22-Jun-2024

ବଲାଙ୍ଗୀର(ପ୍ରେରଣା ଖବର):-ଆଜି ବଲାଙ୍ଗୀର ଜିଲ୍ଲା ଗସ୍ତରେ ରାଜ୍ୟ ସ୍ୱାସ୍ଥ୍ୟ,ପରିବାର କଲ୍ୟାଣ, ସଂସଦୀୟ ବ୍ୟାପାର ଓ ସୂଚନା ବୈଷୟିକ ବିଭାଗର ମନ୍ତ୍ରୀ ଡ.ମୁକେଶ ମହାଲିଙ୍ଗ ଆସି ସ୍ଥାନୀୟ ଡିଆରଡିଏ ସମ୍ମିଳନୀ କକ୍ଷରେ ସ୍ୱାସ୍ଥ୍ୟବିଭାଗର ସମୀକ୍ଷା କରିଛନ୍ତି । ସ୍ୱାସ୍ଥ୍ୟମନ୍ତ୍ରୀ ଡ.ମହାଲିଙ୍ଗଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ସମୀକ୍ଷା ବୈଠକରେ ଟିଟିଲାଗଡ ବିଧାୟକ ନବୀନ ଜୈନ, କଣ୍ଟାବାଞ୍ଜି ବିଧାୟକ ଲକ୍ଷ୍ମଣ ବାଘ, ଅତିରିକ୍ତ ଜିଲ୍ଲାପାଳ ଡ.ବିଜୟକୁମାର ସେଠୀ, ଜିଲ୍ଲାଉନ୍ନୟନ ଅଧିକାରୀ ପ୍ରଭାତକୁମାର ମହାପାତ୍ର, ଜିଲ୍ଲା ମୁଖ୍ୟଚିକିତ୍ସାଧିକାରୀ ଡ.ପ୍ରଦୀପକୁମାର ଗୁରୁ, ଭୀମଭୋଇ ମେଡିକାଲ କଲେଜର ଡିନ ପ୍ରଫେସର ଡ.ସ୍ୱୟଂପ୍ରଭା ପ୍ରଧାନ, ଅଧିକ୍ଷିକା ଡ.ମାନସୀ ପଣ୍ଡା, ଟିଟିଲାଗଡ,ପାଟଣାଗଡ ଓ କଣ୍ଟାବାଞ୍ଜିର ଉପଖଣ୍ଡ ସ୍ତରୀୟ ହସପିଟାଲର ଏସଡିଏମଓ, ସମସ୍ତ ସିଏଚସି/ପିଏସି ମାନଙ୍କର ଅଧିକାରୀଗଣ, ଏନଏଚଏମର ଅଧିକାରୀଗଣ ଯୋଗଦେଇଥିଲେ। ସମୀକ୍ଷା ବେଳେ ଜିଲ୍ଲାରେ ମୋଟ ଡାକ୍ତରପଦବୀରୁ ମାତ୍ର ୫୦% ଡାକ୍ତର ଥିବା, ଅନେକ ଡାକ୍ତର ବିନାଛୁଟିରେ ରହିଥିବା,ଅନେକ ଡାକ୍ତରଖାନାରେ ମେସିନ୍ ଗୁଡିକ ଅଚଳ ଥିବାରୁ ରକ୍ତପରୀକ୍ଷା, ଅପରେସନ ଇତ୍ୟାଦି ହୋଇପାରୁନଥିବା, ହସପିଟାଲ ଗୁଡିକର ଏକ୍ସରେ ମେସନ ସବୁ ଅଚଳ ଥିବା ଭଳି ବିଷୟ ନଜରକୁ ଆସିଥିଲା। ସ୍ୱାସ୍ଥ୍ୟବିଭାଗ ଭଳି ଏକ ଗୁରୁତ୍ୱପୂର୍ଣ୍ଣ ବିଭାଗରେ ଏତେ ପରିମାଣରେ ତୃଟିବିଚ୍ୟୁତି ଥିବାରୁ ମନ୍ତ୍ରୀ ମହାଲିଙ୍ଗ ହତବାକ ହୋଇଯାଇ ଥିଲେ। ଉପସ୍ଥିତ ଥିବା ସମସ୍ତ ପିଏସି, ସିଏଚସି ଓ ଜିଲ୍ଲାସ୍ତରୀୟ ଡାକ୍ତରଖାନା ର ସମସ୍ୟା ଲିଖିତ ଭାବରେ ରିପୋର୍ଟ ଦେବାକୁ ମନ୍ତ୍ରୀ ନିର୍ଦ୍ଦେଶ କରିବା ସହିତ ଲୋକଙ୍କୁ ଠିକସମୟରେ ଓ ଉଚିତ ଆକାରରେ ସ୍ୱାସ୍ଥ୍ୟ ଯୋଗାଇ ଦେବାରେ ସରକାରଙ୍କୁ ଅଧିକାରୀମାନେ ସହ ଯୋଗ କରିବେ ବୋଲି ଅନୁରୋଧ କରିଥିଲେ। ତେବେ ଭୀମଭୋଇ ମେଡିକାଲ କଲେଜ ହସପିଟାଲରେ ନୂତନ ବିଲଡିଂ ନିର୍ମାଣ ସରିଥିଲେ ହେଁ ତାହା କାର୍ଯ୍ୟକ୍ଷମ ହେବାକୁ ଆଉ ୬ମାସ ସମୟ ଲାଗିବ ବୋଲି ଅଧିକ୍ଷିକା ସୂଚନା ଦେଇଥିଲେ । ସେଠାରେ ପେଥୋଲୋଜିରେ ମେସିନ ଲାଗିନଥିବା,ଓଟି କାର୍ଯ୍ୟକ୍ଷମ ନହେବା ଓ ଅହୁରି ଅନେକ ସମସ୍ୟା ଥିବାରୁ ଏହାକୁ ସ୍ୱୟଂସଂପୂର୍ଣ୍ଣ କାର୍ଯ୍ୟକ୍ଷକ କରିବାକୁ ଆହୁରି ଅଧିକ ସମୟ ଲାଗିବ ବୋଲି ଡ.ମାନସୀ ପଣ୍ଡା କହିଥିଲେ । ଠିକ ସେହିପରି ଜିଲ୍ଲା ହସପିଟାଲରେ ଚାଲିଥିବା ମେଡିକାଲ କଲେଜ ହସପିଟାଲରେ କୋଭିଡ ସମୟରେ ଲାଗିଥିବା ଅକ୍ସିଜେନ ବ୍ୟାଙ୍କ ଗତ ଦୁଇବର୍ଷ ହେଲା ଅଚଳ ପଡିଥିବା,ସବଡିଭିଜନମାନଙ୍କରେ ଥିବା ଏକ୍ସରେ ମେସିନ,ସିବିସି ପରୀକ୍ଷା ମେସିନ ଓ ଅନାଲାଇଜର ଅଚଳ ହୋଇ ପଡିରହିଥିବାରୁ ଏହାକୁ ସଜାଡିବାକୁ ସରକାରଙ୍କଠାରୁ ଠିକା ନେଇଥିବା କେଟିପିଏଲ କମ୍ପାନୀର ଇଞ୍ଜିନିୟରଙ୍‌ୁ ଡାକି ତାଗିଦ କରିଥିଲେ । ଆସନ୍ତା ୭ଦିନ ମଧ୍ୟରେ ଯଦି ମେସିନ ଗୁଡିକ ସଜଡାନଯାଏ ତାହେଲେ କମ୍ପାନୀ ଉପରେ ଦୃଢ କାର୍ଯ୍ୟାନୁଷ୍ଠାନ ନେବାକୁ ମନ୍ତ୍ରୀ ନିର୍ଦ୍ଦେଶ କରିଥିଲେ। ଜିଲ୍ଲାର ସ୍ୱାସ୍ଥ୍ୟସମସ୍ୟାକୁ ନେଇ ବିଭାଗୀୟ ଅଧିକାସରୀମାନେ ତାଙ୍କର ରିପୋର୍ଟ ଦେଲାପରେ ସ୍ୱାସ୍ଥ୍ୟବିଭାଗରେ ଥିବା ତୃଟିବିଚ୍ୟୁତିକୁ ସୁଧାରିବୁ ଓ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ଆଗାମୀ ୧୦୦ ଦିନର ଖସଡା ପ୍ରସ୍ତୁତ ହୋଇ ଲୋକଙ୍କୁ ଉଚିତ ସ୍ୱାସ୍ଥ୍ୟସେବା ଉପଲବ୍ଧ କରାଯିବ ବୋଲି ମନ୍ତ୍ରୀ ଡ.ମହାଲିଙ୍ଗ ଗଣମାଧ୍ୟମକୁ କହିଥିଲେ ।