23-Feb-2024

ସୋନପୁର:  ସନ୍ଥକବି ଭୀମଭୋଇଙ୍କ ସାଧନା,ସିଦ୍ଧି ଓ ସମାଧିପୀଠ ଖଲିଆପାଲିଠାରେ ପବିତ୍ର ମାଘମେଳା ଅନୁଷ୍ଠିତ ହେଉଛି । ଗତ ୨୧ ତାରିଖରୁ ଏହା ଆରମ୍ଭ ହୋଇଛି । ଭୀମଭୋଇ ସଂସ୍କୃତି ମଣ୍ଡପଠାରେ ଆୟୋଜିତ ହେଉଥିବା ସାଂସ୍କୃତିକ ସଂଧ୍ୟାର ଦ୍ୱିତୀୟ ଦିନରେ ମୁଖ୍ୟଅତିଥି ଭାବରେ ବଲାଙ୍ଗୀର କେନ୍ଦ୍ର ସମବାୟ ବ୍ୟାଙ୍କର ପୂର୍ବତନ ସଭାପତି ଲକ୍ଷ୍ମଣ କୁମାର ମେହେର ଯୋଗଦେଇ ସନ୍ଥକବି ସୋନପୁର ମାଟିକୁ ମହିମାନ୍ୱିତ କରିଛନ୍ତି ବୋଲି କହିଛନ୍ତି । ଖଲିଆପାଲି ମାଟିରୁ ଭୀମଭୋଇ ସମଗ୍ର ବିଶ୍ୱକୁ ନୂଆ ଦିଗଦର୍ଶନ ଦେଇ ତାଙ୍କର ମହାନବାଣୀ ଉଦଘୋଷଣା କରିଥିଲେ । ସୋନପୁର ଜିଲ୍ଲାର ବିନିକାର ସ୍ୱର୍ଗତ ସ୍ୱାଧିନତା ସଂଗ୍ରାମୀ ଗୁରୁବାରୀ ମେହେର, ମନ୍ଦିରମାଳିନୀ ସୋନପୁର, ପାତା  ପାତାଳୀ ଶ୍ରୀକ୍ଷେତ୍ର ଇତ୍ୟାଦି ସହ ବୁଣାକାରଙ୍କ କଳାକାରୀକୁ ପ୍ରଶଂସା କରିବା ସହିତ ଏହି ମାଟି ଏକ ତ୍ୟାଗ ଓ ବଳିଦାନର ମାଟି ବୋଲି ଶ୍ରୀ ମେହେର କହିଥିଲେ । କଳାକାର ଚୌଧୁରୀ ବିଭାରଙ୍କ ସଂଯୋଜନାରେ ଅନୁଷ୍ଠିତ ଏହି ସମାରୋହରେ ସମ୍ମାନୀତ ଅତିଥି ଭାବରେ ସମାଜସେବୀ ମେଘନାଥ ପଧାନ, ଖଲିଆପାଲି ହାଇସ୍କୁଲର ପ୍ରଧାନଶିକ୍ଷକ ପଦ୍ମନାଭ ପଣ୍ଡା, ଉଚ୍ଚପ୍ରାଥମିକ ବିଦ୍ୟାଳୟର ପ୍ରଧାନଶିକ୍ଷକ ଲୋକନାଥ ଦାସ,

ମାଘମେଳା ପରିଚାଳନା କମିଟିର ଚନ୍ଦନ ମହାନ୍ତି ଓ ରୂଦ୍ରଦେବ  ଦାନୀ ମଞ୍ଚାସୀନ ଥିଲେ । ଏହି ଅବସରେରେ ସୋନପୁର ପଏଁରୀ ଅନୁଷ୍ଠାନର କଳାକାରମାନେ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରିଥିଲେ । ଭୀମଭୋଇ ସମାଧି ପୀଠ ଟ୍ରଷ୍ଟର ମେନେଜିଂ ଟ୍ରଷ୍ଟି ଛତ୍ରଧାରୀ ଅଗ୍ରୱାଲ, ସୋନପୁର ବ୍ଲକ ଅଧ୍ୟକ୍ଷ ପ୍ରହଲ୍ଲାଦ ନାୟକ, ବରିଷ୍ଠ ନାଗରିକ ମହାଦେବ ବଗର୍ତ୍ତି, ମାଘମେଳା କମିଟିର ସୁମନ୍ତ ପୁଟେଲ, ବିଭୁତୀଭୂଷଣ ନେଗୀ, ସତ୍ୟନାରାୟଣ ପୂଜାହାରୀ ପ୍ରମୁଖ କର୍ମକର୍ତ୍ତାଙ୍କ ସମେତ ହଜାର ସଂଖ୍ୟାରେ ଦର୍ଶକ ଉପସ୍ଥିତ ରହିଥିଲେ । ମହିମାପୀଠରେ ହଜାର ହଜାର ସଂଖ୍ୟାରେ ମହିମାଧର୍ମିଙ୍କ ସମାଗମ ହୋଇଛି ।