05-Jul-2024

ନୂଆପଡ଼ା (ରାମନାଥ ପଣ୍ଡା )
ଭାରତ ସରକାରଙ୍କ ନୀତି ଆୟୋଗ ଦ୍ୱାରା ପରିଚାଳିତ ସମ୍ପୂର୍ଣ୍ଣତା ଅଭିଯାନ ଆଜି ଜିଲ୍ଲାର ବୋଡ଼େନ ବିଜୁ ପଟ୍ଟନାୟକ +୨ ମହାବିଦ୍ୟାଳୟ ଓ  କୋମନା ବ୍ଲକର ସୁନାବେଡା ପଞ୍ଚାୟତର ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରରେ ଆୟୋଜିତ ହୋଇଯାଇଛି । ସମ୍ପୂର୍ଣ୍ଣତା ଅଭିଯାନରେ ସ୍ୱାସ୍ଥ୍ୟ, ଶିକ୍ଷା, କୃଷି, ପୋଷଣ ଓ ସାମାଜିକ ବିକାଶ କ୍ଷେତ୍ରରେ ଥିବା ୬ ଗୋଟି ନିର୍ଦେଶାଙ୍କ କୁ ଜୁଲାଇ ରୁ ସେପ୍ଟମ୍ବର ମଧ୍ୟରେ ଯୁଦ୍ଧ କାଳୀନ ଭିତ୍ତିରେ ପୂର୍ଣ୍ଣତା ଆଣିବାର ଏହା ଏକ ଚେଷ୍ଟା । ଏହି ଉଦ୍ଦେଶ୍ୟ ମୂଳକ ପ୍ରୟାସକୁ ସଫଳ କରିବା ପାଇଁ ଉଭୟ ଶିବିର ରେ ମଧୁମେୟ, ମ୍ୟାଲେରିଆ, ରକ୍ତଚାପ,ଶିକିଲ୍ ସେଲ ଓ ହାଇପରଟେନସନର ନିଶୁଲ୍କ ପରୀକ୍ଷା ତଥା ଚିକିତ୍ସା ଏବଂ ଔଷଧ ବଣ୍ଟନ କରାଯାଇଥିଲା | ବୋଡ଼େନ ଶିବିରରେ ଜିଲ୍ଲାପାଳ ହେମ କାନ୍ତ ସାଏ,ବିଧାୟକ ଅଧିରାଜ ମୋହନ ପାଣିଗ୍ରାହି,ବି ଡି ଓ ପ୍ରିୟରଞ୍ଜନ କୁମାର, ବ୍ଲକ ଅଧ୍ୟକ୍ଷା ପ୍ରେମ ଶିଳା ନାଗ,ନୀତି ଆୟୋଗ ଅଧିକାରୀ ସୁରେନ୍ଦ୍ର ବେହେରା,ଜିଲ୍ଲାପରିଷଦ  ସ୍ମୃତି ମାଝୀ,ଉପାଧ୍ୟକ୍ଷା ସଙ୍ଗୀତା ମାଝୀ , ଏମ ଓ ଡ଼ା ସଞ୍ଜୀବ କୁମାର ନାଏକ,ବି ଇ ଓ ରୁଦ୍ରେଶ୍ଵର ମେହେର,ସି ଡି ପି ଓ ମୀନା ଅଗ୍ରୱାଲ ,ଜି ପି ଇ ଓ ପ୍ରଫୁଲ୍ଲ କୁମାର ନାଏକ,କୃଷି ଅଧିକାରୀ ଦୁଃଖୀ ରାମ ଟୁଡୁ ,କଲେଜର ଅଧ୍ୟାପକ ଅଧ୍ୟାପିକା ଏବଂ ବହୁ ସଂଖ୍ୟାରେ ଅନ୍ୟାନ୍ୟ କର୍ମଚାରୀ ସମେତ ଲୋକପ୍ରତିନିଧି,ଜନସାଧାରଣ,ଛାତ୍ର ଛାତ୍ରୀ ଉପସ୍ଥିତ ଥିଲେ ।ଅଧ୍ୟାପକ ଗୟାଧର ମହାନ୍ତି ସ୍ବାଗତ ସମ୍ଭାଷଣ ରଖିଥିଲେ ଓ ଇଂରାଜୀ ଅଧ୍ୟାପକ ସାମୁଏଲ ଦାନୀ ମଞ୍ଚ ପରିଚାଳନା କରିଥିଲେ ।ଠିକ୍ ସେହିଭଳି ସୁନାବେଡା ଶିବିରରେ ଚୁକୁଟିଆ ଭୁଞ୍ଜିଆ ସମ୍ପ୍ରଦାୟର ବହୁ ସଂଖ୍ୟାରେ ଯୋଗ ଦାନ କରି ନିଜର ସ୍ୱାସ୍ଥ୍ୟ ସଚେତନତା ମନୋଭାବ ପ୍ରକାଶ  କରିଥିଲେ | ଶିବିରରେ  ଡଃ ପ୍ରଦୀପ କହଁର,ଡଃ ମନୀଷ ଠାକୁର ଶ୍ରୀମତୀ ନିରୁପମା ଶବର ହେଲ୍ଥ ଏକ୍ସଟେନଶନ ଅଫିସର, ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର କୋମନା ଏବଂ ସୁନାବେଡା ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ର ର ସଦସ୍ୟ ଡଃ ସ୍ୱସ୍ତିକ ପୁରୋହିତ,ଆୟୁଷ ଅଧିକାରୀ ପିଙ୍କି ଭୋଇ,ଦେବ ଦୁଲ୍ଲଭ ସିଂ ଶିବିରକୁ ପରିଚାଳନା କରିଥିଲେ  | ଉକ୍ତ ଶିବିର ରେ ନୀତି ଆୟୋଗ ଦ୍ୱାରା ବିକାଶ ସହଯୋଗୀ ଭାବେ କାର୍ଯ୍ୟ କରୁଥିବା ପିରାମଲ ଫାଉଣ୍ଡେସନ ତରଫରୁ ଜ଼ିଲ୍ଲା କାର୍ଯ୍ୟକ୍ରମ ପରିଚାଳକ ଶ୍ରୀ ଭବାନି ଶଙ୍କର ନାୟକ ଓ ଦିଲ୍ଲୀରୁ ଗାନ୍ଧୀ ଫେଲୋ ଶ୍ରାବଣ ପାଶ୍ବାନ ଶିବିର ପରିଚାଳନା ରେ ସହଯୋଗ କରିଥିବା ବେଳେ ବୋଡ଼େନ ଠାରେ ସୁରଜ ତିୱାରୀ ସହଯୋଗ କରିଥିଲେ | ଏହି ଶିବିରରେ ଗର୍ଭବତୀ ମହିଳା, ଶିଶୁ, ବୃଦ୍ଧ, ଯୁବ ପିଢ଼ି ତଥା ସମସ୍ତ ବୟସ୍କ  ବର୍ଗର ଲୋକ ଉତ୍ସାହର ସହିତ ଶୃଙ୍ଖଳିତ ଭାବରେ ଶିବିରକୁ ଆସି ନିଜ ରୋଗ ଚିହ୍ନଟ ତଥା ନିଦାନ କରି ଖୁସି ମନରେ ଫେରିଥିବା ଦୃଷ୍ଟିକୁ ଆସିଛି ।