26-Sep-2024

ବରଗଡ:(ନିରଞ୍ଜନ ତ୍ରିପାଠୀ)-ଇନର୍ ହ୍ୱିଲ୍ କ୍ଲବର ଡିଷ୍ଟ୍ରିକ୍ଟ ଚେୟାରମ୍ୟାନ ସନ୍ଧ୍ୟା ରାନୀ ମିଶ୍ର  କ୍ଳବ ପରିଦର୍ଶନ ପାଇଁ ଗସ୍ତରେ ବରଗଡ଼ ପହଞ୍ଚିଥିଲେ।ଏହି ଅବସରରେ ପୂର୍ବ ଡିଷ୍ଟ୍ରିକ୍ଟ ଚେୟାରମ୍ୟାନ ମମତା ପୁରୋହିତଙ୍କ ନେତୃତ୍ବରେ ତାଙ୍କୁ ସ୍ୱାଗତ କରାଯାଇଥିଲା ଏବଂ ଏହି ବିଶେଷ ଉତ୍ସବରେ ମହିଳା ସଶକ୍ତିକରଣ ତଥା ସମାଜରେ ସ୍ୱାସ୍ଥ୍ୟ ସଚେତନତା ସୃଷ୍ଟି କରିବା ଉଦ୍ଦେଶ୍ୟରେ ଚାରୋଟି ପ୍ରଭାବଶାଳୀ ପ୍ରକଳ୍ପ ସଫଳତାର ସହ ସମ୍ପନ୍ନ ହୋଇଥିଲା। ସର୍ବପ୍ରଥମେ ସ୍ଥାନୀୟ ବାନ୍ଦୁଟିକ୍ରା ଫୁଟପାତ୍ ରେ ମାଁ ଝିଅ ଫାଷ୍ଟଫୁଡ୍ ଏବଂ ପନିପରିବା ବିକ୍ରି କରି ନିଜ ପେଟ ପୋଷଣ କରୁଥିବା ବେଳେ, ତାଙ୍କୁ କ୍ଳବ ପକ୍ଷରୁ ସମସ୍ତ ଆବଶ୍ୟକୀୟ ସାମଗ୍ରୀ ସହିତ ଏକ ବଡ଼ ଆକାରର ଫାଷ୍ଟ ଫୁଡ୍ ଷ୍ଟଲ୍ (ଠେଲା) ପ୍ରଦାନ କରାଯାଇଥିଲା। ଦ୍ୱିତୀୟ ପ୍ରକଳ୍ପ ଅନ୍ତର୍ଗତ ଗର୍ଭାଶୟ କର୍କଟ ଏବଂ ଏଚପିଭି ଟିକା ବିଷୟରେ ସଚେତନତା ସୃଷ୍ଟି କରିବା ଏବଂ ଏହାର ପ୍ରତିରୋଧ ପାଇଁ ଏଚପିଭି ଟିକା ବିଷୟରେ ସଚେତନତା ସୃଷ୍ଟି କରିବା କୁ ନେଇ କ୍ଲବ ପକ୍ଷରୁ ଏକ ମାସ ପାଇଁ ସହର କେନ୍ଦ୍ରରେ ଏକ ବଡ଼ ହୋର୍ଡିଂ ପ୍ରଦର୍ଶିତ କରା ଯାଇଥିଲା।ତୃତୀୟ ପ୍ରକଳ୍ପ ରେ ପ୍ରବଳ ଖରାରୁ ରକ୍ଷା ପାଇଁ ରାସ୍ତା କଡ଼ରେ ପନିପରିବ ବିକାଳୀଙ୍କୁ ଇନର ହ୍ଵିଲ ଲୋଗୋ ଯୁକ୍ତ ଏକ ବଡ ଛତା ପ୍ରଦାନ କରା ଯାଇଥିଲା।

ଏଥିସହ କ୍ଲବ୍ ଜଣେ ଅଭାବୀ ମହିଳାଙ୍କୁ ନିଜର ଜୀବିକା ନିର୍ବାହ ପାଇଁ ଏକ ସିଲେଇ ମେସିନ୍ ମଧ୍ୟ ଯୋଗାଇ ଦେଇଥିଲା ।କ୍ଳବ ସଭାପତି ଫ୍ୟାଶନ୍ ଡିଜାଇନର୍ ରିତୁ ସାନନ୍ ତାଙ୍କୁ ତାଙ୍କ ଦକ୍ଷତା ବୃଦ୍ଧି ତଥା ଆର୍ଥିକ ଦୃଷ୍ଟିରୁ ଅଧିକ ସ୍ଥିର ହେବାରେ ସାହାଯ୍ୟ କରିବା ପାଇଁ ତାଙ୍କୁ ମାର୍ଗଦର୍ଶନ ଏବଂ ତାଲିମ ପ୍ରଦାନ କରିବା ପାଇଁ ପ୍ରତିଶ୍ରୁତି ଦେଇଥିଲେ। ଏହି କାର୍ଯ୍ୟକ୍ରମରେ ଆଇଏସଓ ପୂଜା ଅଗ୍ରୱାଲ, ଅସୀମା ବିସୋଇ, ଅନୁପମା ଅଗ୍ରୱାଲ, ନିବେଦିତା ପୂଜାରୀ, ସଚିବ ଜୟନ୍ତୀ ବେହେରା, ବୁଲବୁଲ ଜିନ୍ଦଲ, ସାରିକା ଅଗ୍ରୱାଲ, ଭାଗ୍ୟସିନୀ ପାତ୍ର, ଚିନ୍ମୟ ମେହେର, ଲୀନା ରାନୀ ଦାସ, ସରିତା ଦାସ, ନିତୁ ଅଗ୍ରୱାଲ, ମଞ୍ଜୁଲା ସାହୁ, ସୁନୀତା ଅଗ୍ରୱାଲ, ସୁପ୍ରଭା ସାମଲ, ନଲିନୀ କୋଟେଚା, ଶକୁନ୍ତଳା ସାହୁ, ପୁନମ ଅଗ୍ରୱାଲ, ମିତୁ ଅଗ୍ରୱାଲ, ଡା. ଆରତୀ ପ୍ରଧାନ, ସନ୍ଧ୍ୟା ଅଗ୍ରୱାଲଙ୍କ ସମେତ ଅନେକ କ୍ଲବ ସଦସ୍ୟ ସକ୍ରିୟ ସହଯୋଗ କରିଥିଲେ। ମହିଳା ସଶକ୍ତିକରଣ ତଥା ସାମାଜିକ ସେବା ପାଇଁ ଏହି କ୍ଲବ୍ କ୍ରମାଗତ ଭାବରେ କାର୍ଯ୍ୟ କରି ଆସୁଥିବାବେଳେ ଏହି ପ୍ରକଳ୍ପଗୁଡିକ ବଞ୍ଚିତ ଲୋକଙ୍କୁ ଉନ୍ନତ କରିବା ଏବଂ ସମାଜରେ ସ୍ୱାସ୍ଥ୍ୟ ଏବଂ ସୁସ୍ଥତାକୁ ପ୍ରୋତ୍ସାହିତ କରିବା ପାଇଁ କ୍ଲବର ଉତ୍ସର୍ଗତାକୁ ପ୍ରତିଫଳିତ କରିଥାଏ । ଭବିଷ୍ୟତରେ ମଧ୍ୟ କ୍ଲବ ନିଜର ଦାୟିତ୍ ତୁଲାଇବା ଜାରି ରଖିବ ବୋଲି ଇନର୍ ହ୍ୱିଲ୍ କ୍ଲବ ଅଫ ବରଗଡ଼ର ପୂର୍ବ ଡିଷ୍ଟ୍ରିକ୍ଟ ଚେୟାରମ୍ୟାନ ମମତା ପୁରୋହିତ ପରିପ୍ରକାଶ କରିଥିଲେ।