08-Jun-2024

ବଲାଙ୍ଗୀର(ପ୍ରେରଣା ଖବର ): ବଲାଙ୍ଗୀର ଜିଲ୍ଲା ଦେଓଗାଁ ବ୍ଲକର ଭୀମଡୁଙ୍ଗୁରୀ ପର୍ଯ୍ୟଟନସ୍ଥଳୀରେ ଥିବା ଭୀମକଟାର ଉନ୍ନତିକରଣ କାମ ଚାଲୁରହିଛି । ପ୍ରାୟ ୨.୨୨କୋଟି ଟଙ୍କା ବ୍ୟୟରେ ଜଳସେଚନ ବିଭାଗର ଏହାର ମାଟିଉନ୍ନତିକରଣ ଓ ଅନ୍ୟାନ୍ୟ ଉନ୍ନୟନ କାମ ଚାଲିଛି । ନିର୍ବାଚନ ସରିଲାପରେ ଭୀମ ପାହାଡ କମିଟି ଏହି କାମର କିଭଳି ଠିକ ସମୟରେ ତଥା ଠିକ ଆକାରରେ ହୋଇପାରିବ ସେନେଇ ବିଭାଗୀୟ ଯନ୍ତ୍ରୀଙ୍କ ମିଶି ଯୁଗ୍ମପରିଦର୍ଶନ କରି ଅଅଲୋଚନା କରିଛନ୍ତି । ଶୁକ୍ରବାର ଅପରାହ୍ନ ୫ ସମୟରେ ଭୀମପାହାଡ ମହୋତ୍ସବ କମିଟିର ଅଧ୍ୟକ୍ଷ ଲକ୍ଷ୍ମଣକୁମାର ମେହେର, ସଭାପତି ପ୍ରମୋଦ ବହିଦାର,ସଂପାଦକ ଗୋବର୍ଦ୍ଧନ ସାହୁ,ସ୍ଥାନୀୟ ସମିତିସଭ୍ୟ ଅଭିମନ୍ୟୁ ମାଝୀ ପ୍ରମୁଖ ଜଳସେଚନ ବିଭାଗର ଅଧିକ୍ଷଣଯନ୍ତ୍ରୀ ଇଂ.ଗୋବର୍ଦ୍ଧନ ନାଏକ, ଏସଡିଓ  ଇଂ.ଏସଡିଓ  କୃଷ୍ଣଚନ୍ଦ୍ର ବେହେରା, ମହଲେଇ ରାଜସ୍ୱନୀରିକ୍ଷକ,କାମକୁ କରାଉଥିବା ଠିକଦାର ଓ ସ୍ଥାନୀୟ ଅଞ୍ଚଳବାସୀ ମିଳିତ ହୋଇ ଭୀମକଟାର ଉନ୍ନୟନ ନେଇ ଆଲୋଚନା କରିଥିଲେ । ବର୍ଷାପୂର୍ବରୁ ସଠିକ ହିସାବରେ କାମକରି ଠିକ ସମୟରେ କାମ ସାରିବାକୁ ଅଧିକ୍ଷଣ ଯନ୍ତ୍ରୀ ଇଂ.ନାଏକ କାମ କରାଉଥିବା ଠିକଦାରକୁ ନିର୍ଦ୍ଦେଶ କରିଥିଲେ । ଏହା ସହିତ ଭୀମକଟାରୁ ଭୀମଡୁଙ୍ଗୁରୀ ଗାଁ ଓ ବନ୍ଧପାଲି ଗାଁକୁ ଥିବା ଚଲାରାସ୍ତାକୁ ସୀମାଚିହ୍ନଟ କରି ମାଟି ପକାଇ ରାସ୍ତା କରିବାକୁ ଆଲୋଚନା ହୋଇଥିଲା । ମହଲେଇ ରାଜସ୍ୱ ନୀରିକ୍ଷକ ତାଙ୍କ ଟିମ ନେଇ ପହଞ୍ଚି ଉଭୟ ରାସ୍ତାକୁ ମାପଚୁପ କରି ଉପସ୍ଥିତ ସମିତିସଭ୍ୟ,ସରପଞ୍ଚଙ୍କ ପ୍ରତିନିଧି ଓ ଗ୍ରାମବାସୀଙ୍କୁ ଜଣାଇଥିଲେ । ଚଳାପଥ ଯେଉଁ ଜମିରେ ଯାଇଛି ତାହା ସଂପୂର୍ଣ୍ଣ ସରକାରୀ ରାସ୍ତା କିସମରେ ରହିଛି ତେଣୁ କାମ କରାଇବାରେ କୌଣସି ଅସୁବିଧା ନାହିଁ ବୋଲି ଆରଆଇ କହିଥିଲେ । ପ୍ରକାଶ୍ୟ ଯେ,ଭୀମଡୁଙ୍ଗୁରୀ ପର୍ଯ୍ୟଟନସ୍ଥଳିକୁ ପ୍ରତିଦିନ ହଜାର ହଜାର ଲୋକ ପହଞ୍ଚି ଖୁସି ବ୍ୟକ୍ତ କରୁଛନ୍ତି । ଭୀମପାହାଡ ମହୋତ୍ସବ ସମୟରେ ୩୦ହଜାରରୁ ଉର୍ଦ୍ଧ୍ୱ ଲୋକଙ୍କ ସମାଗମ ହୋଇଥାଏ । ତେଣୁ ଭୀମଡୁଙ୍ଗୁରୀର ଭୀମକଟାରୁ ବନ୍ଧପାଲି ଓ ଭୀମଡୁଙ୍ଗୁରୀ ଗ୍ରାମକୁ ଯାଇଥିବା ରାସ୍ତାର ଉନ୍ନତିକରଣର ନିତାନ୍ତ ଆବଶ୍ୟକ ରହିଛି । ରାଜ୍ୟ ସରକାର ଏହି ପର୍ଯ୍ୟଟନସ୍ଥଳୀର ଉନ୍ନତିକରଣ ପାଇଁ ପ୍ରଥମେ ୩.୫ କୋଟି ଓ ପରେ ୬.୬୬ କୋଟି ଟଙ୍କାର ଅନୁଦାନ ଦେଇଛନ୍ତି । ଭୀମକଟାର ଉନ୍ନତିକରଣ ଜଳସେଚନ ବିଭାଗ କରାଉଥିବା ବେଳେ ପର୍ଯ୍ୟଟକଙ୍କ ପାଇଁ ଆନୁଷଙ୍ଗିକ ଭିତ୍ତିଭୂମିକୁ ଜଙ୍ଗଲ ବିଭାଗ କରାଉଛି । ଭୀମପାହାଡ ମୋତ୍ସବ କମିଟି ପକ୍ଷରୁ ଅଞ୍ଚଳର ଲୋକଙ୍କୁ ନେଇ ଜଙ୍ଗଲସୁରକ୍ଷା ସହିତ ପର୍ଯଟନସ୍ଥଳୀର ଉ ନ୍ନତିକରଣ ପାଇଁ ପଦକ୍ଷେପ ନେଉଛି । ପ୍ରଶାସନ ଓ ସ୍ଥାନୀୟ ଲୋକଙ୍କ ମଧ୍ୟରେ ସମନ୍ୱୟ ରଖି ଉନ୍ନୟନ କାମଗୁଡିକୁ କିଭଳି ତ୍ୱରାନ୍ୱିତ କରାଯାଇ ପାରିବ ସେନେଇ କମିଟି ପଦକ୍ଷେପ ନେଉଛି ।