30-Mar-2024

ବାଲାଙ୍ଗୀର(ପ୍ରେରଣା ଖବର): ରାଜ୍ୟରେ ମହିଳାମାନଙ୍କ ସ୍ୱୟଂସହାୟିକା ଗୋଷ୍ଠୀ ଜରିଆରେ ସରକାର ସ୍ୱାବଲମ୍ବି କରୁଥିବା କୁହାଯାଉଛି । ସେହିକ୍ରମରେ ସହରାଞ୍ଚଳ ହେଉ କି ଗ୍ରାମାଞ୍ଚଳ ସବୁଠି ଏସ୍‌ଏଚ୍‌ଜି ମହିଳାଙ୍କ ଭାଗିଦାରୀ ରହୁଛି । ଏସ୍‌ଏଚ୍‌ଜିଙ୍କ କାର୍ଯ୍ୟଦକ୍ଷତାକୁ ନେଇ ବଲାଙ୍ଗୀର ବିଧାୟକଙ୍କ କିଛି ବୟାନକୁ ନେଇ ବଲାଙ୍ଗୀର ରାଜନୀତି ସରଗରମ ହେଉଛି । ବଲାଙ୍ଗୀର ସଦର ବିଧାୟକ ନରସିଂହ ମିଶ୍ର ଓ ପୌରାଧ୍ୟକ୍ଷା ଲିକା ସାହୁଙ୍କ ମଧ୍ୟରେ ଏହାକୁ ନେଇ କଥାକଟାକଟି ଚାଲିଛି । ବଲାଙ୍ଗୀରରେ ଏସ୍‌ଏଚ୍‌ଜି ମହିଳାଙ୍କୁ ସଶକ୍ତିକରଣ ବନାମ ଅସମ୍ମାନକୁ ନେଇ ଆରମ୍ଭ ହୋଇଛି ରାଜନୀତି । ଦୁଇଟି ଘଟଣାରେ ବଲାଙ୍ଗୀର ବିଧାୟକ ମହିଳାଙ୍କୁ ନେଇ ଦେଇଥିବା ବୟାନ ଉପରେ ବିଜେଡି କାଉଣ୍ଟର ଆଟାକ କରୁଛି । ମିଡିଆ ଓ ସୋସିଆଲ ମିଡିଆରେ ଏହାକୁ ନେଇ ଯୋରଦାର ଟ୍ରୋଲିଂ ଚାଲିଛି । ଗତ ଜାନୁୟାରୀ ୩ ତାରିଖରେ ବଲାଙ୍ଗୀର ମାଗୁରବେଢାଠାରେ ମୁଖ୍ୟମନ୍ତ୍ରୀଙ୍କ ଉପସ୍ଥିତିରେ ବଲାଙ୍ଗୀରର କଂଗ୍ରେସ ବିଧାୟକ ନରସିଂହ ମିଶ୍ର ଉପସ୍ଥିତ ଲୋକଙ୍କୁ ଭଡାଟିଆ ବୋଲି କହିଥିଲେ । ସେହି ଘଟଣାରେ ମହିଳା ବିଜୁଜନତାଦଳ ତରଫରୁ ସାମ୍ବାଦିକ ସମ୍ବିଳନୀ କରାଯାଇ ବିଧାୟକଙ୍କ ଏଭଳି ମନ୍ତବ୍ୟକୁ ତୀବ୍ର ନିନ୍ଦା କରାଯାଇଥିଲା । ଆମେ ଭଡାଟିଆ କି ବୋଲି ପ୍ରଶ୍ନ କରି ଜିଲ୍ଲାପରିଷଦ ସଭାପତି ଦେବକୀ ସାହୁ,ଜିଲ୍ଲା ମହିଳା ବିଜେଡିଦଳର ସଭାନେତ୍ରୀ ଦମୟନ୍ତି ବାଗ ସମେତ ତାଙ୍କ ଟିମ ବିଧାୟକଙ୍କୁ ତୀବ୍ର ସମାଲୋଚନା କରିଥିଲେ । ଏବେ କିଛିଦିନ ତଳେ କଂଗ୍ରେସ ବିଧାୟକ ନରସିଂହ ମିଶ୍ର ଏକ ସାମ୍ବାଦିକ ସମ୍ବିଳନୀରେ ବିଭିନ୍ନ ପ୍ରସଙ୍ଗ ସହ ବଲାଙ୍ଗୀର ସହରର ମହାରାଣୀସାଗର ପ୍ରସଙ୍ଗ ଉଠାଇଥିଲେ । ବଲାଙ୍ଗୀର ପୌରପାଳିକା ମହାରାଣୀ ସାଗର ଭଳି ବଡପ୍ରକଲ୍ପର କାମ  ମହିଳା ଏସଏଚଜିଙ୍କୁ ଠିକାକାମ କରିବାକୁ ଦେଇଛି । ଏସ୍‌ଏଚ୍‌ଜି ମହିଳାମାନେ ଏଭଳି ଠିକାକାମ କରାଇପାରିବେ ନାହିଁ ବୋଲି ବିଧାୟକ କହିଥିଲେ ଓ ଏସ୍‌ଏଚ୍‌ଜି ମହିଳାଙ୍କ ଯୋଗ୍ୟତା ନେଇ ପ୍ରଶ୍ନ ଉଠାଇଥିଲେ । ବିଧାୟକଙ୍କ ଏହି ପ୍ରଶ୍ନର ଉତ୍ତର ରଖିଛନ୍ତି ବଲାଙ୍ଗୀର ପୌରାଧ୍ୟକ୍ଷା ଲିକା ସାହୁ । ପୌରାଧ୍ୟକ୍ଷା ଲିକା ସାହୁ ଉତ୍ତର ରଖି କହିଛନ୍ତି ଯେ,ଭାରତର ରାଷ୍ଟ୍ରପତି ପଦ ଭଳି ଗୁରୁତ୍ୱପୂର୍ଣ୍ଣ ପଦବୀରେ ଜଣେ ମହିଳା ବସିଛନ୍ତି । ଆଜି ସାରା ବିଶ୍ୱରେ ମହିଳାଙ୍କ ଅଧିକାରକୁ ନେଇ ସମସ୍ତେ ଆଗଭର ହେଉଛନ୍ତି । ଓଡିଶାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମହିଳାଙ୍କୁ ସମ୍ମାନ ଜଣାଇ ସ୍ୱାବଲମ୍ବି ହେବାକୁ ଅଗ୍ରାଧିକାର ଦେଉଛନ୍ତି । ଆଜି ଏସ୍‌ଏଚ୍‌ଜି ଜରିଆରେ ମହିଳାମାନେ ନିଜେ ଅର୍ଥ ରୋଜଗାରର ପନ୍ଥା ପାଉଛନ୍ତି । ମୂଳରୁ ବିଧାୟକ ପୌରପାଳିକାର ଉନ୍ନୟନ କାମରେ ଅସହିଷ୍ଣୁ ହୋଇପଡିଛନ୍ତି ଓ ଆଜି ମହିଳାଙ୍କ ଯୋଗ୍ୟତା ଉପରେ ପ୍ରଶ୍ନ ଉଠାଇ ତାଙ୍କୁ ଅସମ୍ମାନ କରୁଛନ୍ତି ବୋଲି ପୌରାଧ୍ୟକ୍ଷା ଲିକା ସାହୁ କହିଛନ୍ତି । ତେବେ ଆଗକୁ ନିର୍ବାଚନ ଆସୁଥିବାରୁ ଉଭୟ କଂଗ୍ରେସ ଓ ବିଜେଡିର ଏଭଳି ତୁତୁ ମେମେକୁ ନେଇ ବଲାଙ୍ଗୀର ସହରରେ ଚର୍ଚ୍ଚା ଯୋର ଧରିଛି ।