16-May-2024

ସିନ୍ଧେକେଲା (ଅନୀଲ କୁମାର ତ୍ରିପାଠୀ): ବଲାଙ୍ଗୀର ଜିଲ୍ଲା କଣ୍ଟାବାଞ୍ଜି ନିର୍ବାଚନ ମଣ୍ଡଳୀରୁ ନିଜେ ମୁଖ୍ୟମନ୍ତ୍ରୀ ଏଥର ବିଧାୟକ ପ୍ରାର୍ଥୀ ଭାବେ ପ୍ରତିଦ୍ବନ୍ଦ୍ବିତା କରୁଛନ୍ତି। ତେଣୁ କଣ୍ଟାବାଞ୍ଜି ନିର୍ବାଚନ ମଣ୍ଡଳୀର ବିଭିନ୍ନ ସମସ୍ୟା ନେଇ ପ୍ରେସ କ୍ଲବ କଣ୍ଟାବାଞ୍ଜି ସଭାପତି ପ୍ରଭଜିତ ସିଂ ସାଲୁଜା ଏବଂ ପ୍ରେସ କ୍ଲବ ସଦସ୍ୟ ତଥା ରାଣୀପୁର ଝରିଆଲ ଟ୍ରଷ୍ଟ କମିଟିର ଆବାହକ ଅନିଲ କୁମାର ତ୍ରିପାଠୀ ଙ୍କ ନେତୃତ୍ବରେ ଏକ ୧୨ ଜଣିଆ ପ୍ରତିନିଧି ମଣ୍ଡଲ ଓଡିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ତାଙ୍କ ବାସଭବନରେ ସାକ୍ଷାତ କରି କଣ୍ଟାବାଞ୍ଜି ନିର୍ବାଚନ ମଣ୍ଡଳୀରେ ଥିବା ଅନନ୍ୟ ପ୍ରାଚୀନ କୀର୍ତ୍ତିରାଜି ତଥା ଐତିହାସିକ ଧରୋହର ରାଣୀପୁର ଝରିଆଲ ର ଉନ୍ନତି ତଥା ବିକାଶ ସମ୍ପର୍କରେ ସ୍ମାରକପତ୍ର ପ୍ରଦାନ କରିଥିଲେ। ପିଠର ବିକାଶ ଓ ଉନ୍ନତି ପାଇଁ ଓଡିଶା ସରକାର ଆଗରୁ ୪ କୋଟି ଟଙ୍କାର ଅନୁଦାନ ଘୋଷଣା କରିଛନ୍ତି । ତେବେ ସେହି ଅନୁଦାନ ଟଙ୍କାରେ ବର୍ତ୍ତମାନ ସୁଦ୍ଧା କିଛି ବି କାମ ଆରମ୍ଭ ହୋଇ ପାରିନାହିଁ । ଏହି ପିଠ ଲକ୍ଷ ଲକ୍ଷ ଲୋକଙ୍କ ଭାବାବେଗ ତଥା ଆସ୍ଥା ଓ ବିଶ୍ବାସ ଜଡ଼ିତ ଥିବାରୁ ପିଠ ପ୍ରତି ସ୍ବତନ୍ତ୍ର ନଜର ଦେବାକୁ ଅନୁରୋଧ କରାଯାଇଥିଲା ।ମୁଖ୍ୟମନ୍ତ୍ରୀ ସମସ୍ତ ଶୁଣିବା ପରେ ଯଥାଶୀଘ୍ର ସମସ୍ୟାର ସମାଧାନ ପାଇଁ ନିର୍ଭର ପ୍ରତିଶ୍ରୁତି ଦେଲେ। ମୁଖ୍ୟମନ୍ତ୍ରୀଙ୍କ

ସାକ୍ଷାତ ସମୟରେ ବରିଷ୍ଠ ବିଜେଡି ନେତା ଭି କେ ପାଣ୍ଡିଆନ ମଧ୍ୟ ଆଲୋଚନା ରେ ସାମିଲ ହୋଇ ବିଜେଡି ର ବିକାଶ ଟାର୍ଗେଟ ରେ ରାଣୀପୁର ଝରିଆଲ ରହିଥିବା କହିଥିଲେ। ଏହି ସାକ୍ଷାତକାର ସମୟରେ ଡକ୍ଟର ଅମଜଦ ଖାନ , ପ୍ରେସ କ୍ଲବର କାର୍ଯ୍ୟକାରୀ ସଭାପତି ସୁରଦାସ ବାଗ, କୋଷାଧ୍ୟକ୍ଷ କମଳଜିତ ସିଂ ମାଖିଜା, ଉପସଭାପତି ମନୋଜ ଶର୍ମା, ମୁରିବାହାଲ ସାମ୍ବାଦିକ ସଂଘର ଆଇନ ପରାମର୍ଶଦାତା ଜୟ ଦୀପ ପୁରୋହିତ, ପରାମର୍ଶଦାତା ଆଶିଷ ଖୈତାନ, ବଣ୍ଟି ଗୁପ୍ତା, ଆନନ୍ଦ ମୋଟେ, ଅଫିସ ସମ୍ପାଦକ ବିଶିକେସନ ମାଝୀ ପ୍ରମୁଖ ଉପସ୍ଥିତ ଥିଲେ।