13-Jun-2024

ବଲାଙ୍ଗୀର(ଅନ୍ତର୍ଯ୍ୟାମୀ ସାହୁ) ବଲାଙ୍ଗିର ସଦର ଥାନା ଅନ୍ତର୍ଗତ ଚୁଡାପାଲି ଗ୍ରାମର କାଲୁ ଉରଫ୍ ବିରେନ ଦୀପ ଓ ଢୁଲୁସର ଗ୍ରାମର ଉମେଶ ରାୟ ଙ୍କୁ ବଲାଙ୍ଗିର ସହକାରୀ ସେସନ୍ ଜଜ୍ ଓ ବରିଷ୍ଠ ସିଭିଲ ଜଜ୍ (ଏଲ୍‌ଆର ଏଣ୍ଡ ଏଲ୍‌.ଟି.ଭି) ଜନ୍ମଜୟ ପଲେଇ ଏକ ଡକାୟତି ମାମଲା ର ଶୁଣାଣି କରି (ସେସନସ୍ କେସ ନଂ. ୩୮/୨୦୨୩) ରେ ଆଜି ଦୋଷୀ ସାବ୍ୟସ୍ତ କରିଛନ୍ତି । ଉଭୟ ଅଭିଯୁକ୍ତଙ୍କୁ ୫ ବର୍ଷ ଲେଖାଏଁ ସଶ୍ରମ କାରାଦଣ୍ଡ ସହ ୧ହଜାର ଟଙ୍କା ଲେଖାଏ ଜୋରିମାନା ନିର୍ଦ୍ଦେଶ କରିଛନ୍ତି । ଜରିମାନା ଅନାଦେୟ ହେଲେ ଅତିରିକ୍ତ ୬ ମାସ ଲେଖାଏଁ ଆହୁରି କାରାଦଣ୍ଡ ନିର୍ଦ୍ଦେଶ ଦେଇଛନ୍ତି ।

  ସୂଚନାରୁ ପ୍ରକାଶ ଯେ,  ଗତ ୨୦୨୩ ଜାନୁୟାରୀ ୧୪ ତାରିଖରେ ଅଭିଯୋଗକାରୀ/ପୀଡିତ ହେମସାଗର ପଟେଲ ନିଜ ପରିବାର, ଭାଇ ଓ ବୋହୁ ମିଶି ଏକ କାର୍ ଯୋଗେ ତାଙ୍କ ନିଜ ଗ୍ରାମ ସାନତେଲେନପାଲିରୁ ଚୁଡାପାଲିକୁ ଆସୁଥିଲେ l ଏତିକି ବେଳେ ଦୁଇ ଅଭିଯୁକ୍ତ ବୀରେନ ଦୀପ ଓ ଉମେଶ ରାୟ ଚୁଡାପାଲି ନିକଟସ୍ଥ ରାଜରାସ୍ତାରେ ଠେଙ୍ଗା ଆଦି ମାରଣାସ୍ତ୍ର ଧରି ଅତର୍କିତ ଭାବେ ଆକ୍ରମଣ କରିବା ସହ ଗାଡିକୁ ଅଟକାଇ ଗାଡିର କାଚ ଭାଙ୍ଗି ଦେଇଥିଲେ । ସେମାନେ ହେମସାଗର ଓ ତାଙ୍କ ପରିବାରର ଅନ୍ୟ ସଦସ୍ୟ ମାନଙ୍କୁ ଭୟଭୀତ କରି ଟଙ୍କା ପଇସା ମଧ୍ଯ ଲୁଟ୍‌ପାଟ୍ କରିଥିଲେ । ଏହି ସମୟରେ ସ୍ଥାନୀୟ ଲୋକ ରୁଣ୍ଡ ହେବାରୁ ଅଭିଯୁକ୍ତମାନେ ଘଟଣାସ୍ଥଳରୁ ଫେରାର୍ ମାରିଥିଲେ । ସ୍ଥାନୀୟ ଲୋକଙ୍କ ସହାୟତାରେ ହେମସାଗର ପଟେଲ ଓ ତାଙ୍କ ପରିବାର ଜୀବନ ରକ୍ଷା କରି ବଲାଙ୍ଗିର ସଦର ଥାନାରେ ଲିଖିତ ଅଭିଯୋଗ କରିଥିଲେ । ସଦର ପୋଲିସ କେସ ନଂ.୨୪/୨୦୨୩ରେ ଏକ ମାମଲା ରୁଜୁ କରି ଦଫା ୩୯୭, ୩୪ ଆଇପିସି ରେ ଅଭିଯୁକ୍ତଙ୍କୁ ଗିରଫ୍ କରି କୋର୍ଟ ଚାଲାଣ କରିଥିଲେ । ଆଜି କୋର୍ଟ ଏହି ମାମାଲାର ଶୁଣାଣି କରି ନିଜ ରାୟ ଦେଇଛନ୍ତି l ଏହି ମାମଲାରେ ସରକାରଙ୍କ ପକ୍ଷରୁ ଏସୋସିଏଟ  ପିପି ବୈଷ୍ଣବ ସାହୁ ମକଦ୍ଦମା ପରିଚାଳନା କରିଥିଲେ ।