13-Jul-2024

ବଲାଙ୍ଗୀର(ମହେନ୍ଦ୍ର ଦର୍ଜି ଙ୍କ ରିପୋର୍ଟ): ବଲାଙ୍ଗୀର ଜିଲ୍ଲା ଆଗଲପୁର(ଡୁଡୁକା) ବ୍ଲକ କୁଟାସିଂହା ପଂଚାୟତ କଣ୍ଟାପାଳି ଗାଁର ୟୁପି ସ୍କୁଲ ବନ୍ଦ ହୋଇଯାଇଥିବାରୁ ଗାଁ ର ଛୋଟଛୋଟ ଛୁଆ ବହୁ ଅସୁବିଧାରେ ଦେଢ଼ କିଲୋମିଟର ଦୂର କୁଟାସିଂହା ୟୁପି ସ୍କୁଲକୁ ପଢିବାକୁ ଯାଉଥିବା ଦେଖାଯାଉଛି । ସୂଚନା ଅନୁସାରେ କଣ୍ଟାପାଳିରେ ୧୯୭୧ ମସିହାରେ ଏକ ୟୁପି ସ୍କୁଲ ସ୍ଥାପିତ ହୋଇଥିଲା । ପ୍ରଥମରୁ ତୃତୀୟ ପର୍ଯନ୍ତ ଆରମ୍ଭ ହୋଇଥିବା ଏହି ସ୍କୁଲରେ ଜଣେ ଶିକ୍ଷକ ନିଯୁକ୍ତ ହୋଇଥିଲେ |ଏହାର କିଛି ବର୍ଷ ପରେ ଏଠାରେ ପଞ୍ଚମ ଶ୍ରେଣୀ ପର୍ଯ୍ୟନ୍ତ ପଢା ଲାଗି ଆଉ ଜଣେ ଶିକ୍ଷକ ନିଯୁକ୍ତି ହେଲେ । ସବୁ ଠିକଠାକ ଚାଲିଥିଲା ହେଲେ ୨୦୨୨ମସିହାରେ ସରକାରଙ୍କ ନୁଆଁ ସ୍କୁଲ ସଂସ୍କାର ଗାଇଡଲାଇନ ଅନୁଯାୟୀ ୩୦ ଜଣରୁ କମ ଛାତ୍ରଛାତ୍ରୀ ଥିବା ସ୍କୁଲ ବନ୍ଦ ହୋଇଗଲା । ସେହି ସମୟରେ ଏହି ସ୍କୁଲରେ ୨୮ ଜଣ ଛାତ୍ରଛାତ୍ରୀ ଥିବାରୁ ଏହାକୁ ଉଠାଇ ଦେଇ କୁଟାସିଂହା ହାଇସ୍କୁଲରେ ସାମିଲ କରାଗଲା । ଏଠାରେ କାର୍ଯ୍ୟରତ ୨ ଜଣ ଶିକ୍ଷକ ମଧ୍ୟ ସେଠାରେ ନିଯୁକ୍ତି ହେଲେ। କିନ୍ତୁ ଛୁଆ ହାଇସ୍କୁଲକୁ ପଢିବାକୁ ଗଲେନାହିଁ । ଗାଁ ଠାରୁ ଟିକେ ଦୂର ତଥା ମୁଖ୍ୟରାସ୍ତା ପାର୍ଶ୍ୱରେ ଥିବାରୁ ଦୈନିକ ଏହି ରାସ୍ତା ଦେଇ ଶହଶହ ଯାନବାହନ ଯାତାୟାତ କରୁଥିବା ଯୋଗୁଁ ଛୋଟଛୋଟ ଛୁଆଙ୍କୁ ଏହି ସ୍କୁଲକୁ ଛାଡିବାକୁ ଅଭିଭାବକ ସୁରକ୍ଷିତ ମନେକଲେ ନାହିଁ | ପୂଣି ହାଇସ୍କୁଲ ଓ +2  କଲେଜର ବଡ଼ବଡ଼ ଛାତ୍ରଛାତ୍ରୀଙ୍କ ସାଙ୍ଗରେ ମିଶିବାକୁ ଛୁଆ ଭୟ କଲେ। ସେଇଥି ପାଇଁ ନିଜ ଛୁଆଙ୍କୁ କୁଟାସିଂହା ୟୁପି ସ୍କୁଲରେ ପଢ଼େଇବାକୁ ବାଧ୍ୟ ହେଲେ | ନିଜ କାମଧନ୍ଦା ଛାଡି ଛୁଆଙ୍କୁ ନେବା ଆଣିବା କରୁଥିବାରୁ ଅବିଭାବକ ଅସନ୍ତୋଷ ପ୍ରକାଶ କରିଛନ୍ତି । ଏପଟେ ଛୁଆ ପଢିବାକୁ ଆସୁନଥିବାରୁ ଦୁଇ ଜଣ ଶିକ୍ଷକ ଓ ଦୁଇ ଜଣ ପାଚିକା ବସି ରହୁଛନ୍ତି । ଏ ସମ୍ପର୍କରେ ସିଆରସିସି ଠାରୁ ଆରମ୍ଭ କରି ଜିଲ୍ଲା ଶିକ୍ଷାଧୀଶଙ୍କ ପର୍ଯ୍ୟନ୍ତ ଓ ସ୍ଥାନୀୟ ଜନ ପ୍ରତିନିଧିଙ୍କ ଠାରୁ ଆରମ୍ଭ କରି ଶିକ୍ଷାମନ୍ତ୍ରୀଙ୍କ ପର୍ଯନ୍ତ ଜଣେଇ ଥିଲେ ସୁଦ୍ଧା କିଛି ସୁଫଳ ମିଳିନଥିବା ଗ୍ରାମବାସୀଙ୍କ ଠାରୁ ପ୍ରକାଶ । ଆହୁରି ମଧ୍ୟ୍ୟ ଗ୍ରାମବାସୀ କହିଛନ୍ତି ସ୍କୁଲ ନ ଉଠିବାକୁ କେସ ମଧ୍ୟ କରାଯଇଛି, ଯାହା ଏବେ ହାଇକୋର୍ଟରେ ବିଚାରଧୀନ ଅବସ୍ଥାରେ ପଡ଼ି ରହିଛି । ତେଣୁକରି ଏ ସମସ୍ୟାର ସମାଧାନ କରି ତୁରନ୍ତ ପଦକ୍ଷେପ ନେବାକୁ ଶାସନ ଓ ପ୍ରଶାସନକୁ ଗ୍ରାମବାସୀ ଅନୁରୋଧ କରିଛନ୍ତି |