08-Apr-2024

ବାଲାଙ୍ଗୀର,ବଲାଙ୍ଗୀର ବିଜେପି ଦଳରେ ଅସନ୍ତୁଷ୍ଟଙ୍କ ସଂଖ୍ୟା ବଢିଚାଲିଛି । ଅସନ୍ତୁଷ୍ଟଙ୍କୁ ମନାଇବାରେ ନେତା ଫେଲ ମାରୁଛନ୍ତି । ଜିଲ୍ଲାରେ ବିଜେପି ଦଳରେ ଏକଛତ୍ରବାଦକୁ ନେଇ ଗତ କିଛିବର୍ଷ ହେଲା ଅସନ୍ତୋଷର ନିଆଁ କୁହୁଳୁଥିଲା । ଏବେ ତାହା ଜଳିବା ଆରମ୍ଭ କରିଛି । ମୁଖ୍ୟତଃ ଯାଦବ ନେତା ବଳରାମ ସିଂଯାଦବଙ୍କୁ ନେଇ ବଲାଙ୍ଗୀର ବିଜେପିରେ କମ୍ପନ ସୃଷ୍ଟି ହୋଇଛି । ବଲାଙ୍ଗୀର ଲୋକସଭା ସାଂସଦ ଥିବା ସଂଗୀତା କୁମାରୀ ସିଂଦେଓ, ତାଙ୍କ ସ୍ୱାମୀ କନକବର୍ଦ୍ଧନ ସିଂଦେଓଙ୍କ ଏକଛତ୍ରବାଦ ମନୋଭାବ ଯୋଗୁଁ ଜିଲ୍ଲାରେ ଭାଜପା ସଂଗଠନ ଦୁର୍ବଳ ହେଉଥିବା ଅଭିଯୋଗ ହୋଇଆସୁଥିଲା । ସାଂସଦ ସଂଗୀତା କୁମାରୀ ସିଂଦେଓ ପ୍ରତ୍ୟେକ ବିଧାନସଭା କ୍ଷେତ୍ରରେ ନିଜର କିଛି ଅନୁଗତଙ୍କୁ ଧରି ରାଜନୀତି କରୁଥିବାରୁ ସବୁ ଅଞ୍ଚଳରେ ସଂଗଠନ ବିଗିଡିଯାଇଛି । ସେହି କାରଣରୁ କେନ୍ଦ୍ରୀୟ ନେତୃତ୍ୱ ତାଙ୍କୁ ସାଂସଦ ପ୍ରାର୍ଥୀ ନ କରିବାକୁ କହୁଥିବା ଶୁଣାଯାଏ । ସେଥିପାଇଁ ଯାଦବ ସମାଜରୁ ଆସିଥିବା ବଳରାମ ସିଂଯାଦବ ଚଳିତଥର ୨୦୨୪ ନିର୍ବାଚନରେ ବିଜେପି ସାଂସଦ ପ୍ରାର୍ଥୀ ହେବେ ବୋଲି ଆଲୋଚନା ହେଉଥିଲା । କିନ୍ତୁ ଶେଷରେ କେନ୍ଦ୍ରୀୟ ନେତୃତ୍ୱ ପୁଣିଥରେ ସଂଗୀତାଙ୍କୁ ସାଂସଦ ପ୍ରାର୍ଥୀ କରିଛନ୍ତି ।

ଏହାକୁ ଅନେକ ପୁରୁଖା ବିଜେପି ନେତା/ନେତ୍ରୀ ବିରୋଧ କରୁଛନ୍ତି । ଦଳରେ ପୁରୁଣା କାର୍ଯ୍ୟକର୍ତ୍ତାଙ୍କୁ ସାଂସଦ ପଚାରୁନାହାଁନ୍ତି କି ସଂଗଠନ ମଧ୍ୟ ବଢାଉ ନାହାଁନ୍ତି । କେବଳ ମୋଦୀ ହାୱାରେ ସେ ଗତଥର ନିର୍ବାଚନ ଜିଣିଥିଲେ । ଚଳିତଥର ସେ ଜିଣିବା ବହୁତ କଷ୍ଟ ହେବ ବୋଲି ଦଳୀୟ କର୍ମି କହୁଛନ୍ତି । ତେବେ ଗତ ୬ ତାରିଖରେ ଜିଲ୍ଲା ବିଜେପି କାର୍ଯ୍ୟାଳୟରେ ବିଜେପି ଦଳର ପ୍ରତିଷ୍ଠା ଦିବସରେ କିଛି ଅଲ୍ପସଂଖ୍ୟକ ଲୋକ ଉପସ୍ଥିତ ଥିଲେ । ସାଂସଦ ସଂଗୀତା କୁମାରୀ ସିଂଦେଓ, ଜିଲ୍ଲା ସଭାପତି ଶୀବାଜୀ ମହାନ୍ତି ଓ ବଲାଙ୍ଗୀର ବିଜେପି ପ୍ରାର୍ଥୀ ଗୋପାଳଜୀ ପାଣିଗ୍ରାହୀଙ୍କ ସହ ଅଲ୍ପକିଛି କର୍ମୀ ଯୋଗ ଦେଇଥିଲେ । ଫଳରେ ଭାଜପା କର୍ମୀ ଙ୍କ ମଧ୍ୟରେ ଉତ୍ସାହ ନଥିବା ନେଇ ସୋସିଆଲ ମିଡିଆରେ ଆଲୋଚନା ହେଲା । ତେବେ ସେପଟେ ଏବେ ବିଦ୍ରୋହୀ ଭୂମିକାରେ ଥିବା ଯାଦବ ନେତା ବଳରାମ ସିଂଯାଦବଙ୍କ ଜନ୍ମଦିନ ଅପ୍ରେଲ ୭ ତାରିଖରେ ତାଙ୍କ ବାସଭବନ ଝାଙ୍କରପାଲିଠାରେ ଏକ ବିଶାଳ ସମାବେଶ ଅନୁଷ୍ଠିତ ହୋଇଥିଲା । ସେଠାରେ ସୋନପୁର ଓ ବଲାଙ୍ଗୀର ଜିଲ୍ଲାର ୧୪୦୦ଟି ବୁଥରୁ ପ୍ରାୟ ୬ହଜାର ବୁଥକମିଟି ମେମ୍ବର ଯୋଗ ଦେଇଥିଲେ । ଯାଦବନେତାଙ୍କ ଜନ୍ମଦିନ ଆଳରେ ହୋଇଥିବା ସମାବେଶରେ ଏତେସଂଖ୍ୟକ ଭାଜପା କର୍ମିଙ୍କ ଉପସ୍ଥ୍ରିତିକୁ ଲୋକମାନେ ଭିନ୍ନ ନଜରରେ ଦେଖୁଛନ୍ତି । ଜନ୍ମଦିନରେ ବଳରାମ ଓରଫ ବଲ୍ଲୁଭାଇ ନାମସଂକିର୍ତ୍ତନ କରାଇବା ସହିତ ବଜରଙ୍ଗଦଳ,ଆରଏସଏସ ସଂଗଠନ,ବିଶ୍ୱହିନ୍ଦୁପରିଷଦର ଭଳି ଭାଜପାର ଛାମୁଆଁ ସଂଗଠନର କର୍ମକର୍ତ୍ତାଙ୍କୁ ନେଇ ଭୋଜିଭାତର ଆସର ମଧ୍ୟ କରିଥିଲେ ଓ ସେମାନଙ୍କର ଆଶୀର୍ବାଦ ନେଇଥିଲେ । ଏପରିକି ବଲ୍ଲୁ ଗଣମାଧ୍ୟମ ଆଗରେ କହିଥିଲେ ଯେ,ସେମାନେ ଭାଜପା ବିରୋଧି ନୁହେଁ ବରଂ ବଲାଙ୍ଗୀର ବିଜେପିରେ ଚାଲିଥିବା ଏକଛତ୍ରବାଦ ବିରୋଧରେ ମେଳି ବୋଲି କହିଥିଲେ । ଆସନ୍ତା ନିର୍ବାଚନରେ ବଳରାମ ସ୍ୱାଧୀନପ୍ରାର୍ଥି ଭାବରେ ସାଂସଦ ପ୍ରାର୍ଥୀ ହୋଇ ଲଢିବେ ବୋଲି ତାଙ୍କ ସମର୍ଥକଙ୍କ ମତ ଲୋଡିଥିଲେ । ବଲାଙ୍ଗୀର ଓ ସୋନପୁର ଜିଲ୍ଲାରେ ଥିବା ଯାଦବ ଓ ଓବିସି ଭୋଟ ହାତେଇବାକୁ ଉଦ୍ୟମ କରାଯିବ ବୋଲି ବଳରାମଙ୍କ ସମର୍ଥକ କହିଛନ୍ତି । ମୁଖ୍ୟତଃ ସାଂସଦ ସଂଗୀତାକୁମାରୀ ସିଂଦେଓଙ୍କୁ ସୋନପୁର ଜିଲ୍ଲାରେ ପ୍ରବଳ ବିରୋଧ ହେଉଛି । ସେହି କାରଣରୁ ୭ ତାରିଖର ଏହି ସମାବେଶକୁ ସୋନପୁର ଜିଲ୍ଲାର ବହୁସଂଖ୍ୟାରେ କାର୍ଯ୍ୟକର୍ତ୍ତା ଯୋଗଦେଇଥିବା ଆଲୋଚନାର ବିଷୟ ହୋଇଛି । ସୋନପୁର ଜିଲ୍ଲାର ପୂର୍ବତନ ଜିଲ୍ଲା ଭାଜପା ସଭାପତି ବିଧାନ ପାଣିଗ୍ରାହୀ, ବଳଦେବ ପ୍ରସାଦ ବେଦବାକ, ପୂର୍ବତନ ଯୁବମୋର୍ଚ୍ଚା ସଭାପତି ବେଣୀମାଧବ ବେଦବାକ, ବଲାଙ୍ଗୀର ଜିଲ୍ଲାର ପୂର୍ବତନ ଭାଜପା ସଭାପତି ପ୍ରଭାସ ପାଣିଗ୍ରାହୀ, ଶଶୀଭୂଷଣ ଶତପଥିଙ୍କ ଭଳି ଶତାଧିକ ପୁରୁଣା କାର୍ଯ୍ୟକର୍ତ୍ତା ଏହି ସମାବେଶରେ ଯୋଗ ଦେଇଥିଲେ । ବଳରାମ ଓରଫ ବଲ୍ଲୁଙ୍କ ଏହି ସମାବେଶକୁ ନେଇ ଭାଜପା ଶିବିରରେ କମ୍ପନ ସୃଷ୍ଟି ହୋଇଛି । କେହି କାହାକୁ କିଛି ନକହିଲେ ହେଁ ବଳରାମଙ୍କ ଏହି ସମାବେଶ ଭାଜପା ପାଇଁ କଣ୍ଟା ସାଜିବ ବୋଲି ଆକଳନ କରାଯାଉଛି ।