22-May-2024

ନୂଆପଡ଼ା (ପ୍ରେରଣା ନ୍ୟୁଜ)-  ଖଡିଆଳ ବ୍ଲକ ଅନ୍ତର୍ଗତ ଡୁଆଝର ଗ୍ରାମରେ  ବିଦ୍ୟୁତ ଆଘାତରେ ଆହତ ଛାତ୍ରର ଚିକିତ୍ସା ଏବଂ ବିପଦ ସଙ୍କୁଳ ଅବସ୍ଥାରେ ଥିବା ବିଦ୍ୟୁତ ତାରକୁ ଘୁଞ୍ଚାଇବା ନିମନ୍ତେ ଡୁଆଝର ଗ୍ରାମବାସୀ  ସିନାପାଲି ଠାରୁ ଖଡିଆଳକୁ ସଂଯୋଗ କରୁଥିବା ରାସ୍ତା ଅବରୋଧ କରିଛନ୍ତି। ଯଦ୍ଦ୍ଵାରା  ରାସ୍ତାରେ ଗାଡ଼ି ଚଳାଚଳ ବାଧାପ୍ରାପ୍ତ ହୋଇଛି। ଡୁଆଝର ଗାଁର ଯକ୍ତାନନ୍ଦ ମେହେରଙ୍କ ପୁଅ ଗତ ୧୩ ତାରିଖ ଦିନ ନିଜ ଘର ଛାତକୁ ଯାଇଥିବା ବେଳେ ଘର ଉପର ଦେଇ ଯାଇଥିବା ୩୩ କେଭି ବିଦ୍ୟୁତ ତାର ସ୍ପର୍ଶରେ ଆସି ଗୁରୁତର ଆହତ ହୋଇଥିଲେ।  ଗୁରୁତର ପୁଅକୁ ପରିବାର ଲୋକେ ଖଡିଆଳ ସ୍ବାସ୍ଥ୍ୟ କେନ୍ଦ୍ରରେ ପ୍ରାଥମିକ ଚିକିତ୍ସା ପରେ ରାୟପୁରର ଏକ ଘରୋଇ ସ୍ବାସ୍ଥ୍ୟ କେନ୍ଦ୍ରରେ ଚିକିତ୍ସା ପାଇଁ ଭର୍ତ୍ତି କରିଛନ୍ତି।

ଘର ଉପରେ ଥିବା ବିପଦ ସଙ୍କୁଳ ବିଦ୍ୟୁତ ତାରକୁ ସ୍ଥାନାନ୍ତର ପାଇଁ ପରିବାର ଲୋକେ ବାରମ୍ବାର ଜଣାଇଥିଲେ ହେଁ ବିଦ୍ୟୁତ ବିଭାଗ ଅଣଦେଖା ଯୋଗୁଁ ଏଭଳି ଘଟଣା ଘଟିଥିବାରୁ ଗୁରୁତର ପୁଅ ପାଇଁ ଆର୍ଥିକ ସହାୟତା ଓ ବିଦ୍ୟୁତ ତାର ସ୍ଥାନାନ୍ତର ପାଇଁ ପରିବାର ଓ ଗ୍ରାମବାସୀ ଦାବି କରିବା ସହିତ ରାସ୍ତା ଅବରୋଧ କରିଛନ୍ତି। ଦାବି ପୁରଣ ନ ହେଲେ ରାସ୍ତା ଅବରୋଧ ରୁ ହଟିବୁ ନାହିଁ ବୋଲି ଚେତାବନୀ ଦେଇଛନ୍ତି। ଘଟଣା ସ୍ଥଳରେ ପୋଲିସ ପହଞ୍ଚି ଆନ୍ଦୋଳନ କାରୀଙ୍କ ସହ ସମାଧାନ ପାଇଁ ଆଲୋଚନା କରିଥିବା ଜଣାଯାଇଛି ।