20-Dec-2020

ନୟାଗଡ଼, (ପ୍ରଦୀପ କୁମାର ପଣ୍ଡା)- ଗଣିଆ ବନାଞ୍ଚଳ ଅଧିକାରୀ ସୋନାଲି ସିଓ ଗତକାଲି ବିଳମ୍ବିତ ରାତିରେ ଚାରିଜଣ ବାରହା ଶିକାରୀଙ୍କୁ କାବୁ କରି ଆଜି କୋର୍ଟ ଚାଲାଣ କରିଛନ୍ତି | ସୂଚନା ମୁତାବକ ଗତକାଲି ରାତି ୮ ଘଟିକା ସମୟରେ ମିସ ସିଓ ଖବର ପାଇଥିଲେ ମଧ୍ୟଖଣ୍ଡ ବନଖଣ୍ଡ ଅନ୍ତର୍ଗତ ସିଲିଗାଡି ଜଙ୍ଗଲରେ ବାରହା ଶିକାର ହୋଇଛି | ଗଣିଆ ଠାରୁ ପ୍ରାୟ 50କିଲୋମିଟର ଦୂର ଏହି ଘଟଣା ସ୍ଥଳରେ ରାତି ଦଶଟା ସମୟରେ ପହଂଚି ଚାରିଜଣ ଶିକାରୀ ଙ୍କୁ ବାରହା ମାଂସ ରାନ୍ଧିବା ସମୟରେ କାବୁକରି ନେଇଥିଲେ ବନବିଭାଗ ଟିମ | ଚାରି ଶିକାରୀଙ୍କୁ ଗଣିଆ ବନବିଭାଗ ଅଧିକାରୀଙ୍କ କାର୍ଯ୍ୟାଳୟକୁ ଆଣି ଜେରା କଲାପରେ ସେ ବାରହା ଶିକାର କରି ମାଂସ ବିକ୍ରି କରିବାପରେ ବାକି ମାଂସ ନିଜେ ଖାଇବା ପାଇଁ ରାନ୍ଧୁ ଥିଲେ ବୋଲି କହିଛନ୍ତି | ପ୍ରକାଶ ଥାଉକି ସୋନାଲି ସିଓ ୩ ଜଣ ଗାର୍ଡ ଏବଂ ଜଣେ ଫରେଷ୍ଟର ଙ୍କୁ ନେଇ ସିଲିଗାଡି  ପଂହଁଚିବା ପରେ ସେଠାରୁ ସେ 3କିଲୋ ବାରହା ମାଂସ ସହିତ କଡେଇ, ଚଟୁ, କଟୁରୀ, ତାର ଏବଂ ବାଉଁଶ କାଠି ଜବତ କରିବା ସହିତ  କାହ୍ନୁ ବେହେରା, ପ୍ରଦୀପ ଘଣ୍ଟ, ପ୍ରକାଶ ବେହେରା ଏବଂ ସୁଶାନ୍ତ ନାୟକଙ୍କୁ ଗଣିଆ ଆଣିଥିଲେ | ଆଜି ସେମାନଙ୍କ ଡାକ୍ତରୀ ପରୀକ୍ଷା ପରେ ଦଶପଲ୍ଲା କୋର୍ଟ କୁ ଚାଲାଣ କରିଛନ୍ତି |