28-Apr-2024

ଯୁବକଙ୍କୁ ରୋଜଗାର ଓ ଦକ୍ଷତା ବିକାଶ ର ଦେଲେ ପ୍ରତିଶୃତି- ସମରେନ୍ଦ୍ର
ବଲାଙ୍ଗିର(ପ୍ରେରଣା ଖବର ): ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ କେବଳ ଭୋଟ ହାତେଇବା ରାଜନୀତି ଯୋଗୁଁ ବେକାରୀ ସମସ୍ୟା ଆମ ଅଂଚଳରେ ହୁ ହୁ ହୋଇ ବଢିଚାଲିଛି । ଆମର ଯୁବକମାନେ ବାଧ୍ୟ ହୋଇ ଛୋଟ ଦୋକାନ କରି ବ୍ୟବସାୟ କରୁଛନ୍ତି ସତ କିନ୍ତୁ ସରକାରଙ୍କ ଭୁଲ ନୀତି ଦ୍ୱାରା କ୍ଷୁଦ୍ର ଓ ଉଠା ଦୋକାନୀଙ୍କ ବ୍ୟବସାୟରେ କୌଣସି ଉନ୍ନତି ପରିଲକ୍ଷିତ ହେଉ ନାହିଁ ବୋଲି ସ୍ଥାନୀୟ ହୋଟେଲ ସେଲିବ୍ରେସନ ପାଖ ପଡିଆରେ ଅନୁଷ୍ଠିତ ସମରେନ୍ଦ୍ର ଙ୍କ ସହ ସମ୍ବାଦ କାର୍ଯ୍ୟକ୍ରମରେ ବଲାଙ୍ଗିର ବିଧାନସଭା କଂଗ୍ରେସ ଦଳ ପ୍ରାର୍ଥୀ ସମରେନ୍ଦ୍ର ମିଶ୍ର ନିଜ ବକ୍ତବ୍ୟରେ କହିଛନ୍ତି । ସହରର ହଜାର ହଜାର ସଂଖ୍ୟାରେ ଉପସ୍ଥିତ ଛୋଟ ବ୍ୟବସାୟୀଙ୍କ ଏହି ସମ୍ବାଦ କାର୍ଯ୍ୟକ୍ରମରେ ସମରେନ୍ଦ୍ର ଏହା ମଧ୍ୟ କହିଛନ୍ତି ଯେ ବଲାଙ୍ଗିର ଧିରେ ଧିରେ ଯୁବକଶୁନ୍ୟ ହେବାକୁ ଲାଗିଛି । କାରଣ ପଢି ସାରିଲା ପରେ ଚାକିରି ନାହିଁ । ରୋଜଗାର ପାଇଁ ବାହାର ରାଜ୍ୟକୁ ଦାଦନ ଖଟିବାକୁ ବାଧ୍ୟ ହେଉଛନ୍ତି । ମୁଁ ତ କହିବି ଉଦ୍ୟମତା ଓ ଦକ୍ଷତା ବିକାଶ ର ଡିମ୍‌ଡିମ ପିଟୁଥିବା ରାଜ୍ୟ ଓ କେନ୍ଦ୍ର ସରକାର ଆମର ଯୁବକମାନଙ୍କୁ ନିଜର ମାଟିରେ କୁଶଳି କିମ୍ବା ଦକ୍ଷତା ବଢାଇବା ପାଇଁ କୌଣସି ଯୋଜନାର ବ୍ୟବସ୍ଥା ନାହିଁ । ଏ ଦିଗରେ ଉଭୟ ସରକାରମାନେ ସମ୍ପୁର୍ଣ୍ଣ ଫେଲ ମାରିଛନ୍ତି । ଏପରି କି ବଲାଙ୍ଗିର ରୁ ନିରବଛିନ୍ନ ଭାବେ ପ୍ରତିନିଧିତ୍ୱ କରି ମନ୍ତ୍ରୀ ପଦ ପାଇଥିବା ସରକାରୀ ଦଳର ନେତା ବଲାଙ୍ଗିର ର ଯୁବକ ଯୁବତିମାନଙ୍କୁ ଧୋକା ଦେଇଛନ୍ତି । ସେମାନେ ଆମ ପିଲାମାନେ କିଭଳି ପାଠ ପଢିସାରି ରୋଜଗାରକ୍ଷମ ହେବେ ସେ ଦିଗରେ ସରକାରଙ୍କ ଆଗରେ ତିଳେ ବି ଚାପ ପକାଇ ପାରିନାହାନ୍ତି । ଯାହା ଫଳରେ ବ୍ୟବସାୟ ହେଉ କି ବିଭିନ୍ନ ବିଭାଗର କୁଶଳି କାରିଗର ସବୁଥିରେ ରାଜ୍ୟ ବାହାରୁ ଲୋକେ କାମ ପାଉଛନ୍ତି ବୋଲି ବିଧାୟକ ପ୍ରାର୍ଥୀ ସମରେନ୍ଦ୍ର ମିଶ୍ର କ୍ଷୋଭ ପ୍ରକାଶ କରିଛନ୍ତି । ପୁଞ୍ଜିପତି ଯେପରି ଅଧିକ ମୁନାଫା କମାଇ ପାରିବେ ସେ ଦିଗରେ କେନ୍ଦ୍ର ସରକାର ରିଲାଏନ୍ସ ବିଗ୍ ବାସ୍କେଟ ଭଳି କଂପାନୀକୁ ପରିବା ତଥା ଗ୍ରୋସରି ବ୍ୟବସାୟରେ ପ୍ରବେଶ କରାଇ ଖୁଚୁରା ବ୍ୟବସାୟରେ କ୍ଷୁଦ୍ର ଓ ଛୋଟ ବ୍ୟବସାୟୀଙ୍କ ପେଟ ପାଟଣା ବନ୍ଦ କରିଦେଇଛି ବୋଲି ସମରେନ୍ଦ୍ର ଆରୋପ କରିଥିଲେ । ସଭାରେ ମାନ୍ୟବର ବଲାଙ୍ଗିର ବିଧାୟକ ନରସିଂହ ମିଶ୍ର କ୍ଷୁଦ୍ର ବ୍ୟବସାୟୀଙ୍କ ପାଇଁ ବିଭିନ୍ନ ଜାଗାରେ ଭେଡିଂ ଜୋନ ତିଆରି କରାଯାଇଥିବା ସୂଚନା ଦେଇଥିଲେ । ତା ସହ କହିଥିଲେ ଯେଉଁ ଉଠା ଦୋକାନି ତଥା ଗରିବ ଲୋକେ ସରକାରୀ ଜାଗାରେ ଘର କରି ରହୁଛନ୍ତି ସେମାନଙ୍କୁ ରହୁଥିବା ଜାଗାରେ ପଟ୍ଟା ପ୍ରଦାନ ନିଶ୍ଚିତ କରାଯିବ ବୋଲି କହିଥିଲେ । କଂଗ୍ରେସ ଜିତିଲେ ନିଶ୍ଚିତ ଭାବେ ବଲାଙ୍ଗିର କୁ କିଛି ଶିଳ୍ପାନୁଷ୍ଠାନ ଅଣାଯିବ । ବେକାର ଯୁବକ ଯୁବତୀଙ୍କ ପାଇଁ ଦକ୍ଷତା ବିକାଶ ସହ ସେମାନେ କିପରି ରୋଜଗାରକ୍ଷମ ହୋଇପାରିବେ ସେ ଦିଗରେ ନିଶ୍ଚିତ ପଦକ୍ଷେପ ନିଆଯିବ ବୋଲି ପ୍ରତିଶୃତି ଦେବା ସହ କଂଗ୍ରେସ ଦଳର ଚିହ୍ନ ହାତ ଚିହ୍ନରେ ଦୁଇଟି ଭୋଟ ଦେବାକୁ ସମବେତ ଲୋକଙ୍କୁ ଅନୁରୋଧ କରିଥିଲେ ।