27-Sep-2024

ବରଗଡ଼:(ନିରଞ୍ଜନ ତ୍ରିପାଠୀ)-ଆଶ୍ବିନ କୃଷ୍ଣପକ୍ଷ ନବମୀ ଦିନଟି ମାତୃମାନଙ୍କ ତର୍ପଣ ପାଇଁ ଉଦ୍ଦିଷ୍ଟ।ଚଳିତ ମାତୃନବମୀ ଦିନ ବରଗଡ ସହରର ଭଟଲି ଛକ ସ୍ଥିତ ଦୀନବନ୍ଧୁ ନଗର, ସୁପ୍ରିୟା ମାର୍ଗ ପଡାବାସୀଙ୍କ ପକ୍ଷରୁ ପ୍ରଭାତାଦିତ୍ଯ ମିଶ୍ରଙ୍କ ବାସଗୃହ ପ୍ରାଙ୍ଗଣରେ ମାତୃନବମୀ ପାଳନ କରାଯାଇଥିଲା।ଏହି ଅବସରରେ ଏକ ସଭାକାର୍ଯ୍ଯ ଅନୁଷ୍ଠିତ ହୋଇଥିଲା ।ଏହି କାର୍ଯ୍ୟକ୍ରମରେ ମୁଖ୍ଯ ଅତିଥି ରୂପେ  ସମାଜସେବୀ କଳ୍ପନା ଷଡଙ୍ଗୀ,ମୁଖ୍ଯବକ୍ତା ଭାବେ ପାର୍ବତୀ ଗିରି ମହିଳା ମହାବିଦ୍ୟାଳୟର ଅଧ୍ୟାପିକା ଡଃ ସଂଘମିତ୍ରା ମିଶ୍ର ଏବଂ ସଭାପତି ରୂପେ ମାଧବୀ ମିଶ୍ର  ଯୋଗଦେଇଥିଲେ।ସଭାରେ ବୟୋଜ୍ଯେଷ୍ଠା ସଦସ୍ଯା ପ୍ରେମଶୀଳା ମିଶ୍ର ଏବଂ ବରିଷ୍ଠ ସଦସ୍ଯ ନାରାୟଣ ଦାଶଙ୍କୁ ପଦଧୌତପୂର୍ବକ ପୂଜନ କରାଯାଇଥିଲା । ବରଗଡ଼ ଜିଲ୍ଲାର ବେଶ ଜଣାଶୁଣା ସମାଜସେବୀ ସଂଘମିତ୍ରା ପଟେଲଙ୍କୁ ତାଙ୍କର ଶବଦାହ କାର୍ଯ୍ଯ ପାଇଁ "ଶ୍ମଶାନବନ୍ଧୁ" ସମ୍ମାନରେ ସମ୍ବର୍ଦ୍ଧିତ କରାଯାଇଥିଲା। ସଭାକାର୍ଯ୍ଯକୁ ସଂଚାଳନ କରିଥିଲେ କବୟିତ୍ରୀ ପ୍ରବାସିନୀ ହୋତା । ଗୀତିକାର ଅଶୋକ ପଶାୟତ ମାତୃବନ୍ଦନା ଗାନ ଏବଂ କବୟିତ୍ରୀ ଜୟଶ୍ରୀ ଦାଶ ମାତୃ କବିତା ପଠନ କରିଥିଲେ ।  ବବିତା ପ୍ରଧାନ ଧନ୍ୟବାଦ ଅର୍ପଣ କରିଥିଲେ । ଅତିଥି ଗଣ ଏହି ଅଭିନବ କାର୍ଯ୍ୟକ୍ରମର ଭୁରି ପ୍ରଶଂସା କରିଥିଲେ ।