14-May-2024

ବଲାଙ୍ଗିର(ପ୍ରେରଣା ଖବର ): ଆଜି ବଲାଙ୍ଗିର ବିଧାନସଭା ନିର୍ବାଚନ ମଣ୍ଡଳି ଦେଓଗାଁ ବ୍ଲକ ଅନ୍ତର୍ଗତ  ବିଭିନ୍ନ ଅଂଚଳରେ କଂଗ୍ରେସ ବିଧାୟକ ପ୍ରାର୍ଥୀ ସମରେନ୍ଦ୍ର ମିଶ୍ର ମାରାଥନ ନିର୍ବାଚନ ପ୍ରଚାର କରିଛନ୍ତି । ରୁପାନ୍ତରିତ ନାଁ ରେ ଆମ ଛାତ୍ର ଛାତ୍ରୀମାନଙ୍କୁ ସରକାର ସବୁବେଳେ ପ୍ରତାରଣ ଦେଇ ଆସୁଛନ୍ତି । ଶିକ୍ଷାନୁଷ୍ଠାନରେ ରଙ୍ଗ ବୋଳିଦେଲେ ଶିକ୍ଷାର ବିକାଶ ହୁଏ ନାହିଁ ବରଂ ଶିକ୍ଷାନୁଷ୍ଠାନର ବିକାଶ ପାଇଁ ଉତ୍ତମ ଶିକ୍ଷକ ନିହାତି ଦରକାର କିନ୍ତୁ ବିଡମ୍ବନା ର ବିଷୟ ଶିକ୍ଷାନୁଷ୍ଠାନ ଗୁଡିକରେ ଶିକ୍ଷକର ଅଭାବ ରହିଛି । ସରକାର ପ୍ରକୃତ ଶିକ୍ଷାକୁ ଗୁରୁତ୍ୱ ଦେବା ପରିବର୍ତ୍ତେ ମନୋରଂଜନ ଧର୍ମୀ କାର୍ଯ୍ୟକ୍ରମ ପାଇଁ ସାମୟିକ ଅନୁଦାନ ଦ୍ୱାରା ଆମ ପିଲାଙ୍କ ଶୈକ୍ଷିକ ପରିବେଶ ଧିରେ ଧିରେ ନଷ୍ଟ ହେବାରେ ଲାଗିଛି । ଛାତ୍ର ଛାତ୍ରୀ ପାଠ ପଢିସାରିଲା ପରେ ଅନ୍ୟ ରାଜ୍ୟକୁ କାର୍ଯ୍ୟ ଅନ୍ୱେଷଣରେ ଚାଲିଯାଉଛନ୍ତି । ଆମ ଏଠି ସବୁ ସୁବିଧା ଥାଇ ମଧ୍ୟ ଶିଳ୍ପ ଓ କଳକାରଖାନା ଅଭାବ ଅଛି । ତେଣୁ ବାଧ୍ୟ ହୋଇ ଅନ୍ୟ ଉପାୟ ନ ପାଇ ତେଲେଙ୍ଗାନା, ତାମିଲନାଡୁ, ଗୁଜୁରାଟ ଭଳି ରାଜ୍ୟକୁ ଦାଦନ ଖଟି ଯାଉଛନ୍ତି । ତେଣୁ ଆଗାମୀ ୨୦ ତାରିଖ ନିର୍ବାଚନରେ ଲୋକେ କଂଗ୍ରେସ ହାତ ଚିହ୍ନରେ ଭୋଟ ଦିଅନ୍ତୁ କାରଣ କଂଗ୍ରେସ ହିଁ ଏକମାତ୍ର ବିକଳ୍ପ ଯିଏ କି ଏ ଅଂଚଳରେ ଆମ ଛାତ୍ର ଓ ଯୁବକମାନଙ୍କ ପାଇଁ ଉତ୍ତମ ଶିକ୍ଷା ସହ ରୋଜଗାର ପ୍ରଦାନ କରିବ ବୋଲି ଆଜି ଦେଓଗାଁ ଅଂଚଳରେ ଭୋଟ ପାଇଁ ମାରାଥନ ପ୍ରଚାର ବେଳେ ନୁଆପାଲି, ରୁଗୁଡିପାଲି, ଅର୍ଜୁନପୁର ଓ ଗୌରଗୋଠ ଠାରେ ଅନୁଷ୍ଠିତ ଜନ ଆଶିର୍ବାଦ ସଭାରେ ବଲାଙ୍ଗିର ବିଧାନସଭା ନିର୍ବାଚନ ମଣ୍ଡଳି କଂଗ୍ରେସ ବିଧାୟକ ପ୍ରାର୍ଥୀ ସମରେନ୍ଦ୍ର ମିଶ୍ର ନିଜ ବକ୍ତବ୍ୟରେ କହିଛନ୍ତି । ଏହି ପରିପ୍ରେକ୍ଷି ରେ ସେ ଆହୁରି ମଧ୍ୟ କହିଛନ୍ତି ଯେ ରାଜ୍ୟ ସରକାର ଦେଓଗାଁ ର ଯୁବକ ଛାତ୍ରମାନଙ୍କୁ ସବୁବେଳେ ଅଣଦେଖା କରି ଆସୁଛନ୍ତି । କଂଗ୍ରେସ ସରକାର ଅମଳରେ ଆରମ୍ଭ ହୋଇଥିବା ବିଜୟାନନ୍ଦ ଚିନିକଳ ଯେଉଁଥିରେ ଏ ଅଂଚଳର ଅନେକ ଯୁବକ ଯୁବତି ନିଯୁକ୍ତି ପାଇଥିଲେ ତା ସହ ଏ ଅଂଚଳର ଆଖୁ ଚାଷୀମାନେ ଆଖୁ ଚାଷ କରି ଉପକୃତ ହେଉଥିଲେ । ଏହି ବିଜେଡି ସରକାର ଅମଳରେ ତାହାକୁ ଦେବାଳିଆ କରି ବନ୍ଦ କରି ଦିଆଯାଇଛି । ଅନେକ ଦାବି ଓ ଆନ୍ଦୋଳନ ପରେ ମଧ୍ୟ ସରକାର ଯୁବକ ଓ କୃଷକଙ୍କ ଦାବିକୁ କର୍ଣ୍ଣପାତ କରୁନାହାନ୍ତି ଓ ଚିନିକଳ ପୁନରୁଦ୍ଧାର ଦିଗରେ ଉଦ୍ୟମ କରୁନାହାନ୍ତି । ଏଣୁ ଆସନ୍ତା ନିର୍ବାଚନରେ ବିଜେଡି ଦଳକୁ ଏ ଅଂଚଳ ଛାତ୍ର, ଯୁବକ ଓ କୃଷକ ବହୁ ପରିମାଣରେ ପ୍ରତ୍ୟାଖାନ କରନ୍ତୁ ବୋଲି ନିଜ ବକ୍ତବ୍ୟ ରେ ବିଧାୟକ ପ୍ରାର୍ଥୀ ସମରେନ୍ଦ୍ର କହିଛନ୍ତି । ସଭାମାନଙ୍କରେ ଉପସ୍ଥିତ ବଲାଙ୍ଗିର ବିଧାୟକ ମାନ୍ୟବର ବିଧାୟକ ନରସିଂହ ମିଶ୍ର କହିଛନ୍ତି ଯଦି କଂଗ୍ରେସ ସରକାରକୁ ଆସେ ତେବେ ଗୃହ ଜ୍ୟୋତି ଯୋଜନାରେ ଘରେଇ ଉପଭୋକ୍ତଙ୍କ ପାଇଁ ୨୦୦ ୟୁନିଟ ବିଦ୍ୟୁତ ଦେୟ ମାଗଣା, ଯୁବ ବିକାଶ ଯୋଜନାରେ ପ୍ରତ୍ୟେକ ବର୍ଷ ୫ଲକ୍ଷ ଯୁବକ ଯୁବତିଙ୍କ ପାଇଁ ନିଯୁକ୍ତି ବ୍ୟବସ୍ଥା, ବେକାରୀ ଭତ୍ତା ମାସିକ ୩ ହଜାର ଟଙ୍କା, କୃଷକମାନଙ୍କ ପାଇଁ ବୋନସ ସହ ଧାନର ସର୍ବନିମ୍ନ ସହାୟକ ମୁଲ୍ୟ କ୍ୱିଣ୍ଟାଲ ପ୍ରତି ୩ହଜାର ଟଙ୍କା, କୃଷିଋଣ ଛାଡ, କୃଷକମାନଙ୍କ ପାଇଁ ୨ହଜାର ଟଙ୍କା

ପେନସନ ବ୍ୟବସ୍ଥା, ଗୃହଲକ୍ଷ୍ମୀ ଯୋଜନାରେ ମହିଳା ସ୍ୱୟଂ ସହାୟକ ଗୋଷ୍ଠିଙ୍କ ବ୍ୟଙ୍କ ଋଣ ଛାଡ ଓ ପ୍ରତ୍ୟେକ ମହିଳାଙ୍କୁ ମାସିକ ୨ହଜାର ଟଙ୍କା ଭତ୍ତା, ଆଦିବାସୀ ଓ ଦଳିତ ମହିଳା ୩ହଜାର ଟଙ୍କା ଭତ୍ତା, ୫୦୦ ଟଙ୍କାରେ ଗ୍ୟାସ ସିଲିଣ୍ଡର ବ୍ୟବସ୍ଥା ସହ ୨୫ ଲକ୍ଷ ଟଙ୍କାର ସ୍ୱାସ୍ଥ୍ୟ ବୀମା ମାଧ୍ୟମରେ ମାଗଣା ଚିକିତ୍ସା, ବାଦ୍ଧକ୍ୟ ବିକଳାଙ୍ଗ ଭତ୍ତା ମାସିକ ୨ ହଜାର ଟଙ୍କା ପ୍ରଦାନ, ଶିକ୍ଷା ଏବଂ ଚାକିରି କ୍ଷେତ୍ରରେ ପଛୁଆ ବର୍ଗଙ୍କ ପାଇଁ ୨୭% ସଂରକ୍ଷଣ ବ୍ୟବସ୍ଥା ଏବଂ ୧୦୦ ଦିନ ଭିତରେ ପେଶା ଆଇନକୁ କଡାକଡି ଭାବେ ଲାଗୁ କରାଯିବ ବୋଲି ବିଧାୟକ ଶ୍ରୀ ମିଶ୍ର ଉପସ୍ଥିତ ଜନସାଧାରଣଙ୍କୁ ନିଜ ବକ୍ତବ୍ୟରେ କହିଥିଲେ ।