09-May-2024

ବଲାଙ୍ଗିର (ପ୍ରେରଣା ଖବର ): କେବେ କଣ ନାଁ ଦିଆଯାଇପାରିଛି ଭାବକୁ, ସଂପର୍କକୁ, ସମୟକୁ, କବିତାକୁ, ପ୍ରେମକୁ, ଦ୍ରୋହକୁ, ନିଜକୁ ? କିଛି ଅନାମିତ ରହିଛି ବୋଲି ତ ନିଜେ ଭୋଗୁଥିବା ସମୟକୁ, ଜୀବନକୁ କବି ସ୍ପଷ୍ଟ ଭାବରେ ବ୍ଯକ୍ତ କରିପାରୁଛି ଶବ୍ଦରେ । କବିତା ମାଧ୍ଯମ ସାଜିଛି ହୃଦୟ ସହ ହୃଦୟକୁ ଯୋଡିବାରେ । କବିତା କଣ, କାହା ପାଇଁ ଲେଖୁଛି, କାହାକୁ ନେଇ ଲେଖୁଛି ? ଅନେକ ପ୍ରଶ୍ନ,  ଅନେକ ଦ୍ବନ୍ଦ୍ବ।  ତଥାପି ହୃଦୟରୁ କେଣି ଜଣେ କହୁଛି "ମୁଁ ହିଁ କବିତା, ନିଜ ପାଇଁ ଲେଖୁଛି, ନିଜକୁ ନେଇ ଲେଖୁଛି " । ଜୀବନାୟନର ପ୍ରତିଟି ରଂଗକୁ ନେଇ ଯୁବକବି ସୁଜିତ କୁମାର ସତପଥିଙ୍କ ଷଷ୍ଠ କବିତା ସଂକଳନ "ଅନାମିତ ରହୁ କିଛି " ଉନ୍ମୋଚିତ ହୋଇଯାଇଛି । ପୁସ୍ତକଟିକୁ ଉନ୍ମୋଚନ କରିଛନ୍ତି ପ୍ରଖ୍ଯାତ ଗାଳ୍ପିକା ଗାୟତ୍ରୀ ସରାଫ । ଗାଳ୍ପିକାଙ୍କ ବଲାଙ୍ଗୀର ସ୍ଥିତ ବାସଭବନରେ ଅନୁଷ୍ଠିତ ଏହି ଉନ୍ମୋଚନ ସଭାରେ ଅନ୍ଯମାନଙ୍କ ମଧ୍ଯରେ କବି ସନ୍ଦୀପ କୁମାର କୁଅଁର , ଗାଳ୍ପିକାଙ୍କ ସ୍ବାମୀ ଅମୋଲ ଜେନା ଏବଂ ଆଦ୍ଯାଂଶ ସତପଥି ଉପସ୍ଥିତ ଥିଲେ । ଏହି କବିତା ସଂକଳନ ଯେତେ ସବୁ ବାଦକୁ

ପ୍ରତ୍ଯାଖ୍ଯାନ କରି ଜୀବନର ମନ୍ତ୍ର ଉଚ୍ଚାରୁଛି ବୋଲି ଗାଳ୍ପିକା ଗାୟତ୍ରୀ ସରାଫ ନିଜର ମତ ରଖିଥିଲେ । କବିତାର ସମୟକୁ ଅତିକ୍ରାନ୍ତ କରିବାର ସାମର୍ଥ୍ଯ ତଥା କବିତା ଓ ଚଳନ୍ତି ସମୟ ମଧ୍ଯରେ ଥିବା ପାରସ୍ପରିକ ସଂପର୍କ ଉପରେ ନିଜର ମତ ରଖିଥିଲେ କବି ସନ୍ଦୀପ କୁମାର କୁଅଁର।  ଶିଶୁ ଚିତ୍ରଶିଳ୍ପୀ ଅସ୍ମିତା ପାଣିଙ୍କ ଦ୍ବାରା ଅଂକିତ ଚିତ୍ର ଏହି ସଂକଳନରେ ପ୍ରଚ୍ଛଦର ରୂପ ନେଇ ଢେର ପ୍ରଶଂସା ସାଉଁଟିଛି । ପ୍ରକାଶ ଥାଉକି ଆଗରୁ ସୁଜିତ ସତପଥିଙ୍କ କବିତା ସଂକଳନ ଇଚ୍ଛାଭାଟି, ଚତୁର୍ଥ ପୁରୁଷ, ଶବ୍ଦରେ ଶବ୍ଦରେ, ଛୁଟି ଦେବା ସମୟକୁ ଏବଂ ନୁରା ଓ ଆଲୋଚନା ପୁସ୍ତକ ଦୀପ୍ତି ଓ ଦିଗନ୍ତ ପ୍ରକାଶିତ ହୋଇ ବେଶ ପାଠକୀୟ ଆଦୃତି ଲାଭ କରିସାରିଛି ।