04-Oct-2024

ଫୁଲବାଣୀ(ମଳୟ ମିଶ୍ରଙ୍କ ରିପୋର୍ଟ):ଗତମାସ ୨୬ ତାରିଖରେ ରାଜଧାନୀରେ ମୁଖ୍ୟମନ୍ତ୍ରୀ ଥାନାରେ ପୁଲିସର ବ୍ୟବହାର ଓ ଲୋକଙ୍କୁ ଉଚିତ୍ ସେବା ଯୋଗାଇଦେବାକୁ ଉଦ୍ ବୋଧନ ଦେଉଥିବା ସମୟରେ ହିଁ ମାଓପ୍ରବଣ କନ୍ଧମାଳ ଜିଲ୍ଲାର ଗୋଛାପଡା ଥାନା ପୁଲିସ୍ ବିରୁଦ୍ଧରେ ଆସିଛି ଯାଞ୍ଚ ଆଳରେ ଜଣେ ବାଇକ୍ ଆରୋହୀ ଯୁବକଙ୍କୁ ଧରି ପିଟି ପିଟି ଗାଡି ଚପାଇଦେଇ ମାରିଦେଇଥିବା ଅଭିଯୋଗ  ! ଉକ୍ତ ଥାନାରେ ମୃତଯୁବକଙ୍କ ପତ୍ନୀଙ୍କ ହତ୍ୟା ଅଭିଯୋଗ ଏତଲାକ୍ରମେ ଏକ ମାମଲା ଋଜୁ କରାଯାଇ ତଦନ୍ତ ଚାଲିଛି । ଏଥିରେ ଉକ୍ତଦିନ ଯାଞ୍ଚଦଳରେ ଯାଇଥିବା ୫ ଜଣ ପୁଲିସ୍ କର୍ମଚାରୀଙ୍କୁ ନିଲମ୍ବିତ ଓ କାର୍ଯ୍ୟରୁ ଅନ୍ତର କରାଯାଇଛି । ଶବବ୍ୟବଚ୍ଛେଦ ରିପୋର୍ଟ ଅଦ୍ୟାବଧି ଆସି ନଥିବା ପୁଲିସ୍ କହୁଛି ।  ଥାନାଠାରୁ ପ୍ରାୟ ୩୦ କିମି ଦୂର ଗୋଛାପଡା- କଣ୍ଟାମାଳ ରାସ୍ତାର ବାଲନ୍ଦାପଡା ଜଙ୍ଗଲର ଡାଙ୍ଗଣାମୁ ପାହାଡୀଘାଟିରେ ଗଞ୍ଜେଇ ଚୋରାଚାଲାଣ ସନ୍ଦେହରେ ବୌଦ୍ଧ ଜିଲ୍ଲା କଣ୍ଟାମାଳ ଥାନାନ୍ତର୍ଗତ ଲମ୍ବସରୀ ପଞ୍ଚାୟତ  ବେହେରାପଡା ଗ୍ରାମର ଜ୍ୟେଷ୍ଠ ବଣ୍ଡକୀ ( ୪୪ ) ଓ ତାଙ୍କ ଗ୍ରାମରେ ରହୁଥିବା ପାଖ ଗାଁ' ମାର୍ଡୋଲ୍ ଗ୍ରାମର ଦାଶରଥୀ ଦିଗାଲ୍ ଉକ୍ତଦିନ ଦିନ ପ୍ରାୟ ୧୨ ଟା ସମୟରେ ବାଇକ୍ ରେ ଆସୁଥିବାବେଳେ ଗୋଛାପଡା ଥାନାର ତଥାକଥିତ ହେଲ୍ ମେଟ୍ ଯାଞ୍ଚ କରୁଥିବା ବୋଲେରୋ ଗାଡିରେ ଥିବା ପୁଲିସ୍ ହାବୁଡରେ ପଡିଥିଲେ । ପୁଲିସମାନେ ଜ୍ୟେଷ୍ଠଙ୍କୁ ଧରି ପକାଇଥିବା ବେଳେ ଦାଶରଥି ଫେରାର୍ ହୋଇ ଆସିଥିଲା ।  ବାଇକ୍ ରେ ଏକ ବ୍ୟାଗ୍ ରେ ୫ କିଗ୍ରା ଗଞ୍ଜେଇ ଥିବା ଦାଶରଥି କହିଛି ।  ଜ୍ୟେଷ୍ଠର ପତ୍ନୀ ଫୋନ୍ କରିବାରୁ ଜ୍ୟେଷ୍ଠ ' ମୋତେ ପୁଲିସ୍ ଧରିଛି ' ବୋଲି କହିଥିବା ପ୍ରକାଶ । ତେବେ ସନ୍ଧ୍ୟାସୁଦ୍ଧା ଘରକୁ ନ ଫେରିବାରୁ ଘରଲୋକେ ସ୍ଥାନୀୟ କଣ୍ଟାମାଳ , ଘଣ୍ଟାପଡା ଓ ଗୋଛାପଡା ଥାନାକୁ ଫୋନ୍ ରେ ଯୋଗାଯୋଗ କରିବାରୁ ଗୋଛାପଡା ପୁଲିସ୍ ' ତୁମ ବାଇକ୍ ଟି ଥାନାରେ ଅଛି । ୩୦ ହଜାର ଟଙ୍କା ସହ କାଗଜପତ୍ର ଆଣି ନେଇଯିବାକୁ କହିଥିବା ବେଳେ ନିଖୋଜ୍ ଜ୍ୟେଷ୍ଠ ସମ୍ପର୍କରେ କିଛି ନକହି କଥା ବୁଲାଇଥିଲେ । ତେଣୁ ଘରଲୋକେ ଆସି ଘଟଣାସ୍ଥଳରେ ଖୋଜାଖୋଜି କରିବାରୁ ଦୁଇଦିନପରେ ଘାଟୀତଳର ପ୍ରାୟ ୩୦ ଫୁଟ୍ ତଳେ ଜ୍ୟେଷ୍ଠର ପଚିଯାଇ ଉପରମୁହାଁ ହୋଇ ପଡିଥିବା ଦେଖି ପୁଲିସକୁ ଖବର ଦେଇଥିଲେ ଓ ଗୋଛାପଡା ପୁଲିସ୍ ଫୁଲବାଣୀରୁ ଡଗ୍ ସ୍କ୍ବାର୍ଡ ଓ ସାଇଣ୍ଟିଫିକ୍ ସ୍କ୍ବାର୍ଡ ଆଦି ମଗାଇ ମୃତଦେହ ଉଦ୍ଧାର କରିଥିଲେ । ଏଥିରେ ସନ୍ଦେହ ହେବାରୁ ମୃତ ଜ୍ୟେଷ୍ଠର ପତ୍ନୀ ସୁମନ୍ତୀ ବଣ୍ଡକୀ ଗୋଛାପଡା ଥାନାରେ ଏକ ହତ୍ୟାକାଣ୍ଡ ବୋଲି ଏତଲା ଦେବା ସହିତ ଉତ୍ତ୍ୟକ୍ତ ଲୋକେ ଥାନା ଘେରାଉ କରିଥିଲେ । ଫୁଲବାଣୀରୁ ତତ୍କାଳୀନ ଏସ୍ ପି ଶୁଭେନ୍ଦୁ କୁମାର ପାତ୍ର , ଅତିରିକ୍ତ ଏସ୍ ପି ବଳଭଦ୍ର ଦୀପ , ଏସଡିପିଓ ସୁପ୍ରସନ୍ନ ମଲ୍ଲିକ ପ୍ରମୁଖ ପହଞ୍ଚି ଉଚିତ୍ ତଦନ୍ତର ପ୍ରତିଶ୍ରୁତି ଦେଇଥିଲେ । ରେଡ୍ କ୍ରସ୍ ପକ୍ଷରୁ ୨୦ ହଜାର ଟଙ୍କା ପ୍ରଦାନ କରାଯାଇଥିଲା । ଏହାର ତଦନ୍ତ ଦାୟିତ୍ୱ ଜଣେ ଡିଏସପି କମଳାକାନ୍ତ ପଣ୍ଡାଙ୍କୁ ଦିଆଯାଇଛି । ପ୍ରାଥମିକ ପର୍ଯ୍ୟାୟରେ ସେଦିନ  ଯାଞ୍ଚଦଳରେ ଯାଇଥିବା ଜଣେ ସବ୍ଇନିସପେକ୍ଟର , ଜଣେ ଟ୍ରେନି ସବ୍ ଇନିସପେକ୍ଟର , ଜଣେ ହାବିଲଦାର ଓ ଡ୍ରାଇଭର ସମେତ ଦୁଇଜଣ ହୋମ୍ ଗାର୍ଡ ଏପରି ୫ ଜଣଙ୍କୁ ନିଲମ୍ବିତ ଓ କାର୍ଯ୍ୟରୁ ଅନ୍ତର କରାଯାଇଛି ।  ତେବେ ବାଇକ୍ ରେ ଥିବା ଗଞ୍ଜେଇର ପତ୍ତା ମିଳୁନାହିଁ  !

ଏହା ପୁଲିସ୍ ଦ୍ବାରା ଏକ ହତ୍ୟାକାଣ୍ଡ ନା ପୁଲିସ୍ ହାତରୁ ଛଡାଇ ହେଇ ପଳାଉଥିବା ବେଳେ ପଡିଯାଇ ଉକ୍ତ ଯୁବକର ମୃତ୍ୟୁ , ଏହା ସ୍ପଷ୍ଟ ହୋଇ ପାରିନାହିଁ । ପୁଲିସ୍ ଅନୁଯାୟୀ , ମାରିଥିଲେ , ବାଇକ୍ କୁ କାହିଁକି ଥାନାକୁ ଆଣିଥା'ନ୍ତେ  ? ' କୁହାଯାଉଥିନା ବେଳେ , ପରିବାର ଓ ମୃତକର ପତ୍ନୀଙ୍କ ପକ୍ଷରୁ ' କେମିତି ପଡିଯାଇ ମରିଯିବ , ଆଜ୍ଞା  ? ପୁଲିସ୍ ଧରିଥିବା ଦାଶରଥି ଦେଖିଛି । ବାଇକ୍ ବି ଥାନାରେ ଅଛି ' ବୋଲି ଯୁକ୍ତି ଉପସ୍ଥାପିତ କରାଯାଇଛି । ଆଖପାଖର ଲୋକେ , ସ୍ଥାନୀୟ ସରପଞ୍ଚ , ସାମ୍ବାଦିକମାନେ ମଧ୍ୟ ପୁଲିସ୍ ଯୁବକଙ୍କୁ ଥାନାକୁ ଧରିନେବା ପରେ ମାଡମାରି ମାରିଦେଇଥିବା ଓ ପରେ ଆଣି ଘାଟୀତଳେ ପକାଇ ଦେଇଥିବା ଆଶଙ୍କା ବ୍ୟକ୍ତ କରିଛନ୍ତି । ଏଯାବତ୍ ପୋଷ୍ଟମର୍ଟମ୍ ରିପୋର୍ଟ ଆସି ନଥିବା ପୁଲିସ୍ କହୁଛି । ତେବେ ମୃତଦେହ ପଡିଥିବା ସ୍ଥାନରେ କିଛି ରକ୍ତ ପଡି ନଥିବା ସହ ମୃତଦେହର ପଛପଟେ ଆଘାତ ନଥାଇ ସାମ୍ନାପଟର ଛାତି , ମୁହଁ ଓ କପାଳରେ ଆଘାତ ରହିଥିବା ଦେଖିଥିବା ଲୋକେ ପ୍ରକାଶ କରିଛନ୍ତି । ପୁଲିସ୍ ପକ୍ଷରୁ ଏଯାବତ୍ କୌଣସି ପ୍ରେସ୍ ମିଟ୍ କରାଯାଇନାହିଁ  ! 

ଉଲ୍ଲେଖନୀୟ ଯେ ଏହା ଏକ ଚୋରାଗଞ୍ଜେଇ କାରବାରର ଅଞ୍ଚଳ ଓ ପୁଲିସ୍ ନିଜେ ଏଭଳି ଧରପଗଡ କରି ଗଞ୍ଜେଇ ବିକି ଓ ଉତ୍କୋଚ ନେଇ ଚୋରାଚାଲାଣକାରୀଙ୍କୁ ଛାଡି ଦେଉଥିବା ଜଣାଶୁଣା । ଗତବର୍ଷ ଏଇଭଳି ଅଭିଯୋଗରେ ଲୋକେ ସ୍ଥାନୀୟ ଫିରିଙ୍ଗିଆ ଥାନାପୋଡି ଦେଇଥିବା ସହିତ ଥାନାଧିକାରୀ ଓ ଏସ୍ ଡି ପି ଓ ଙ୍କୁ ମାଡ ମାରିଥିଲେ । ତଥାପି ହେଲ୍ ମେଟ୍ ଚେକିଂ ଆଳରେ ବିନା ମାଜିଷ୍ଟ୍ରେଟ୍ ବା ଉପରିସ୍ଥ ଅଧିକାରୀଙ୍କ ଅଜ୍ଞାତସାରରେ ସହର ଉପକଣ୍ଠରେ ଜଗିବା ବଦଳରେ ଏହି ତଳିଆ ପୁଲିସ୍ କର୍ମଚାରୀମାନେ ୩୦ କିମି ଘାଟୀରାସ୍ତାରୁ ୧୫ କିମି ଗୋଡେଇ ଗୋଡେଇ ଧରପଗଡ କରୁଥିବା ଓ ଏଥିରେ ଜଣକର ମୃତ୍ୟୁ ବା ହତ୍ୟା ଅଭିଯୋଗ ହେଉଥିବା ନିମନ୍ତେ କିଏ ଦାୟୀ  ?

ଅଦ୍ୟାବଧି ଏହି ଘଟଣାର ଏକମାତ୍ର ପ୍ରତ୍ୟେକ୍ଷଦର୍ଶୀ ଦାଶରଥି ଦିଗାଲର ବୟାନ ରେକର୍ଡ ହୋଇ ନଥିବା ସହିତ ହତ୍ୟାକାଣ୍ଡ ଦଫାରେ ଅଭିଯୁକ୍ତମାନଙ୍କୁ ଗିରଫ କରାଯାଇ ନାହିଁ  ! ଆସନ୍ତା ୫ ତାରିଖରେ ଗୋଛାପଡା ଥାନା ସମ୍ମୁଖରେ ପରିବାର ଓ ଲୋକଙ୍କ ପକ୍ଷରୁ ଏକ ବିଶାଳ ରାଲି ସହ ସାମ୍ବାଦିକ ସମ୍ମିଳନୀ

କରାଯାଇ ସଠିକ୍ ତଦନ୍ତ କରାଯିବାକୁ ସରକାରଙ୍କ ଠାରେ ଦାବି କରାଯିବ ବୋଲି ମୃତକର ପତ୍ନୀ ସୁମନ୍ତୀ ବଣ୍ଡକୀ ଜଣାଇଛନ୍ତି । ମୃତଯୁବକ ଜଣକ ଜଣେ ଗରିବ ଦାଦନଶ୍ରମିକ ଓ ମାତ୍ର ଛଅମାସ ତଳେ ନୂଆଖାଇ ବେଳେ ଘରକୁ ଫେରିଥିଲେ । ତାଙ୍କର ଦୁଇଟି ଛୋଟ ଛୋଟ ପୁଅ ଅଛନ୍ତି । ପ୍ରେମବିବାହ କରି ସେ ପୂର୍ବରୁ ଦୁଇଥର ଜେଲ୍ ମଧ୍ୟ ଯାଇଥିଲେ । ଏବେ ତାଙ୍କର ବିଧବାପତ୍ନୀ ଓ ପିଲାମାନେ ସମ୍ପୂର୍ଣ୍ଣ ଅନାଥ ହୋଇପଡିଛନ୍ତି ।  ଭରତପୁର ଥାନା ମାମଲାରେ ସରକାର ବା ମୁଖ୍ୟମନ୍ତ୍ରୀ ଅତ୍ୟନ୍ତ ତତ୍ପରତା ଦେଖାଇଥିବା ବେଳେ ଏଇ ଘଟଣାଟିକୁ ସେତେଟା ଗୁରୁତ୍ୱ ଦେଉ ନଥିବା ଲୋକେ ଆଲୋଚନା କରୁଛନ୍ତି ।