02-Nov-2026

ନାଗାଁ (ବି)/ବଲାଙ୍ଗୀର(ପ୍ରେରଣା ଖବର): ଶିଶୁମାନଙ୍କୁ ଡିଜିଟାଲ୍ ଜଗତରେ ସୁରକ୍ଷିତ ରଖିବା ଏବଂ ସାଇବର ସୁରକ୍ଷା ସମ୍ପର୍କରେ ସଚେତନ କରିବା ଲକ୍ଷ୍ୟରେ ଆଜି ନାଗାଁ (ବି) ଗ୍ରାମଠାରେ CRY (Child Rights and You) ଓ ପଲ୍ଲୀ ଆଲୋକ ପାଠାଗାର (PAP)ର ମିଳିତ ସହଯୋଗରେ ଜାତୀୟ ଅନଲାଇନ୍ ସୁରକ୍ଷା ଅଭିଯାନ ‘Ting Tang’ର ଶୁଭାରମ୍ଭ କରାଯାଇଛି।

ଏହି ଶୁଭାରମ୍ଭ କାର୍ଯ୍ୟକ୍ରମରେ ରାଜ୍ୟସଭା ସାଂସଦ ମାନ୍ୟବର ଶ୍ରୀ ସୁଜିତ କୁମାର ଏବଂ ଓଡ଼ିଶା ସରକାରଙ୍କ ସ୍ୱାସ୍ଥ୍ୟ, ସୂଚନା ଓ ଲୋକସମ୍ପର୍କ ଏବଂ ବିଧାନସଭା ବ୍ୟାପାର ମନ୍ତ୍ରୀ ଡା. ମୁକେଶ ମହାଲିଙ୍ଗ ଯୋଗଦେଇଥିଲେ।

ଏହି ଅଭିଯାନର ମୁଖ୍ୟ ଉଦ୍ଦେଶ୍ୟ ହେଉଛି ଶିଶୁ ଓ କିଶୋର-କିଶୋରୀମାନଙ୍କ ମଧ୍ୟରେ ସାଇବର ସୁରକ୍ଷା ସମ୍ପର୍କିତ ସଚେତନତା ସୃଷ୍ଟି କରିବା, ଇଣ୍ଟରନେଟ୍ ଓ ସୋସିଆଲ୍ ମିଡିଆର ସକାରାତ୍ମକ ବ୍ୟବହାରକୁ ପ୍ରୋତ୍ସାହିତ କରିବା ଏବଂ ସାଇବର ବୁଲିଂ, ଅନଲାଇନ୍ ଠକେଇ, ଟ୍ରୋଲିଂ, ବ୍ୟକ୍ତିଗତ ତଥ୍ୟର ଅପବ୍ୟବହାର ଓ ଅନଲାଇନ୍ ଯୌନ ଶୋଷଣ ଭଳି ବିପଦରୁ ଶିଶୁମାନଙ୍କୁ ସୁରକ୍ଷା ଦେବା। ଏଥିସହିତ ଶିଶୁମାନଙ୍କୁ ନିଜର ଡିଜିଟାଲ୍ ଅଧିକାର ଓ ସୁରକ୍ଷା ପ୍ରତି ସଚେତନ ଓ ଦାୟିତ୍ୱବାନ କରିବା ଏହି ଅଭିଯାନର ଅନ୍ୟତମ ଲକ୍ଷ୍ୟ।

କାର୍ଯ୍ୟକ୍ରମର ଆରମ୍ଭରେ ଶ୍ରୀ ଗୋବିନ୍ଦ ବିଶି ସ୍ୱାଗତ ଭାଷଣ ପ୍ରଦାନ କରିଥିଲେ। ପଲ୍ଲୀ ଆଲୋକ ପାଠାଗାରର ବରିଷ୍ଠ କାର୍ଯ୍ୟକ୍ରମ ପରିଚାଳକ ଶ୍ରୀ ହୀରାଲାଲ ମିଶ୍ର ଅଭିଯାନର ପୃଷ୍ଠଭୂମି, ଲକ୍ଷ୍ୟ, ଉଦ୍ଦେଶ୍ୟ ଏବଂ ବରଗଡ଼ ଓ ବଲାଙ୍ଗୀର ଜିଲ୍ଲାରେ ଏହାର କାର୍ଯ୍ୟକାରିତା ସମ୍ପର୍କରେ ନିଜର ମତ ରଖିଥିଲେ।

ମାନ୍ୟବର ମନ୍ତ୍ରୀ ଡା. ମୁକେଶ ମହାଲିଙ୍ଗ ନିଜ ଅଭିଭାଷଣରେ ଶିଶୁମାନଙ୍କ ଅନଲାଇନ୍ ସୁରକ୍ଷାର ଗୁରୁତ୍ୱ ଉପରେ ଆଲୋକପାତ କରିଥିଲେ। ଡିଜିଟାଲ୍ ମାଧ୍ୟମର ବ୍ୟବହାର ସମୟରେ ସତର୍କତା, ସଚେତନତା ଓ ଦାୟିତ୍ୱବୋଧ ରଖିବା ସହିତ ଶିଶୁମାନଙ୍କୁ ଅନଲାଇନ୍ ବିପଦରୁ ସୁରକ୍ଷା ଦେବାରେ ପରିବାର ଓ ସମାଜର ଭୂମିକା ରହିଥିବା ସେ ଉଲ୍ଲେଖ କରିଥିଲେ।ସେହିପରି ରାଜ୍ୟସଭା ସାଂସଦ ମାନ୍ୟବର ସୁଜିତ କୁମାର ଶିଶୁ ଓ କିଶୋର-କିଶୋରୀମାନଙ୍କ ସହ

ସିଧାସଳଖ ଆଲୋଚନା କରି ଇଣ୍ଟରନେଟ୍ ଓ ସୋସିଆଲ୍ ମିଡିଆର ସକାରାତ୍ମକ ଓ ନକାରାତ୍ମକ ପ୍ରଭାବ ବିଷୟରେ ମତ ବିନିମୟ କରିଥିଲେ। ଡିଜିଟାଲ୍ ଜ୍ଞାନ ଓ ସୁଯୋଗର ସଦୁପଯୋଗ କରିବା ସହିତ ଅନଲାଇନ୍ ବିପଦ ପ୍ରତି ସଚେତନ ରହିବାକୁ ସେ ପରାମର୍ଶ ଦେଇଥିଲେ। କାର୍ଯ୍ୟକ୍ରମ ଶେଷରେ ପଲ୍ଲୀ ଆଲୋକ ପାଠାଗାରର ସଭାପତି  ରମେଶ ପଧାନ ଧନ୍ୟବାଦ ଅର୍ପଣ କରିଥିଲେ। ଏହି ଅଭିଯାନର ସଫଳ ଆୟୋଜନରେ ଶ୍ରୀ ପ୍ରଶାନ୍ତ କୁଅଁର, ପ୍ରହଲ୍ଲାଦ ପଧାନ, ସୁଶାନ୍ତ ସା ଓ ଆଶିଷ ବିଶ୍ୱାଳ ସହଯୋଗ କରିଥିଲେ।