11-Jun-2024

ଢେଙ୍କାନାଳ(ପ୍ରେରଣା ଖବର): ଗଁଦିଆ ବ୍ଲକର ପ୍ରସିଦ୍ଧ ଶୈବ ପୀଠ କପିଳାସର ମହାପ୍ରଭୁ ଶ୍ରୀ ଶ୍ରୀ ଚନ୍ଦ୍ରଶେଖର ଜୀଉ ଙ୍କ ମା ପାର୍ବତୀଙ୍କ ସହ ବିବାହ କାର୍ଯ୍ୟ ସମ୍ପର୍ଣ୍ଣ ହୋଇଛି l ପ୍ରଥମେ ଗତକାଲି ସନ୍ଧ୍ୟାରେ ମହାଦେବ ଶିବ ଙ୍କୁ ଏକ ସୁସଜ୍ଜିତ ପାଲିଙ୍କିରେ ଅଣାଯାଇ ଦେଓଗାଁ ଠାରେ ଥିବା ବିଶ୍ରାମ ମଣ୍ଡପ ଠାରେ ରଖାଯାଇଥିଲା l ଏହାପରେ ଠାକୁରଙ୍କୁ ବଳରାମଙ୍କ ମନ୍ଦିରକୁ ନିଆଯାଇଥିଲା l ସେଠାରେ ଶିବ ମହାପ୍ରଭୁଙ୍କ ନୀତିକାର୍ଯ୍ୟ ଯଥା ଫଳ ଓ ପଣା ଭୋଗ କରାଯାଇଥିଲା l ଏହାପରେ ଗ୍ରାମର ସମସ୍ତ ଦେବାଦେବୀଙ୍କୁ ଉକ୍ତ ବିବାହରେ ଯୋଗଦେବା ନିମନ୍ତେ ନିମନ୍ତ୍ରଣ କରାଯାଇଥିଲା l ଗତକାଲି ସାଂଧ୍ୟରେ ଦିଅଁ ମଙ୍ଗୁଳା କାର୍ଯ୍ୟ ସମାପନ ହୋଇଥିଲା l ଆଜି ମହାପ୍ରଭୁ ଚନ୍ଦ୍ରଶେଖରଙ୍କୁ ଶିବ

ସାଗର ପୋଖରୀ ଠାରୁ ରୀତିନୀତି ଅନୁଯାୟୀ ପୂଜା ପରେ ସେବକଙ୍କୁ ନେଇ ଏକ ସୁସଜିତ ବିମାନରେ ଶୋଭାଯାତ୍ରାରେ ବଳରାମଙ୍କ ମନ୍ଦିରକୁ ଅଣାଯାଇଥିଲା l ସେଠାରେ ପ୍ରଭୁ ଚନ୍ଦ୍ରଶେଖର ଓ ମା ପାର୍ବତୀଙ୍କର ବିବାହ କାର୍ଯ୍ୟ ସମ୍ପୂର୍ଣ୍ଣ ଧର୍ମୀୟ ରୀତିନୀତି ଅନୁସାରେ ଅନୁଷ୍ଠିତ ହୋଇଥିଲା l ବରପିତା ଭାବେ ସୁରେଶ ପତି ଓ କନ୍ୟା ପିତା ଭାବେ ବିପିନ ମହାପାତ୍ର କାର୍ଯ୍ୟ ତୁଲାଇ ଥିଲେ l ଉକ୍ତ କାର୍ଯ୍ୟ ପୂଜାପଣ୍ଡା ଦତ୍ତ୍ୱେଶ୍ୱର ମିଶ୍ର ଙ୍କ ଦ୍ୱାରା ସମ୍ପର୍ଣ୍ଣ ହୋଇଥିଲା l ଉକ୍ତ କାର୍ଯ୍ୟ ପରିଚାଳନାରେ ଦେବୋତ୍ତର ନିରକ୍ଷକ ବସନ୍ତ କୁମାର ରଥ ଓ କର୍ମଚାରୀ ମାନେ ସହଯୋଗ କରିଥିଲେ l