22-Apr-2024

କଣ୍ଟାମାଲ(ଜୟ କୁମାର ମହାରଣାଙ୍କ ରିପୋର୍ଟ ): ବୌଦ୍ଧ ଜିଲ୍ଲାପାଳଙ୍କ ବାରମ୍ବାର ତାଗିଦ ସତ୍ୱେ ଜିଲ୍ଲାରେ ଜଣେ ପରେ ଜଣେ ସରକାରୀ କର୍ମଚାରୀ ରାଜନୈତିକ କାର୍ଯ୍ୟକଳାପରେ ସାମିଲ ହୋଇ ନିର୍ବାଚନ ଆଚରଣବିଧି ଉଲ୍ଲଘଂନ ହେଉଥିବା ଦେଖାଯାଉଛି । ଏହାରି ମଧ୍ୟରେ କେବଳ ଶିକ୍ଷା ବିଭାଗର 3 ଜଣ ଶିକ୍ଷକ ଶିକ୍ଷୟତ୍ରୀଙ୍କୁ ରାଜନୈତିକ କାର୍ଯ୍ୟ କଳାପରେ ସାମିଲ ଯୋଗୁଁ ନିଳମ୍ବିତ ଓ ବଦଳି କରାଯାଇଛି । ସମାନ ଅଭିଯୋଗରେ ପୂର୍ବରୁ ତିନିଜଣ ଶିକ୍ଷକ ଶିକ୍ଷୟିତ୍ରୀଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିବାବେଳେ ଏକ ରାଜନୈତିକ ରାଲିରେ ସାମିଲ ହେବା ଯୋଗୁଁ ପୁଣିଥରେ ଆଉ ଜଣେ ଜୁନିୟର କ୍ଲର୍କ ଙ୍କୁ ଜିଲ୍ଲାପାଳ ନିଳମ୍ବିତ କରିଥିବା ଜଣାଯାଇଛି । ସୂଚନା ମୁତାବକ ବୌଦ୍ଧଜିଲ୍ଲା କଣ୍ଟାମାଳ ବ୍ଲକର ଲମ୍ବସରୀ ଗ୍ରାମରେ ଥିବା ରାଧାମାଧବ ଉଚ୍ଚ ବିଦ୍ୟାଳୟର ଜୁନିୟର କ୍ଲର୍କ ସତ୍ୟନାରାୟଣ ଦନ୍ତା ଏକ ରାଜନୈତିକ ଶୋଭାଯାତ୍ରାରେ ସାମିଲ ହୋଇଥିବା ଜଣାପଡିବା ପରେ ଜିଲ୍ଲାପାଳ ତାଙ୍କୁ ଆଜି ନିଳମ୍ବିତ କରିଛନ୍ତି ।