22-Jun-2024

ବିନିକା(ହିମାଂଶୁ ଶେଖର ପୁଟେଲ): ସୋନପୁର-ବିନିକା-ଡୁଙ୍ଗୁରିପାଲି ଏମଡିଆର -୩୯ ନଂ ରାଜ୍ୟ ରାଜପଥର ଉନ୍ନତିକରଣ ପାଇଁ ତତ୍କାଳୀନ ନବୀନ ସରକାର ଗତ ୨୦୨୨ବର୍ଷରେ ପର୍ଯ୍ୟାପ୍ତ ପରିମାଣର ଅର୍ଥ ମଞ୍ଜୁର କରିଥିଲେ ।ଗତ ୨୦୨୩ ଆର୍ଥିକ ବର୍ଷରୁ ଉକ୍ତ ରାସ୍ତା କାମ ଆରମ୍ଭ ହେଲା ହେଲେ ବିନିକା ସହର ଦେଇ ଯାଇଥିବା ମୁଖ୍ୟରାସ୍ତାକୁ ଡିଭାଇଡର ଯୁକ୍ତ କରିବା ପାଇଁ ଅଞ୍ଚଳବାସୀଙ୍କ ତରଫରୁ ଦାବି ହେବାପରେ କାମ ପ୍ରକ୍ରିୟା କିଛି ଦିନ ବିଳମ୍ବ ହୋଇଥିଲେ ମଧ୍ୟ ପ୍ରଶାସନ ତରଫରୁ ଯୁଦ୍ଧକାଳୀନ ଭିତିରେ ରାସ୍ତାର ଉଭୟ ପାର୍ଶ୍ବରୁ ଜବର ଦଖଲ ଉଚ୍ଛେଦ କରାଯାଇ ଡ୍ରେନ ନିର୍ମାଣ କରାଗଲା ତଥାପି ବି ତାହା ଅଦ୍ୟାବଧି ସମ୍ପୁର୍ଣ୍ଣ ହୋଇ ପାରିନାହିଁ । ବର୍ତମାନ ରାସ୍ତାର ଅବସ୍ଥା ଆହୁରି ସାଂଘାତିକ ହୋଇ ପଡ଼ିଛି। ଲୋକଙ୍କ ପାଇଁ ମରଣ ଯନ୍ତା ସାଜିଛି ବିନିକା ସହର ମୁଖ୍ୟ ରାସ୍ତା । ପ୍ରତିଦିନ ଏହି ରାସ୍ତାଦେଇ ସହ ସହ ସଂଖ୍ୟାରେ ବିଭିନ୍ନ ପ୍ରକାରର ଯାନବାହାନ ଚଳାଚଳ କରୁଥିବାରୁ ସାମାନ୍ୟ ବର୍ଷାରେ ସଙ୍କୁଚିତ ଏହି ରାସ୍ତାର ବିଭିନ୍ନ ସ୍ଥାନରେ ବିରାଟ ବିରାଟ ଗର୍ତ୍ତ ସୃଷ୍ଟି କରିଥିବା ରାସ୍ତା ଲୋକଙ୍କ ପାଇଁ ବିପଦ ସାଜିଛି। ରାସ୍ତା ସାରା ଖାଳଖମାରେ ପାଣି ଜମି ପୋଖରୀ ସଦୃଶ ହେଉଛି । ରାସ୍ତାର ନବୀକରଣ କାର୍ଯ୍ୟକୁ ଅଞ୍ଚଳବାସୀଙ୍କ ତରଫରୁ ସୋସିଆଲ ମିଡିଆରେ ପ୍ରଚାର ପ୍ରସାର ଏବଂ ବିଭାଗୀୟ ଅଧିକାରୀଙ୍କୁ ଅଭିଯୋଗ କରି ଆସୁଥିଲେ ମଧ୍ୟ କେହି କର୍ଣ୍ଣପାତ କରୁନାହାନ୍ତି । ବର୍ତମାନ ରାଜ୍ୟରେ ନୂଆଁ ସରକାରଙ୍କ ଶାସନ ଆରମ୍ଭ ହୋଇଛି । ବୀରମହାରାଜପୁର ବିଧାନସଭା ନିର୍ବାଚନ ମଣ୍ଡଳୀରେ ମଧ୍ୟ ନୂଆଁ ବିଧାୟକ ଭାବେ ବିଜେପିର ରଘୁନାଥ ଜଗଦଲା ନିର୍ବାଚିତ ହୋଇଛନ୍ତି ।ରାସ୍ତାର ଅବସ୍ଥା ସମ୍ପର୍କରେ ଅଞ୍ଚଳବାସୀଙ୍କ ଠାରୁ ଅଭିଯୋଗ ଶୁଣିବା ଓ ନିଜେ ରାସ୍ତାର ସମସ୍ୟାର ସମାଧାନ ନେଇ ନୂତନ ବିଧାୟକ ଶ୍ରୀ ଜଗଦଲା ଆଜି ସୋନପୁର ସ୍ଥିତ ସର୍କିଟ ଭଭନ ଠାରେ ବିଭିନ୍ନ ବିଭାଗର ଅଧିକାରୀ ମାନଙ୍କୁ ଡାକି ଗୁରୁତ୍ତ୍ୱପୂର୍ଣ୍ଣ ବୈଠକ କରି ଆଲୋଚନା କରିଥିଲେ । ବିଧାୟକ ଶ୍ରୀ ଜଗଦଳା ପ୍ରଥମେ ରାସ୍ତାର ସମସ୍ୟାର ଅଗ୍ରଗତି ସମ୍ପର୍କରେ ବିଭାଗୀୟ ଅଧିକାରୀଙ୍କୁ ତନ୍ନତନ୍ନ କରି ପଚାରି ବୁଝିଥିଲେ। ସଂପୃକ୍ତ ବିଭାଗୀୟ ଅଧିକାରୀ ଓ ଠିକାଦାର ରାସ୍ତାର ଗୋଟିଏ ପାଖକୁ ଯୁଦ୍ଧକାଳୀନ ଭିତିରେ ସଜଡ଼ା ଯିବ ବୋଲି ଉତ୍ତର ଦେଇଥିଲେ । ସେହିପରି ଡ୍ରେନ ପାର୍ଶ୍ବରେ ବିଦ୍ୟୁତ ଖମ୍ବ ପୋତିବା କାମ ଶୀଘ୍ର ସମ୍ପୁର୍ଣ୍ଣ କରାଯାଇ ବିଦ୍ୟୁତ ଚାର୍ଜ କରାଯିବ ବୋଲି ବିଦ୍ୟୁତ ବିଭାଗ ଅଧିକାରୀ ବିଧାୟକଙ୍କୁ ଉତ୍ତର ଦେଇଥିଲେ ।ଅନ୍ୟପକ୍ଷରେ ବର୍ତମାନ ସଙ୍କୁଚିତ ରାସ୍ତା ପରିସୀମା ଭିତରେ ଯାଇଥିବା ଜଳଯୋଗାଣ ପାଇପକୁ ଡ୍ରେନ ପାର୍ଶ୍ବରେ ସ୍ଥାନାନ୍ତରିତ କରିବା ପାଇଁ ନୂତନ ଟେଣ୍ଡର ମାଧ୍ୟମରେ କରାଯିବ ତେଣୁ ଏହି କାମ ତ୍ଵରାନିତ ପାଇଁ ୨ମାସ ଲାଗିବ ବୋଲି ଜଳଯୋଗାଣ ବିଭାଗ ଅଧିକାରୀ କହିଥିଲେ । ତେବେ ଯାହା ବି ହେଉ ମରଣଯନ୍ତା ସାଜିଥିବା ବିନିକା ସହର ମୁଖ୍ୟରାସ୍ତା ଅବସ୍ଥାକୁ ତୁରନ୍ତ ସମାଧାନ କରିବାକୁ ବିଭାଗୀୟ ଅଧିକାରୀଙ୍କୁ ତାଗିଦ କରିଥିଲେ ବିଧାୟକ । ଅନ୍ୟ ପକ୍ଷରେ ବିନିକା ରଥ ଯାତ୍ରା ପାଇଁ ଜଗନ୍ନାଥ, ବଳଭଦ୍ର, ସୁଭଦ୍ରାଙ୍କ ନୂତନ ରଥ ନିର୍ମାଣ ନେଇ ଗଛର ଆବଶ୍ୟକତା ଥିବାରୁ ଆଜି ରଥଯାତ୍ରା ପରିଚାଳନା କମିଟି

ତରଫରୁ ଭୁବନେଶ୍ୱର ପାତ୍ର, ସର୍ଜନ ପଣ୍ଡା ଓ ନାରାୟଣ ପାଢ଼ୀ ବିଧାୟକଙ୍କୁ ଭେଟିଥିଲେ । ବିଧାୟକ ଏ ଦିଗରେ ପଦକ୍ଷେପ ନେବେ ବୋଲି ପ୍ରତିଶ୍ରୁତି ଦେଇଥିଲେ। ଅନୁଷ୍ଟିତ ଏହି ବୈଠକରେ ବିଜେପି ଜିଲ୍ଲା ଉପସଭାପତି ଅଶୋକ ପୃଷ୍ଟି, ବିଜେପି ନେତା ବାବୁଲୁ ବିଶି, ସୁମନ୍ତ ଜଗଦଲା ଯୁବ ସଂଗଠକ ଜନାର୍ଦ୍ଦନ ଖମାରୀ, ଆକାଶ ନାଏକ ପୂର୍ତ୍ତ, ଜଳଯୋଗାଣ, ବିଦ୍ୟୁତ ବିଭାଗୀୟ ଯନ୍ତ୍ରୀ, ରାସ୍ତା ନିର୍ମାଣସଂସ୍ଥା କର୍ମଚାରୀ, ବିନିକା ଏନଏସି କାର୍ଯ୍ୟନିର୍ବାହୀ ଅଧିକାରୀଙ୍କ ସମେତ ବିଭିନ୍ନ ବିଭାଗର ଅଧିକାରୀ ଉପସ୍ଥିତ ଥିଲେ।