03-Aug-2024

ବରଗଡ଼/ବିଜେପୁର:(ନିରଞ୍ଜନ ତ୍ରିପାଠୀ)- ମାଟି ମନସ୍କତା ହିଁ କବିର କବିତାକୁ କାଳଜୟୀ କରେ।କଵି ରାଜାରାମ ମେହେରଙ୍କ କାବ୍ୟ କବିତାରେ ପ୍ରଚୁର ପରିମାଣରେ ଏହି ଗୁଣ ଭରିରହିଥିଵାରୁ ତାଙ୍କର ସୃଷ୍ଟି ସମ୍ଭାର ପାଠକ ମହଲରେ ବେଶ୍ ଆଦୃତ ହୋଇ ପାରିଛି।ଵରଗଡ ଜିଲ୍ଲା ଵିଜେପୁର ବ୍ଲକ୍ ଲାଉମୁଣ୍ଡା କଲ୍ୟାଣ ମଣ୍ଡପରେ ଆୟୋଜିତ କବି ରାଜାରାମ ମେହେର ଜୟନ୍ତୀ ଉତ୍ସବରେ ଏହି ମତପ୍ରକାଶ ପାଇଛି। ବିଜେପୁର ଖଗେଶ୍ବର ସାହିତ୍ୟ କଳା ପରିଷଦ ପକ୍ଷରୁ ଆୟୋଜିତ ଏହି ଉତ୍ସବକୁ ମେଲଛାମୁଣ୍ଡା କଲେଜର ପ୍ରାଧ୍ୟାପକ ଡକ୍ଟର ପ୍ରଦୀପ କୁମାର ପ୍ରଧାନ ମୁଖ୍ୟ ଅତିଥି ଭାବେ ଯୋଗଦେଇ ଉଦଘାଟନ କରିଥିଲେ। ଏହି ଅବସରରେ ସମାରୋହ ପ୍ରାରମ୍ଭରୁ କବିଙ୍କ ଜନ୍ମ ପୀଠରେ ଦୀପ ପ୍ରଜ୍ଵଳନ କରି ଏକ ଶୋଭାଯାତ୍ରାରେ ଖଗେଶ୍ବର ସାହିତ୍ୟ କଳା ପରିଷଦର ସଦସ୍ୟ ଏବଂ ଗଙ୍ଗାଧର ମେହେର କ୍ଲବ , ଲାଉମୁଣ୍ଡାର ସଦସ୍ୟଙ୍କ ସମେତ ଅନେକ ଗ୍ରାମବାସୀ କଲ୍ୟାଣ ମଣ୍ଡପ ପରିସରକୁ ପହଞ୍ଚି ଥିଲା। ପରିଷଦର ସଭାପତି ତଥା ନାଟ୍ୟକାର ମୋହନ ସିଂ କହ୍ନେଇ ଜୟନ୍ତୀ ସମାରୋହରେ ଅଧ୍ୟକ୍ଷତା କରିଥିବାବେଳେ ଆଗାମୀ ଦିନରେ ଜନ୍ମ ମାଟି ଲାଉମୁଣ୍ଡାରେ କବି ରାଜାରାମ ମେହେରଙ୍କ ପ୍ରତିମୂର୍ତ୍ତି ସ୍ଥାପନ ଦିଗରେ ସଚେତନ ନାଗରିକ ଆଗେଇ ଆସିବାକୁ ମତପ୍ରକାଶ କରିଥିଲେ। ବିଜେପୁର ମହାବିଦ୍ୟାଳୟର ଅଧ୍ୟାପକ ଡ. ଚିନ୍ମୟ ସାହୁ ମୁଖ୍ୟବକ୍ତା ଭାବେ ଯୋଗଦେଇ କବିଙ୍କ ମାଟି ମନସ୍କତା ଉପରେ ଆଲୋକପାତ କରିଥିଲେ। ସାମାଜିକ କର୍ମୀ ରଞ୍ଜିତ ମେହେର  ସମ୍ମାନିତ ଅତିଥି ଭାବେ ଯୋଗଦେଇ କବିଙ୍କ ପ୍ରଚାର ପ୍ରସାର ଦିଗରେ ଗ୍ରାମବାସୀଙ୍କ ସହଯୋଗ ଅଵ୍ୟାହତ ରହିଵ ଵୋଲି ମତବ୍ୟକ୍ତ କରିଥିଲେ। ସଂପାଦକ ରାଜେଶ୍ୱର ବେହେରା ଉଦ୍ଦେଶ୍ୟ ଜ୍ଞାପନ ଓ ଅତିଥି ପରିଚୟ ପ୍ରଦାନ ଥିଲେ । ପ୍ରାରମ୍ଭିକ ସଙ୍ଗୀତ ସୁଷମା ସାହୁ ଗାନ କରିଥିବା ବେଳେ ସଭାକୁ ମକରଧ୍ବଜ ସାହୁ ପରିଚାଳନା କରିଥିଲେ । ମଞ୍ଚ କଳାକାର ହୃଷିକେଶ ମେହେର ଧନ୍ୟବାଦ ଅର୍ପଣ କରିଥିଲେ।ପରେ କବିତା ଆସର ଅନୁଷ୍ଠିତ ହୋଇଥିଲାକବି ମକରଧ୍ବଜ ମେହେରଙ୍କ ସଂଯୋଜନାରେ କବି ଜଗତ ଜୀବନ ଡନସେନା ,ଶେଷଦେବ ମେହେର ,ତୁଳସୀରାମ ମେହେର , ସାବିତ୍ରୀ ମେହେର,,ହୃଷୀକେଶ ମେହେର,ସୂର୍ଯ୍ୟକୁମାର ମେହେର,ପବିତ୍ର ସାହୁ ପ୍ରମୁଖ କବିତା ପାଠ କରିଥିଲେ।ପଙ୍କଜ ମେହେର, ପ୍ରଭାସ ମେହେର,ପ୍ରମୋଦ ମେହେର,ଆଶିଷ ମେହେର, ରବି ମେହେରଙ୍କ ସମେତ ଅନେକ ସାହିତ୍ୟ ପ୍ରେମୀ ଉପସ୍ଥିତ ଥିଲେ ।