10-Jul-2024

ଆଗଲପୁର(ପ୍ରେରଣା ଖବର):  ଆଗଲପୁର ବ୍ଲକ ଅନ୍ତର୍ଗତ ବକଟି ଗ୍ରାମରୁ ପଟୁଆପାଲି ଗ୍ରାମକୁ ସଂଯୋଗ କରୁଥିବା ଆର୍ ଡି ରାସ୍ତା ମଝିରେ ନୂତନ ଭାବେ ଦୁଇଟି କଲଭଟ୍ ନିର୍ମାଣ କରାଯାଇଛି l ନିର୍ମାଣ କରିବାର କିଛି ମାସ ନ ପୁରୁଣୁ ତାହା ଏବେ ବଡ଼ବଡ଼ ଗର୍ତ୍ତ ହୋଇ ଫାଟି ଆଁ କଲାଣି l ଅତି ନିମ୍ନ ମାନର କାର୍ଯ୍ୟ ହୋଇଥିବା ଲୋକେ ଅଭିଯୋଗ କରିଛନ୍ତି l କେନାଲ୍ ଉପରେ ନିର୍ମିତ ହୋଇଥିବା ଦୁଇଟି କଲଭର୍ଟ ଏବେ ବିପଦସଙ୍କୁଳ ଅବସ୍ଥାରେ l ତାହା ଦବିଯାଇ ବଡ଼ବଡ଼ ଗର୍ତ୍ତ ସୃଷ୍ଟି ହୋଇଛି l ଫଳରେ ଲୋକେ ଯିବାଆସିବାରେ ବହୁ ଅସୁବିଧାର ସମ୍ମୁଖୀନ ହେବା ସହ ଛୋଟଛୋଟ ଦୁର୍ଘଟଣା ହେଉଥିବାର ମଧ୍ୟ ଲୋକେ ଅଭିଯୋଗ କରିଛନ୍ତି l ନିର୍ମାଣ କରିବାର କିଛି ମାସ ମଧ୍ୟରେ ପୋଲ ଦବିଯିବା ତଥା କ୍ରେକ୍ ହୋଇଯିବା ଘଟଣା ସ୍ପଷ୍ଟ କରୁଛି ଯେ, ଏଠାରେ କେତେ ନିମ୍ନମାନର ନିର୍ମାଣ କାର୍ଯ୍ୟ ହୋଇଥିବ l ଆମ୍ଭେ ଏ ବିଷୟରେ ବିଭାଗୀୟ ଯନ୍ତ୍ରୀଙ୍କ କାର୍ଯ୍ୟାଳୟକୁ ଯାଇ ଭେଟିବାକୁ ଚେଷ୍ଟା କରିଥିଲୁ ହେଲେ କାର୍ଯ୍ୟାଳୟ ଠାରେ ଯନ୍ତ୍ରୀଙ୍କ ଦେଖାନାହିଁ l ପରେ ଫୋନ୍ ଯୋଗେ ଯୋଗାଯୋଗ କରିଥିଲୁ l କିଛି ଦିନ ଭିତରେ ମରାମତି କରାଯିବ ବୋଲି ସଫେଇ ଦେଇଛନ୍ତି ଯନ୍ତ୍ରୀ ମହାଶୟ l ପରେ ଠିକାଦାରଙ୍କୁ ଯୋଗାଯୋଗ କରିଥିଲୁ l ଠିକାଦାର ଆସନ୍ତାକାଲି ଏହାର କାମ କରାଯିବ ବୋଲି ସେ କହିଲେ l ଏ ବିଷୟରେ ଅବଗତ ହେବା ପାଇଁ ଏସଡିଓ ଙ୍କୁ ଫୋନ ଜରିଆରେ ଯୋଗାଯୋଗ କରାଯାଇଥିଲେ ହେଁ  ସେ ଫୋନ କଲ ଗ୍ରହଣ କରି ନ ଥିଲେ l ସମସ୍ତଙ୍କ ସହିତ ଯୋଗାଯୋଗ କଳା ପରେ ସ୍ପଷ୍ଟ ଭାବରେ ଜଣାପଡ଼ୁଛି ଯେ ଠିକାଦାର ଓ ବିଭାଗୀୟ ଅଧିକାରୀଙ୍କ ମଧୁଚନ୍ଦ୍ରିକାରେ ଏପରି କାମ କରାଯାଇଛି l ଏ ଦିଗରେ ତଦନ୍ତ କରାଯାଇ ଦୃଢ଼ କାର୍ଯ୍ୟାନୁଷ୍ଠାନ ନେବାର ଆବଶ୍ୟକ ବୋଲି ଲୋକେ ଅଭିଯୋଗ କରିଛନ୍ତି l