24-Feb-2024

ସୋନପୁର (ପ୍ରେରଣା ଖବର )ମାଘମାସ ଚତୁର୍ଦ୍ଦଶୀରେ ସୁବର୍ଣ୍ଣପୁର ଜିଲ୍ଲା ଖଲିଆପାଲି ସ୍ଥିତ ସନ୍ଥକବି ଭୀମଭୋଇଙ୍କ ସାଧାନା,ସିଦ୍ଧି ଓ ସମାଧିପୀଠଠାରେ ସାରସ୍ୱତ ମାଘମେଳା ଅନୁଷ୍ଠିତ ହୋଇଯାଇଛି ।

ଭୀମଭୋଇ ସମାଧିପୀଠ ଟ୍ରଷ୍ଟ ଓ ଜିଲ୍ଲାପ୍ରଶାସନର ମିଳିତ ଆନୁକୂଲ୍ୟରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ମୁଖ୍ୟଅତିଥି ଭାବରେ ସୋନପୁର ବିଧାୟକ ତଥା ସ୍ୱାସ୍ଥ୍ୟ ଓ ପରିବାରକଲ୍ୟାଣମନ୍ତ୍ରୀ ନିରଂଜନ ପୂଜାହାରୀ ଯୋଗଦେଇ କହିଛନ୍ତି ଯେ,ସୁବର୍ଣ୍ଣପୁର ଜିଲ୍ଲାର ପ୍ରମୁଖ ପର୍ଯ୍ୟଟନସ୍ଥଳି ମହିମାପୀଠ ଓ ଖଲିଆପାଲି ଅଞ୍ଚଳର ଭିତ୍ତିଭୂମିର ବିକାଶ କରାଯାଉଛି । ଖଲିଆପାଲିକୁ ସବୁଦିଗରୁ ଗମନାଗମନର ସୁବିଧା ପାଇଁ ଉନ୍ନତ ରାସ୍ତାନିର୍ମାଣ କରାଯାଇଛି lଏବେ ଅଙ୍ଗନଦୀରେ ଆଉ ଏକ ପୋଲ ନିର୍ମାଣ ପାଇଁ ଟେଣ୍ଡର ହୋଇଛି ବୋଲି ସୂଚନା ଦେଇଛନ୍ତି । ସେହିପରି ମହିମାପୀଠର ଉନ୍ନତିକରଣ ପାଇଁ ପର୍ଯ୍ୟଟନ ବିଭାଗ ୫୦ଲକ୍ଷ ଟଙ୍କାର ଅନୁଦାନ ଦେଇଥିବା ବେଳେ ୫ଟି ସଚିବଙ୍କ ପରିଦର୍ଶନ ପରେ ଆଉ ୭୦ଲକ୍ଷ ଟଙ୍କାର ଅନୁଦାନ ପାଇଁ ପ୍ରସ୍ତାବ ଦିଆଯାଇଥିବା

ମନ୍ତ୍ରୀ କହିଥିଲେ । ସମାଧିପୀଠ ଟ୍ରଷ୍ଟର ମେନେଜିଂଟ୍ରଷ୍ଟି ଛତ୍ରଧାରୀ ଅଗ୍ରୱାଲଙ୍କ ସଭାପତିତ୍ୱ ଓ ସାମ୍ବାଦିକ ମାନଭଞ୍ଜନ ମିଶ୍ରଙ୍କ ସଂଯୋଜନାରେ ଅନୁଷ୍ଠିତ ଏହି ସାରସ୍ୱତ ସମାରୋହରେ ସମ୍ମାନୀତ ଅତିଥି ଭାବରେ ସୋନପୁର ଉପଜିଲ୍ଲାପାଳ ସୁବ୍ରତ ପଟ୍ଟନାୟକ ଓ ସୋନପୁର ବ୍ଲକ ଅଧ୍ୟକ୍ଷ ପ୍ରହଲ୍ଲାଦ ନାୟକ ଯୋଗଦେଇଥିଲେ । ମେନେଜିଂଟ୍ରଷ୍ଟି ଛତ୍ରଧାରୀ ଅଗ୍ରୱାଲ ବିବରଣୀ ପଠନ କରିଥିଲେ ।  ଟ୍ରଷ୍ଟ ପକ୍ଷରୁ ଅବସରପ୍ରାପ୍ତ ପ୍ରଶାସନିକ ଅଧିକାରୀ ମିହିରଚନ୍ଦ ମଲ୍ଲିକଙ୍କୁ ଭୀମଭୋଇ ସ୍ମୃତିସମ୍ମାନ,କବି ଆର୍ତ୍ତତ୍ରାଣ ବାବୁଙ୍କୁ ଭୀମଭୋଇ ସାହିତ୍ୟ ସମ୍ମାନ,ଡ.ଶଙ୍କର ରାମଚନ୍ଦାନୀଙ୍କୁ ଭୀମଭୋଇ ଯୁବପ୍ରତିଭା ସମ୍ମାନ,ଭକ୍ତ ଠାକୁର ସୁନାଙ୍କୁ ଭୀମଭୋଇ ମହିମା ସମ୍ମାନ,ବନବାସ ମେହେରଙ୍କୁ ଭୀମଭୋଇ କଳା ସମ୍ମାନ ଓ ସୁଶ୍ରୀ ପ୍ରାଚୀପରମିତା ସାହୁଙ୍କୁ ଭୀମଭୋଇ କ୍ରୀଡାସମ୍ମାନ ପ୍ରଦାନ କରାଯାଇଥିଲା । ଏହି ଅବସରରେ

ପ୍ରତିବର୍ଷ ଭଳି ଚଳିତବର୍ଷ ମଧ୍ୟ ସମାଧିପୀଠ ଟ୍ରଷ୍ଟର ମୁଖପତ୍ର ମହିମା ପତ୍ରିକାକୁ ଅତିଥିଗଣ ଉନ୍ମୋଚନ କରିଥିଲେ । ଗତ ୨୧ ତାରିଖ ଠାରୁ ଆରମ୍ଭ କରି ଏହି ମାଘମେଳା ୨୫ ତାରିଖ ପର୍ଯ୍ୟନ୍ତ ଚାଲିବାର ରହିଛି । ପ୍ରତିଦିନ ଭୀମଭୋଇ କଳାମଣ୍ଡପରେ ସାଂସ୍କୃତିକ କାର୍ଯ୍ୟକ୍ରମ ମଧ୍ୟ ପ୍ରଦର୍ଶନ କରାଯାଉଛି । ଆଜି ବିଶିଷ୍ଟ ସିନେ ଅଭିନେତ୍ରୀ ଅର୍ଚ୍ଚିତା ସାହୁ ମଧ୍ୟ ଆସି ଏହି କାର୍ଯ୍ୟକ୍ରମରେ ଯୋଗଦେଇଥିଲେ । ସେପଟେ ମାଘମେଳା ପାଇଁ ମହିମାଧର୍ମିଙ୍କ ଭିଡ ପରିଲକ୍ଷିତ ହୋଇଛି । ହଜାର ହଜାର ସଂଖ୍ୟାରେ ଭକ୍ତ ଓ ମହିମା ସାଧୁସନ୍ଥମାନେ ବହୁ ଦୂରଦୂରାନ୍ତରୁ ଆସି ସନ୍ଥକବି ଭୀମଭୋଇଙ୍କ ସମାଧି ମନ୍ଦିରରେ ଦର୍ଶନ କରୁଛନ୍ତି l