04-Jul-2024

ବାଲାଙ୍ଗୀର(ପ୍ରେରଣା ଖବର ): ବଲାଙ୍ଗୀର ଜିଲ୍ଲା ଦେଓଗାଁ ବ୍ଲକ ଅର୍ଜୁନପୁର ଶିବମନ୍ଦିର ପ୍ରାଙ୍ଗଣରେ ମେଗାଲିଫ୍ଟ ପଏଣ୍ଟରେ ଉପକୃତ ହେଉଥିବା ଚାଷୀଙ୍କର ଏକ ବୈଠକ ଅନୁଷ୍ଠିତ ହୋଇଯାଇଛି । ଚାଷୀନେତା ଲକ୍ଷ୍ମଣକୁମାର ମେହେର ଏଥିରେ ଯୋଗଦେଇ ଚାଷୀଙ୍କ ସମସ୍ୟାଗୁଡିକ ବିଷୟରେ ଆଲୋଚନା କରିଛନ୍ତି । ଗତ ଏକମାସ ପୂର୍ବରୁ କେନ୍ଦଘାଟ ମେଗାଲିଫ୍ଟ ପଏଣ୍ଟକୁ ଯାଇଥିବା ୩ଫେଜ ଲାଇନର ତାର ଚୋରୀ ହୋଇଯାଇଥିଲା । ବରାହକନାଠାରୁ ଅର୍ଜୁନପୁର ପର୍ଯ୍ୟନ୍ତ ପ୍ରାୟ ୧କିମି ବିତ୍ୟୁତତାର ଚୋରୀ ହୋଇଥିବାରୁ ମେଗାଲିଫ୍ଟ ପଏଣ୍ଟ ଚାଲିପାରୁନଥିବାରୁ ଚାଷିମାନେ ପାଣି ନପାଇ ଚାଷିକାମ ଆରମ୍ଭ କରିପାରିନଥିଲେ । ଚାଷିନେତା ଲକ୍ଷ୍ମଣ ମେହେର ରାଜ୍ୟସରକାରଙ୍କ ଉପରିସ୍ଥ ଅଧିକାରୀମାନଙ୍କୁ ଜଣାଇଲା ପରେ ବିଦ୍ୟୁତବିଭାଗ ସେଠାରେ ନୂଆତାର ଲଗାଉଛି । ଆସନ୍ତା ଦୁଇଦିନ ଭିତରେ ବିଦ୍ୟୁତତାର ଲାଗି ମେଗାଲିଫ୍ଟ ପଏଣ୍ଟ କାର୍ଯ୍ୟକ୍ଷମ ହେବ ବୋଲି ବଲାଙ୍ଗୀର ଅଧିକ୍ଷଣଯନ୍ତ୍ରୀ କହିଛନ୍ତି । ତେବେ ଆସନ୍ତାଦିନରେ ମେଗାଲିଫ୍ଟ ପଏଣ୍ଟରେ ଲାଭାନ୍ୱିତ ହେଉଥିବା ଚାଷିଙ୍କୁ ନେଇ ପାଣିପଞ୍ଚାୟତ ଗଠନକରିବା,ମେଗାଲିଫ୍ଟ ପଏଣ୍ଟରେ ମାଇକ୍ରୋ ଲେଭେଲରେ ୧ହେକ୍ଟର ଜମିରେ ଗୋଟିଏ ପଏଣ୍ଟ ଲଗାଇବାର ଯୋଜନାକୁ କାର୍ଯ୍ୟକାରୀ କରିବାକୁ ରାଜ୍ୟସରକାରଙ୍କୁ ଅବଗତ କରିବାକୁ ପ୍ରସ୍ତାବ କରାଯାଇଥିଲା । 
    ସୂଚନାଯୋଗ୍ୟ ଯେ,ବଲାଙ୍ଗୀର ଜିଲ୍ଲାର ଦେଓଗାଁ, ଗୁଡଭେଲା ଓ ସୋନପୁର ଜିଲ୍ଲାର ଚାଷିଙ୍କ ଜମିକୁ ଜଳସେଚିତ କରିବାକୁ ରାଜ୍ୟସରକାର ତେଲନଦୀରୁ ମେଗାଲିଫ୍ଟ ପଏଣ୍ଟ କରିଛନ୍ତି । କୋଟି କୋଟି ଟଙ୍କା ଖର୍ଚ୍ଚ କରାଯାଇ ନିର୍ମାଣ କରାଯାଇଥିବା ଏହି ମେଗାଲିଫ୍ଟପଏଣ୍ଟ ଗୁଡିକ ଠିକରେ ଚାଲୁନାହିଁ । ତେଲନଦୀ କୂଳରେ କେନ୍ଦ ଘାଟରେ ଥିବା ଏହି ମେଗାଲିଫ୍ଟ ପଏଣ୍ଟରୁ ବଲାଙ୍ଗୀର ଜିଲ୍ଲାର ଦେଓଗାଁ ବ୍ଲକର କୁଲିତାପଡା, ଅର୍ଜୁନପୁର, ଗୁଡଖାପଲା, ଗୌରଗୋଠ, ବଡବାହାଲ ପଞ୍ଚାୟତ, ଗୁଡଭେଲା ବ୍ଲକର ରୁଷୁଡା ଓ ଚିଞ୍ଚେଡ ପଞ୍ଚାୟତ ଏବଂ ସୋନପୁର ଜିଲ୍ଲା ତରଭା ବ୍ଲକର ଚାରଭଟା ଓ ବାଲିଖମାର ପଞ୍ଚାୟତର ଗ୍ରାମଗୁଡିକର ୧୫୦୦ ହେକ୍ଟର ଜମିକୁ ଜଳସେଚିତ କରାଯିବାର ଲକ୍ଷ୍ୟ ରହିଛି । ମେଗାଲିଫ୍ଟ ବିଭାଗ ପକ୍ଷରୁ ଏହାର କାମସାରି ଗତ ୨୦୧୯ମସିହାରେ ଖରିଫ ଓ ରବିରେ ଚାଷିଙ୍କ ଜମିକୁ ଜଳସେଚିତ କରାଯାଇଥିଲା । କିନ୍ତୁ ପରବର୍ତ୍ତି ବର୍ଷରେ ତେଲନଦୀରେ ଜଳସମସ୍ୟା ଦେଖା ଦେବାକୁ ଆଉ ଚାଷିଙ୍କୁ ଠିକରେ ପାଣି ଦିଆଗଲା ନାହିଁ । ଏବେ ମାତ୍ର ୫୦ % ଜମିକୁ ଜଳସେଚିତ ହୋଇପାରୁଥିବା ଚାଷିମାନେ କହିଛନ୍ତି । ତେଣୁ ଏହାକୁ ସଂପୂର୍ଣ୍ଣ କାର୍ଯ୍ୟକ୍ଷମ କରିବାକୁ ରାଜ୍ୟସରକାର ମାଇକ୍ରୋପଏଣ୍ଟ କାମ କରାଇବାକୁ ପ୍ରାୟ ୮୦୦ କୋଟି ଟଙ୍କା ମଞ୍ଜୁର କରିଥିଲେ । କିନ୍ତୁ ଏପର୍ଯ୍ୟନ୍ତ ତାହା କାମ ଆରମ୍ଭ ହୋଇନାହିଁ । ଏହାକୁ ତୁରନ୍ତ କାର୍ଯ୍ୟକ୍ଷମ କରିବାକୁ ଚାଷିମାନେ ଦାବି କରିଛନ୍ତି । ଆଜିର ଏହି ଚାଷୀ ବୈଠକରେ ଚାରଭଟା, ବାଲିଖମାର, ଅଈଂଲାପାଲି, କର୍ଲାମୁହାନ, ଅର୍ଜୁନପୁର,ଗୌରଗୋଠ,ବ୍ରାହ୍ମଣୀପଲା ଇତ୍ୟାଦି ଗ୍ରାମର ଭୋଜରାଜ ରଣା,ଭୋଜରାଜ ତ୍ରୀପାଠୀ,ଜପ ଛତ୍ରୀଆ, ଭାଗବତ ସାହୁ,ମୁଜାଫର ରଣା,ସେନାପତି ରଣା, ସାଧୁ ଦାସ,ଗୋପିନାଥ ନାଗ,ଅଲେଖ ବିଶ୍ୱାଳ,ଶଶି ସାହୁ,ସୁଭାଷ ହେର୍ଣ୍ଣାଙ୍କ ନେତୃତ୍ୱରେ ଚାଷିମାନେ ଯୋଗଦେଇଥିଲେ ।