06-Oct-2024

ନୂଆଦିଲ୍ଲୀ/ବରଗଡ଼:(ନିରଞ୍ଜନ ତ୍ରିପାଠୀ)- ଗତ ଶନିବାର ଦିନ ନୃତ୍ୟାଞ୍ଜଳୀ ନୃତ୍ୟ ଅନୁଷ୍ଠାନ, ନୂଆଦିଲ୍ଲୀ ପକ୍ଷରୁ ଲଜପଥ ଭବନ  ଓଡିଟୋରିୟମ ଠାରେ  ନୃତ୍ୟାଙ୍ଗନା ଓଡ଼ିଶୀ ନୃତ୍ୟ ଉତ୍ସବ ମହାସମାରୋହରେ ଅନୁଷ୍ଠିତ ହୋଇଯାଇଛି। ଅନୁଷ୍ଠିତ ସାଂସ୍କୃତିକ ସଂଧ୍ୟାରେ ନୃତ୍ୟାଞ୍ଜଳୀ, ନୂଆଦିଲ୍ଲୀ ଅନୁଷ୍ଠାନର ନୃତ୍ୟ ଶିଳ୍ପୀ ମାନଙ୍କ ଦ୍ବାରା ମୁଖାରୀ ପଲ୍ଲବୀ, ମନ୍ଦିରା ନୃତ୍ୟ ଅନୁଷ୍ଠାନ ଭଦ୍ରକ, ଓଡ଼ିଶା ର ଗୁରୁ ଶ୍ରୀମତୀ ଶ୍ୱେତପଦ୍ମା ଦାସ ବେହେରା ଓ ତାଙ୍କ ଅନୁଷ୍ଠାନର ନୃତ୍ୟ ଶିଳ୍ପୀ ମାନଙ୍କ ଦ୍ବାରା ଦେବୀ ବନ୍ଦନା ଓ ସଜକୁଞ୍ଜ ନୟନା ଦଳ ନୃତ୍ୟ ପରିବେଷଣ କରିଥିଲେ। ନାଟ ସୁତ୍ର ଅନୁଷ୍ଠାନ କଟକ, ଓଡ଼ିଶା ର ଗୁରୁ ଶ୍ରୀମତୀ ସୁଜ୍ଞାନୀ ମହାପାତ୍ରଙ୍କ ଦ୍ୱାରା ଶିବ ସ୍ତୋତ୍ରମ୍ ଅଭିନୟ ଏବଂ ତାଙ୍କ ଅନୁଷ୍ଠାନର ନୃତ୍ୟ ଶିଳ୍ପୀ ମାନଙ୍କ ଦ୍ବାରା ମେଘ୍ ପଲ୍ଲବୀ,ଗୁରୁ ରୁବି ହାତୀ ଭୁବନେଶ୍ଵର ଓଡ଼ିଶାରୁ ଆସି ଅଷ୍ଟପଦୀ ହରିରିହ ଅଭିନୟ ଓ  ସିଞ୍ଜନୀ ଚଟ୍ଟୋପାଧ୍ୟାୟ ୱେଷ୍ଟ ବେଙ୍ଗଲ ରୁ ଆସି ଆହେ ନୀଳ ଶଇଳ ପରିବେଷଣ କରି ଭବ୍ୟ ମଞ୍ଚକୁ ମୁଖରିତ କରିଥିଲେ।

ଉକ୍ତ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଶ୍ରୀ ଅମରେନ୍ଦ୍ର ଖଟୁଆ(ଆଇ.ଏଫ.ଏସ), ସମ୍ମାନୀତ ଅତିଥି ଭାବେ ଡ: ସଞ୍ଜିବ ପଟଯୋଶୀ(ଆଇ.ପି.ଏସ), ପ୍ରସିଦ୍ଧ ଓଡିଶୀ ନୃତ୍ୟଶିଳ୍ପୀ ଓ ଗୁରୁ ଶ୍ରୀମତୀ ବାନୀ ମାଧବ, ଆମ୍ବେଦକର ଫାଉଣ୍ଡେସନର ପ୍ରତିଷ୍ଠାତା ଡ: ଦେବେନ୍ଦ୍ର ମାଝୀ ଓ ଶ୍ରୀଯୁକ୍ତ ରାଜେଶ ଶର୍ମା(ସି.ଏ) ଯୋଗଦାନ କରି ନୃତ୍ୟ ଶିଳ୍ପୀ ମାନଙ୍କୁ ଉତ୍ସାହିତ କରିବା ସହ ଉଦବୋଧନ ଦେଇଥିଲେ। ଶେଷରେ ଉପସ୍ଥିତ ସମସ୍ତ ନୃତ୍ୟ ଶିଳ୍ପୀ ମାନଙ୍କୁ ନୃତ୍ୟାଙ୍ଗନା ଆୱାର୍ଡ ସହ ମାନପତ୍ର ଦେଇ ଅତିଥି ମାନ ଦ୍ୱାରା ସମ୍ମାନୀତ କରାଯାଇଥିଲା। ଏହି ନୃତ୍ୟାଙ୍ଗନା ଓଡ଼ିଶୀ ନୃତ୍ୟ ଉତ୍ସବକୁ ନୃତ୍ୟାଞ୍ଜଳୀ ଅନୁଷ୍ଠାନ ନୂଆଦିଲ୍ଲୀର ପ୍ରତିଷ୍ଠାତା ତଥା ଓଡିଶୀ ନୃତ୍ୟର ପ୍ରଚାର ଓ ପ୍ରସାରର ଗୁରୁ ଶ୍ରୀମାନ ସମାରୁ ମେହେର ପରିଚାଳନା କରିଥିବାବେଳେ ଶ୍ରୀମତୀ ସୁଜାତା ମେହେର ସମ୍ପୂର୍ଣ୍ଣ ସହଯୋଗ କରିଥିଲେ।