12-Jun-2024

ଡୁଙ୍ଗୁରିପାଲି(ଅରବିନ୍ଦ ମିଶ୍ର) ଭାରତୀୟ ଜନତା ପାର୍ଟୀ ବହୁମତ ନେଇ ସରକାର ଗଢିବା ସୁନିଶ୍ଚିତ ହେବା ପରେ ବିଜେଡି ପାଇଁ କାର୍ଯ୍ୟ କରିଆସୁଥିବା ମିଶନ ଶକ୍ତି ଏବେ ଚିନ୍ତାରେ । ମହିଳାମାନଙ୍କୁ ସ୍ୱାବଲମ୍ବୀ ନାଁରେ ସରକାରୀ ଦଳର ପ୍ରଚାର, ବିଭିନ୍ନ କାର୍ଯ୍ୟକ୍ରମରେ ଯୋଗ ଦେବା ଭଲି ଅନେକ ଅଭିଯୋଗ ରହିଥିଲା । କୌଣସି କାର୍ଯ୍ୟକ୍ରମରେ ମିଶନ ଶକ୍ତିର ମହିଳା ନ ଆସିଲେ କାର୍ଯ୍ୟକ୍ରମ ହେଉ ନଥିଲା । ପୁରୁଷ ଅପେକ୍ଷା ମିଶନ୍ତ ଶକ୍ତିର ଭିଆରପି, ଏମବିକେ, ବ୍ୟାଙ୍କ ମିତ୍ରମାନେ ନିର୍ବାଚନ ପୂର୍ବରୁ ନିଯୁକ୍ତି ପାଇ ଦଳର ପ୍ରଚାର ପ୍ରସାରରେ ଲାଗିପଡିଥିବା ବିଜେପି ଅଭିଯୋଗ ଆଣିଥିଲା । ସରକାରଙ୍କ ମିଶନ ଶକ୍ତି ବିଭାଗ ଏମାନଙ୍କ ଉପରେ ଆଶିର୍ବାଦ ରହିଥିବାରୁ ଅଭିଯୋଗକୁ ଭୃକ୍ଷେପ ନ କରି  ବିଭିନ୍ନ ସଭାସମିତି, ସଚେତନ କାର୍ଯ୍ୟକ୍ରମରେ ଯୋଗ ଦେଉଥିଲେ । ନିର୍ଦ୍ଧାରିତ ସମୟ ପୂର୍ବରୁ ଏମାନେ ସଭା ସ୍ଥଳରେ  ପହଞ୍ଚି ଝୋଟିକଟା, କଳସ ସ୍ଥାପନ, ଫୁଲମାଲ ପ୍ରସ୍ତୁତ, ଅତିଥିଙ୍କୁ ସ୍ୱାଗତ କରିବା ଦାୟିତ୍ୱ ତୁଳାଇ ଆସୁଥିଲେ । ସକାଳେ ହେଲେ ଘରକାମକୁ ପର କରି ପହଞ୍ଚି ଯାଉଥିଲେ  ମିଶନ ଶକ୍ତି କାର୍ଯ୍ୟାଳୟ, ବିଭିନ୍ନ ବ୍ୟାଙ୍କ , ସରକାରୀ ବେସରକାରୀ କାର୍ଯ୍ୟାଳୟ ଗୁଡିକରେ । ବିଭିନ୍ନ ବର୍ଗ ଅନୁସାରେ ଡ୍ରେସ

କୋଡ ସହିତ ସହରର ବିଭିନ୍ନ ମାର୍ଗରୁ ଆରମ୍ଭ କରି ଯେଉଁଠି ଦେଖିବ ସେମାନଙ୍କ ଉପସ୍ଥାନ ରହି ଆସୁଥିଲେ । ବିଜେଡି ହାରିବା ପରେ ମିଶନ ଶକ୍ତି କାର୍ଯ୍ୟାଳୟ ସେପରି ଆଗଭଳି ଆଉ ଭିଡ ଦେଖାଯାଉ ନାହିଁ । ଖାଁ ଖାଁ ଲାଗୁଛି କାର୍ଯ୍ୟାଳୟ । କେତେକ କର୍ମଚାରୀଙ୍କୁ ଛାଡି ଦେଲେ ଏମାନଙ୍କ ଦେଖା ନାହିଁ । ପ୍ରକୃତରେ ଏମାନଙ୍କ କାମ କଣ ରହିଥିଲା । ସରକାର ଏମାନଙ୍କୁ ନିଯୁକ୍ତି ଦେବା ପଛରେ ତାଙ୍କର ଆଭିମୁଖ୍ୟ କଣ ରହିଥିଲା । ଜଣେ ବ୍ୟାଙ୍କ ଅଧିକାରୀ ନିଜ ନାମ ଗୋପନ ରଖି କହିଥିଲେ ଯେ, ନିଯୁକ୍ତି ପାଇଥିବା ବ୍ୟାଙ୍କ ମିତ୍ରମାନେ ବ୍ୟାଙ୍କକୁ ଆସି ଚୌକିରେ ବସି ଫୋନ ଖେଳିବା ବ୍ୟତୀତ ତାଙ୍କର କୌଣସି କାମ ନଥିଲା । ସେ କୌଣସି ଫର୍ମ ପୁରଣ କରିବା ଜାଣିନଥିଲା । ବ୍ୟାଙ୍କ ବନ୍ଦ ହେଲେ ସେ ଚାଲି ଯାଉଥିଲା । ଅଯଥାରେ ସରକାର ଏମାନଙ୍କୁ  ଦରମା ଦେଉଥିଲା । ଏଭଳି ଅବସ୍ଥା ଅଧିକାଂଶ ବ୍ୟାଙ୍କରେ ଦେଖା ଦେଇଥିବା ବେଳେ କାଁ ଭାଁ କେତେକ ବ୍ୟାଙ୍କ ମିତ୍ର କାମ ଜାଣିଥିଲେ ।  ଭିଆରପି ମାନଙ୍କୁ ବ୍ୟାଙ୍କ ଏବଂ ବିଭିନ୍ନ କାର୍ଯ୍ୟାଳୟ ସହିତ ତୁରନ୍ତ ଯୋଗାଯୋଗ କରାଯିବା ପାଇଁ ଏବଂ ସେମାନଙ୍କୁମୂଖ୍ୟ ସ୍ରୋତରେ ସାମିଲ କରିବାକୁ ବିନା ସୁଧରେ ସ୍କୁଟି ପ୍ରଦାନ କରାଯାଇଥିଲା ।  ବର୍ତ୍ତମାନ ସରକାର ଏହି ଯୋଜନାକୁ ବନ୍ଦ  କରି ଦେଲେ ସ୍କୁଟି ନେଇଥିବା ଭିଆରପି ମାନେ ଋଣ କିପରି  ପରିଶୋଧ କରିପାରିବେ ।  ଆହୁରି ମଧ୍ୟ ମିଶନ ଶକ୍ତି ଯୋଜନାର ସରକାର କୋଟି କୋଟି ଟଙ୍କା ପ୍ରଦାନ କରିଛନ୍ତି । କେଉଁ ଯୋଜନା ପାଇଁ କେତେ ଟଙ୍କା ଆସିଥିଲା । ତାହା କିପରି ଖର୍ଚ୍ଚ ହୋଇଅଛି । ଏହାର ତଦନ୍ତ କରାଯିବ ବୋଲି ବିଜେପି  ମହଲରେ ଚର୍ଚ୍ଚା ଜୋର ଧରିଛି । ଯଦି ବିଜେପି ସରକାର ଏହାର ଉପଯୁକ୍ତ ତଦନ୍ତ କରାଯିବ ମିଶନ ଶକ୍ତିର ଉଦ୍ଦେଶ୍ୟ, ଯୋଜନାର ଖର୍ଚ୍ଚ, ବାଟ ମାରଣା ସବୁ କିଛି ଧରାପଡି ଯିବ ।