11-Aug-2024

ଡୁଙ୍ଗୁରିପାଲି, ତା. ୧୧/୮- ବିଦ୍ୟାଳୟ ସ୍ତରରେ ଛାତ୍ରଛାତ୍ରୀଙ୍କ ସୁରକ୍ଷା ଓ ନିରାପତ୍ତା ବ୍ୟବସ୍ଥା, ଅନଲାଇିନ୍ ଏକଟିଭିଟିରେ ସତର୍କତା, ସାଇବର ସଚେତନତା, ସ୍ୱଚ୍ଛତା ପକ୍ଷ ପାଳନ, ସୁରଭି କାର୍ଯ୍ୟକ୍ରମ, ୟୁଥ ଓ ଇକୋ କ୍ଲବର କ୍ରିୟାନ୍ୱୟନ, ବୟସ ଅନୁସାରେ ଛାତ୍ରଛାତ୍ରୀଙ୍କ ବିଭିନ୍ନ ଶ୍ରେଣୀରେ ନାମ ଲେଖା, ନିୟମିତ ଶିକ୍ଷା ଗ୍ରହଣ ଓ ସମାପ୍ତି ଭଳି ବିଭିନ୍ନ ଦିଗକୁ ସୁନିଶ୍ଚିତ କରିବା ଉଦ୍ଦେଶ୍ୟରେ ସ୍ଥାନୀୟ ମାୟାବର୍ହା ହାଇସ୍କୁଲ ଠାରେ ଶିକ୍ଷକ ଓ ଅଭିଭାବକ ଙ୍କ ଚଳିତ ବର୍ଷର ଦ୍ୱିତୀୟ ସମ୍ମିଳନୀ ଅନୁଷ୍ଠିତ ହୋଇଯାଇଛି । ମୁଖ୍ୟଅତିଥି ଭାବରେ ସୋନପୁର ଜିଲ୍ଲା ଶିକ୍ଷାଧିକାରୀ ଶ୍ରୀ ଲକ୍ଷ୍ମଣ ଭୋଇ ଯୋଗଦେଇ ବିଦ୍ୟାଳୟର ବିଭିନ୍ନ କାର୍ଯ୍ୟକ୍ରମରେ ଛାତ୍ରଛାତ୍ରୀ କିଭଳି ଉତ୍କର୍ଷତା ଲାଭ କରିବେ ସେ ଦିଗରେ ମାର୍ଗଦର୍ଶନ କରିଥିଲେ । ସମ୍ମାନୀତ ଅତିଥି ଭାବରେ ଜିଲ୍ଲା ବିଜ୍ଞାନ ଶିକ୍ଷା ନିରୀକ୍ଷକ ପର୍ଶୁରାମ ମେହେର, ତରଭା ବାଳୀକା ହାଇସ୍କୁଲର ପ୍ରାକ୍ତନ ପ୍ରଧାନଶିକ୍ଷକ ନରେନ୍ଦ୍ର ସାହୁ, ମାୟାବର୍ହା ହାଇସ୍କୁଲର ପ୍ରାକ୍ତନ ପ୍ରଧାନଶିକ୍ଷକ ମନୋଜ କୁମାର ପୂଜାରୀ, ମାୟାବର୍ହା ସିଆରସିସି ଶ୍ରୀରାମ ସିକନ୍ଦର ପ୍ରମୁଖ ଏହି ବୈଠକ ରେ ଯୋଗଦେଇ ଶିକ୍ଷା, ଶିକ୍ଷାୟତନ, ଛାତ୍ରଛାତ୍ରୀ, ଶିକ୍ଷକ ଓ ଅଭିଭାବକ ସମସ୍ତେ ପରିପୂରକ ଏବଂ ମିଳିତ ଭାବେ ବିକାଶ ଦିଗରେ କାର୍ଯ୍ୟ କରିବାକୁ ଗୁରୁତ୍ୱାରୋପ କରିଥିଲେ । ସାମଗ୍ରିକ ଭାବେ ବରିଷ୍ଠ ଶିକ୍ଷକ ଦିନବନ୍ଧୁ ପ୍ରଧାନ କାର୍ଯ୍ୟକ୍ରମକୁ ସଂଯୋଜନା କରିଥିଲେ । ଆଗାମୀ ଦିନରେ ଅଭିଭାବକଙ୍କ ତରଫରୁ ଦିଆଯାଇଥିବା ଗଠନମୂଳକ ପ୍ରସ୍ତାବ ଗୁଡିକୁ କାର୍ଯ୍ୟକ୍ଷମ କରିବାକୁ ସ୍ୱତନ୍ତ୍ର ପଦକ୍ଷେପ ହାତକୁ ନେବାକୁ ପ୍ରଧାନଶିକ୍ଷକ ଶ୍ରୀପଶାୟତ ପ୍ରତିଶୃତି ଦେଇଥିଲେ । ଦଶମ ଶ୍ରେଣୀର ଛାତ୍ରୀ ଜନନୀକା ନାଏକ, ଲିପସା ଯୁଆଡି, ଅର୍ଚ୍ଚିତା ପଧାନ, ଶୁଭଶ୍ରୀ, ପ୍ରୀତି,ରେଖା ପ୍ରମୁଖ ସ୍ୱାଗତ ସଙ୍ଗିତ ଗାନ କରିଥିବା ବେଳେ ଅର୍ଚ୍ଚିତା ପ୍ରଧାନ ବିଦ୍ୟାଳୟ କାର୍ଯ୍ୟକ୍ରମର ନିଜସ୍ୱ ଅନୁଭୂତି ବର୍ଣ୍ଣନା କରିଥିଲେ । ଅଭିଭାବକଙ୍କ ମଧ୍ୟରେ ଚକା ସାହୁ ଓ ପ୍ରମୋଦିନୀ ଯୁଆଡି କାର୍ଯ୍ୟକ୍ରମର  ଆବଶ୍ୟକତା ବିଷୟ ରେ  ମନ୍ତବ୍ୟ ଦେଇଥିଲେ । ଶେଷରେ ଆଲୁମିନୀ ସଦସ୍ୟ କିରଣ ପୁଟେଲ ଧନ୍ୟବାଦ ଅର୍ପଣ କରିଥିଲେ । ଅନ୍ୟମାନଙ୍କ ମଧ୍ୟରେ ସଂଜୀବ କୁମାର ପୂଜାରୀ, ସ୍ନିଗଧା ପ୍ରଧାନ, ସୁରଜ ଖମାରୀ, ସମୀର କଠାର, ମୀନକେତନ ଦାଶ ପ୍ରମୁଖ କାର୍ଯ୍ୟକ୍ରମରେ ଉପସ୍ଥିତ ରହି ସହଯୋଗ କରିଥିଲେ।

ସୋନପୁର ଡିଇଓ ଶ୍ରୀ ଲକ୍ଷ୍ମଣ ଭୋଇ ମାୟାବର୍ହା ହାଇସ୍କୁଲ ସମେତ ଡୁଙ୍ଗୁରିପାଲି ବ୍ଲକର ସମଲେଇଚୂଆଁ ହାଇସ୍କୁଲ, ଆଏଁଲାସାରୀ ଅପର ପ୍ରାଇମେରୀ ସ୍କୁଲ, ମାୟାବର୍ହା କେଜିବିଭି ସ୍କୁଲ କୁ ପରିଦର୍ଶନ କରି ଶିକ୍ଷକ ଏବଂ ଅଭିଭାବକ ବୃନ୍ଦଙ୍କୁ  ମାର୍ଗଦର୍ଶନ କରିଥିଲେ ।