23-Jul-2024

ବଲାଙ୍ଗୀର-ପଶ୍ଚିମଓଡିଶାରେ ବସବାସ କରୁଥିବା ଅଢେଇ କୋଟି ଲୋକଙ୍କର ମହାନ କୃଷିଭିତ୍ତିକ ଗଣପର୍ବ ନୂଆଖାଇ ଉପଲକ୍ଷେ ଚଳିତବର୍ଷ ତନିଦିନିଆଁ ଛୁଟିଘୋଷଣା କରିବାକୁ ବଲାଙ୍ଗୀର ବିଧାୟକ କଳିକେଶ ନାରାୟଣ ସିଂଦେଓ ମୁଖ୍ୟମନ୍ତ୍ରୀଙ୍କୁ ଚିଠିକରି ନିବେଦନ କରିଥିବା ଜଣାଯାଇଛି । କଳିକେଶ ଚିଠିରେ ଉଲ୍ଲେଖ କରିଛନ୍ତି ଯେ,ଗଣପର୍ବ ନୂଆଖାଇ ପାଇଁ ବିଭିନ୍ନ ରାଜ୍ୟ ତଥା ଦେଶବିଦେଶରେ ରହୁଥିବା ଲୋକ ମାନେ ନିଜ ଜନ୍ମମାଟିକୁ ଆସିଥାନ୍ତି । ଲୋକଙ୍କ ସହିତ ମିଶି ଧୂମଧାମରେ ଏହି ପର୍ବକୁ ପାଳନ କରି ଜୁହାର ଭେଟ ହୋଇ

ଥାନ୍ତି । ଭାଇଚାରାର ଏହି ପର୍ବ ପାଇଁ ଖୁବ ଉତ୍ସାହ ରହୁଛି ଓ ଦିନକୁ ଦିନ ଏହି ପର୍ବର ଆବଶ୍ୟକତା ରହିଛି । କିନ୍ତୁ ସରକାର ପ୍ରତିବର୍ଷ ମାତ୍ର ଗୋଟିଏ ଦିନ ଛୁଟି ଘୋଷଣା କରିଥାନ୍ତି । ଲୋକଙ୍କ ଯିବା ଆସିବା ଓ ଲୋକଙ୍କ ସହ ମିଶିବାର ଇଚ୍ଛାଥିଲେ ହେଁ ଛୁଟି ମିଳୁନଥିବାରୁ ବାଧ୍ୟ ହୋଇ ପୁଣି ଫେରିବାକୁ ପଡିଥାଏ । ଗଣେଶପୂଜାର ପରଦିନ ପଞ୍ଚମୀତିଥିରେ ନୂଆଖାଇ ପାଳନ କରାଯାଉଥିବାରୁ ଗଣେଶପୂଜାଠାରୁ ଆରମ୍ଭ କରି ତିନିଦିନ ପର୍ଯ୍ୟନ୍ତ ଛୁଟିଘୋଷଣା କରିବାକୁ କଳିକେଶ ମୁଖ୍ୟମନ୍ତ୍ରୀଙ୍କ ପାଖରେ ଦାବି କରିଛନ୍ତି । ତେବେ କଳିକେଶଙ୍କ ଏହି ଚିଠି କୋସଲୀ/ସମ୍ବଲପୁରୀ ଭାଷାରେ ଲେଖାଯାଇଥିବାରୁ କଳିକେଶଙ୍କ ଏହି ଉଦ୍ୟମକୁ ବିଭିନ୍ନ ମହଲରେ ସ୍ୱାଗତ କରାଯାଇଛି ।