ବ୍ଲକ ସଦର ମହକୁମା ଚାରିଛକ ତହସିଲ ଠାରୁ ପଦଯାତ୍ରା ଆରମ୍ଭ କରି ବ୍ଲକ ସମ୍ମୁଖରେ ଏକ ସାଧାରଣ ସଭା ଆୟୋଜିତ ହୋଇଥିଲା । ଏଥିରେ ବରିଷ୍ଠ ବିଜେଡ଼ି ନେତା ଦେବୀ ପ୍ରସାଦ ମିଶ୍ର ଯୋଗ ଦେଇ ବର୍ଷିଥିଲେ ରାଜ୍ୟ ସରକାରଙ୍କ ଉପରେ । ରାଜ୍ୟ ସରକାର ନାରୀ ମାନଙ୍କୁ ମିଛ ପ୍ରତିଶ୍ରୁତି ଦେଇ ନିର୍ବାଚନ ବୈତରଣୀ ପାର ହେବା ସହ କ୍ଷମତା ଆସିଲା ପରେ ମହିଳା ମାନଙ୍କୁ ସୁଭଦ୍ରା ଯୋଜନା ନାମରେ ମିଥ୍ୟ ୫୦ ହଜାର ଟଙ୍କାର ଡ଼ମି ଚେକ ଦେଇ ଯୋଜନାକୁ ଅନ୍ୟ ରୂପ ଦେବା ସହିତ ୫୦ ହାଜର ବଦଳରେ ୫ ହଜାର ଦେବାକୁ ନିନ୍ଦା କରିଛନ୍ତି । ସେହିପରି ୩ ହଜାର ଟଙ୍କା ଭତ୍ତା ନିର୍ବାଚନୀ ଇସ୍ତାହାର ଦେଇ ହଜାରେ ଟଙ୍କାରେ ସୀମିତ ରଖିବା ସରକାରଙ୍କ ଲୋକଙ୍କୁ ମିଛ ପ୍ରତିଶ୍ରୁତିର ଗନ୍ତାଘର ବୋଲି କହିଛନ୍ତି । ସେହିପରି ପୂର୍ବତନ ମନ୍ତ୍ରୀ ପ୍ରଦୀପ ଅମାତ ସ୍ୱାସ୍ଥ୍ୟ ସେବାକୁ ନେଇ ଜିଲ୍ଲା ସ୍ୱାସ୍ଥ୍ୟ ବିଭାଗ ଓ ରାଜ୍ୟ ସରକାର ତଥା  ସ୍ଥାନୀୟ ବିଧାୟକଙ୍କ ଉପରେ ବର୍ଷିଛନ୍ତି ।