14-Feb-2024

ବିନିକା(ହିମାଂଶୁ ଶେଖର ପୁଟେଲ)ବିନିକାର ପର୍ଯ୍ୟଟନସ୍ଥଳୀ ପାପକ୍ଷୟ ଠାରେ ନିର୍ମାଣ ହୋଇଥିବା ପ୍ରଭୁ ଜଗନ୍ନାଥଙ୍କ ଭବ୍ୟ ମନ୍ଦିର ପ୍ରତିଷ୍ଠା ଉତ୍ସବ କାର୍ଯ୍ୟକ୍ରମ ଆଜିଠାରୁ ଆରମ୍ଭ ହୋଇଛି ।ଏଥିପାଇଁ ପୁଣ୍ୟପୀଠ ପରିସର ଶ୍ରଦ୍ଧାଳୁ ଭକ୍ତଙ୍କ ସମାଗମରେ ଉତ୍ସବ ମୁଖରିତ ହୋଇପଡ଼ିଛି । ଅଞ୍ଚଳବାସୀଙ୍କ ଆର୍ଥିକ ସହଯୋଗ ଓ କିଛି ପରିମାଣରେ ସରକାରୀ ଅନୁଦାନ ପ୍ରଦାନ ପରେ ଏହି ବିରାଟ ଜଗନ୍ନାଥ ମନ୍ଦିର ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ ହୋଇଅଛି ।ମନ୍ଦିର ପ୍ରତିଷ୍ଠା କାର୍ଯ୍ୟକ୍ରମ ଚଳିତ ମାସ ୨୧ତାରିଖ ପର୍ଯ୍ୟନ୍ତ ଚାଲିବ ।ପର୍ଯ୍ୟଟନ ସ୍ଥଳୀରେ ପ୍ରଭୁ ଶିବ ପାର୍ବତୀ,ହନୁମାନ ଓ ରାଧାକୃଷ୍ଣ ମନ୍ଦିର ରହିଛି । ଏଣିକି ଜଗତର ନାଥ ଜଗନ୍ନାଥଙ୍କ ମନ୍ଦିର ନିର୍ମାଣ ପରେ ପ୍ରଭୁ ଜଗନ୍ନାଥ,ବଳଭଦ୍ର ଓ ସୁଭଦ୍ରାଙ୍କୁ ମଧ୍ୟ ପର୍ଯ୍ୟଟକ ଓ ଶ୍ରଦ୍ଧାଳୁ ଭକ୍ତ ଦର୍ଶନ କରିବାର ସୁଯୋଗ ପାଇଥିବାରୁ ତାଙ୍କ ମହଲରେ ଉତ୍ସାହର ବାତାବରଣ ସୃଷ୍ଟି କରିଛି।ପ୍ରତିଦିନ ତିନି ଦିଅଁ ଙ୍କ ଦର୍ଶନ ପାଇଁ ଭକ୍ତ ଚାତକ ପରି ଅପେକ୍ଷା କରିଛନ୍ତି ।ଆଜି ପ୍ରତିଷ୍ଠା ଉତ୍ସବର ପ୍ରାରମ୍ଭରେ ଜଗନ୍ନାଥଙ୍କ ମନ୍ଦିର ପ୍ରାଙ୍ଗଣରେ ଅଞ୍ଚଳର ଶତାଧିକ ମହିଳାଙ୍କ ସମାବେଶ ହୋଇଥିଲା ପରେ ଏକ ବିରାଟ ଶୋଭାଯାତ୍ରାରେ ପୂଜା କର୍ତାଙ୍କ ସହ ପୁରୁଷ ଓ ମହିଳା ଭକ୍ତ ମାନେ ଚିରସ୍ରୋତା ମହାନଦୀକୁ ଯାଇ ପୁଣ୍ୟ ଜଳ ସଂଗ୍ରହ କରିଥିଲେ।ଶୋଭାଯାତ୍ରାରେ  ଘଣ୍ଟ,ଶଙ୍ଖ,ହୁଳହୁଳି ସହ ଭକ୍ତଙ୍କ ଜୟ ଧ୍ୱନିରେ ପରିବେଶ ପ୍ରକମ୍ବିତ ହୋଇଥିଲା ।ଯେଉଁ ଆଡେ ଦେଖିବ ଶ୍ରଦ୍ଧାଳୁ ଭକ୍ତଙ୍କ ଭକ୍ତିମୟ ସମାବେଶ ପର୍ଯ୍ୟଟନ କ୍ଷେତ୍ରକୁ ଉତ୍ସବ ମୁଖରିତ କରିଥିଲା ।କଳସ ଧରି ଶୋଭାଯାତ୍ରା କାରି ମନ୍ଦିରକୁ ପହଞ୍ଚିବା ପରେ ରୀତିନୀତି ଅନୁଯାୟୀ ପୂଜକ ମାନଙ୍କ ଦ୍ଵାରା ପୂଜାର୍ଚ୍ଚନା କରାଯାଇ ମଣ୍ଡପରେ କଳସ ସ୍ଥାପନ କରାଯାଇଥିଲା ।ଏହି ପରିପ୍ରେକ୍ଷୀରେ ୫୬ପ୍ରହରୀ ନାମଯଜ୍ଞ ରାତିଦିନ ଅନୁଷ୍ଟିତ ହେଉଥିବା ବେଳେ ବିଭିନ୍ନ ଦିବସରେ ରାମାୟଣ ପାରାୟଣ,ବିଷ୍ଣୁ ସହସ୍ର ନାମ, ସୁନ୍ଦରାକାଣ୍ଡ ପାରାୟଣ,ଗୋପାଳ ସହସ୍ର ନାମ,ଦେବଗଣଙ୍କ ପ୍ରାଣ

ପ୍ରତିଷ୍ଠା,ଅନନ୍ତ ମୁଖି ପଠନ,ବିଗ୍ରହଙ୍କ ମଣ୍ଡପେ ପୂଜାବିଧି,ଶିଖରରେ କଳସ, ସ୍ଥାପନ,ଧ୍ଵଜା ରୋହଣ,ମନ୍ଦିର ପ୍ରତିଷ୍ଠା,ବିଗ୍ରହଙ୍କ ସିଂହାସନ ରୋହଣ କାର୍ଯ୍ୟକ୍ରମ ଅନୁଷ୍ଟିତ ହେବ ।ଅନ୍ୟ ପକ୍ଷରେ ଏଠାରେ ବିରାଟ ଉଚ୍ଚରେ ନିର୍ମିତ ହନୁମାନଙ୍କ ବିଗ୍ରହ ଭକ୍ତଙ୍କ ପାଇଁ ଆକର୍ଷଣର କେନ୍ଦ୍ରବିନ୍ଦୁ ପାଲଟିଛି ।ସେହିପରି ଏଠାରେ ଥିବା ବଟବୃକ୍ଷ ଅର୍ଗଲିରେ ଗଲି ଯେଉଁ ବ୍ୟକ୍ତି ଏପଟରୁ ସେପଟକୁ ଯାଇଥାଏ କୁଆଡେ ତାର ପାପ କ୍ଷୟ ହୋଇଥାଏ ବୋଲି ବିଶ୍ୱାସ ରହିଥିବାରୁ ନୀତି ପ୍ରତିଦିନ ଏହି ପୁଣ୍ୟପୀଠ କୁ ହଜାର ହଜାର ଶ୍ରଦ୍ଧାଳୁ ଭକ୍ତ ଓ ପର୍ଯ୍ୟଟକମାନେ ଆସିଥାନ୍ତି ।ବର୍ତମାନ ଏହି ପୀଠ ପରିସରରେ ଜଗନ୍ନାଥଙ୍କ ଭବ୍ୟ ମନ୍ଦିର ପ୍ରତିଷ୍ଠା କାର୍ଯ୍ୟକ୍ରମ ଥିବାରୁ ବିଗ୍ରହଙ୍କ ଦର୍ଶନ ନିମନ୍ତେ ଓ ପୁଣ୍ୟତୋୟା ପାପକ୍ଷୟ ରେ ନିଜର ପାପକୁ ମୁକ୍ତ କରିବା ପାଇଁ ଲକ୍ଷାଧିକ ଭକ୍ତ ଓ ପର୍ଯ୍ୟଟକଙ୍କ ସମାଗମ ହେବାର ଆଶଙ୍କା ରହିଛି।