17-Sep-2024

ବଲାଙ୍ଗିର: କୋଶଲି ଭାଷାକୁ ଭାରତୀୟ ସମ୍ବିଧାନ ଅଷ୍ଟମ ପରିଚ୍ଛେଦରେ ମାନ୍ୟତା ଦେବାରେ ଅଯଥା ବିଳମ୍ବ ଯୋଗୁଁ ଓଡିଶାର ଶିଶୁମାନେ ପ୍ରାଥମିକ ସ୍ତରରେ ନିଜ ମାତୃ ଭାଷାରେ ଶିକ୍ଷା ପାଇ ପାରୁନାହାନ୍ତି । ଫଳରେ ସେମାନଙ୍କର ବୌଦ୍ଧିକ ବିକାଶ ହୋଇପାରୁନାହିଁ । ଏ ଅଂଚଳରୁ ଅପାଠୁଆ ତଥା ଅଧାରୁ ପାଠ ଛାଡୁଥିବା ଛାତ୍ର ଛାତ୍ରୀଙ୍କ ସଂଖ୍ୟା ଦୃତଗତିରେ ବଢି ଯାଉଛି । ଯାହାକି ଭାରତ ମଧ୍ୟରେ ଓଡିଶା ରାଜ୍ୟ ରେ ଶତକଡା ୨୭.୨୯ ସର୍ବାଧିକ ଓ ଅତ୍ୟନ୍ତ ଉଦ୍‌ବେଗ ଜନକ ।

ସେଥି ପାଇଁ ଆଜି କୋଶଲ ଅସ୍ମିତା ରଥଯାତ୍ରା ସମୟରେ ବଲାଙ୍ଗିର ଜିଲ୍ଲାପାଳ  ସମ୍ମୁଖରେ ବିଭିନ୍ନ ଦାବିକୁ ନେଇ ଏକ ପ୍ରତିବାଦ ସଭା ଅନୁଷ୍ଠିତ ହୋଇଥିଲା । ଏଥିରେ ବିଭିନ୍ନ ଅତିଥିମାନେ କୋଶଲି ଭାଷାକୁ ସାମ୍ବିଧାନିକ ମାନ୍ୟତା, ପଶ୍ଚିମ ଓଡିଶାର ଶିଶୁମାନଙ୍କୁ କେନ୍ଦ୍ର ସରକାରଙ୍କ ନୂତନ ଶିକ୍ଷାନିତି ମତେ ମାତୃଭାଷାରେ ଶିକ୍ଷା ଦିଆଯିବା ଓ କୋଶଲି ଭାଷାକୁ ଓଡିଶାର ଦ୍ୱିତୀୟ ସରକାରୀ ଭାଷାରେ ଗ୍ରହଣ କରାଯିବା ଇତ୍ୟାଦି ଦାବିର ଯଥାର୍ଥତା ଉପରେ ବକ୍ତବ୍ୟ ପ୍ରଦାନ କରିଥିଲେ । ସେହିପରି ଆଗାମୀ ଜନଗଣନା ବେଳେ ପଶ୍ଚିମ ଓଡିଶାର ସମସ୍ତ ଭାଇ ଉଉଣୀ ନିଜ ମାତୃଭାଷା କୋଶଲି ବୋଲି ଉଲ୍ଲେଖ କରିବାକୁ ନିବେଦନ କରିଥିଲେ । ଉକ୍ତ ସଭାରେ କୋଶଲ ସାହିତ୍ୟ ସଂସ୍କୃତ ଏକାଡେମୀର ସାଧାରଣ ସଂପାଦକ ତଥା ସାମ୍ବାଦିକ ଗୋରଖନାଥ ସାହୁ ଅଧ୍ୟକ୍ଷତା କରିଥିଲେ । ସମ୍ମାନିତ ଅତିଥି ଭାବେ କୋଶଲବାଦୀ ନେତା ତଥା ଶିକ୍ଷାବିଦ୍ ମନୋରଂଜନ ସାହୁ, ଭାରତୀୟ ବୟନ ଶିଳ୍ପ କର୍ମଚାରୀ ସଂଘ ସଭାପତି ପ୍ରଫୁଲ୍ଲ ମହାପାତ୍ର ଓ ବଲାଙ୍ଗିର ସ୍ୱେଚ୍ଛାସେବୀ ସଂଗଠନ ସଭାପତି ଗୋବିନ୍ଦ ଚନ୍ଦ୍ର ଶତପଥି ଯୋଗ ଦେଇଥିବା ବେଳେ ସାଂସ୍କୃତିକ ଏକାଡେମୀର ସଂପାଦକ ସରୋଜ କୁମାର ଭୁୟାଁ ଏବଂ ଯୁଗ୍ମ ସଂପାଦକ ତଥା ଭାଷାବିଦ୍ ସକେତ ଶ୍ରୀଭୂଷଣ ସାହୁ ସଭାକୁ ସଂଯୋଜନା କରିଥିଲେ । ଶେଷରେ  ଏକ ଦାବୀପତ୍ର ପ୍ରଧାନମନ୍ତ୍ରୀ ଙ୍କ ଉଦ୍ଦେଶ୍ୟରେ ସ୍ଥାନୀୟ

ଅତିରିକ୍ତ ଜିଲ୍ଲାପାଳ ବିଜୟାନନ୍ଦ ସେଠିଙ୍କୁ ହସ୍ତାନ୍ତର କରିଥିଲେ । ପାଟଣାଗଡ ସ୍ଥିତ ମାଁ କୋଶଳେଶ୍ୱରୀଙ୍କର ପୂଜା ଅର୍ଚ୍ଚନା ପରେ କୋଶଳ ଅସ୍ମିତା ରଥଯାତ୍ରା ଆରମ୍ଭ ହୋଇଥିଲା । ଏହି ରଥ ପଶ୍ଚିମ ଓଡିଶାର ୧୦ଟି ଜିଲ୍ଲା ମଧ୍ୟରେ ଅତିକ୍ରମ କରିବା ପରେ ସୁବର୍ଣ୍ଣପୁର ଜିଲ୍ଲାର ବୈଦ୍ୟନାଥ ଗ୍ରାମରେ ଥିବା କୋଶଳେଶ୍ୱର ମନ୍ଦିର ଠାରେ ସମାପ୍ତ ହେବାର କାର୍ଯ୍ୟକ୍ରମ ରହିଛି ।