20-Dec-2020

ବୁର୍ଲା,(ଦେବାଶିଷ ବେହେରା) : ସମ୍ବଲପୁର-ସୋନପୁର ମୁଖ୍ୟ ରାସ୍ତା ବଡମାଲ ସୋଲାର ପ୍ଲାଣ୍ଟ ନିକଟରେ ଏକ କାର୍‌ ଦୁର୍ଘଟଣାଗ୍ରସ୍ତ ହୋଇଛି ।ଏଥିରେ ଜଣଙ୍କର ମୃତ୍ୟୁ ଘଟିଥିବା ବେଳେ ଅନ୍ୟ ଜଣେ ଗୁରୁତର ଆହତ ହୋଇ ବୁର୍ଲାରେ ଚିକିତ୍ସାଧୀନ  ଅଛନ୍ତି । ମୃତକ ଜଣକ ହେଲେ ବରଗଡ ଜିଲ୍ଲା ଭେଡେନ୍‌ ଥାନା ବୁର୍ଦା ଗାଁର ପଦ୍ମାଳୟା ପଣ୍ଡା (୭୮) ଓ ଆହତ ଜଣକ ହେଲେ ମୃତକଙ୍କ ପୁଅ ସୁଶାନ୍ତ ପଣ୍ଡା(୫୩) ।
ସୂଚନା ମତେ ସୁଶାନ୍ତ ଓ ତାଙ୍କ ମାଁ ପଦ୍ମାଳୟା କୌଣସି କାମରେ ନିଜ ଗାଁରୁ କାରରେ(ଓଡି ୧୭ କ୍ୟୁ ୩୨୧୯) ଉଲୁଣ୍ଡା ଅଭିମୁଖେ ଯାଉଥିଲେ । ଉକ୍ତ ସ୍ଥାନରେ କାରଟି ଭାରସାମ୍ୟ ହରାଇ ରାସ୍ତା କଡରେ ଥିବା ଏକ ଗଛରେ ଧକ୍କା ହୋଇଥିଲା । ଏଥରେ ସୁଶାନ୍ତ ଏବଂ ତାଙ୍କ ମାଁ ଗୁରୁତର ଆହତ ହୋଇଥିଲେ । ଉଭୟଙ୍କୁ ସ୍ଥାନୀୟ ଲୋକେ ଉଦ୍ଧାର କରି ଏକ ଆମ୍ବୁଲାନ୍ସରେ ପ୍ରଥମେ ଉଲୁଣ୍ଡା ଓ ପରେ ବୁର୍ଲାକୁ ଆଣାଯାଇଥିଲା । ବୁର୍ଲାରେ ପଦ୍ମାଳୟାଙ୍କୁ ଡାକ୍ତର ମୃତ ଘୋଷଣା କରିଥିବା ବେଳେ ସୁଶାନ୍ତଙ୍କୁ ଗୁରୁତର ଅବସ୍ଥାରେ ମେଡିକାଲରେ ଭର୍ତ୍ତି କରାଯାଇଛି । ତେବେ ପୁଲିସ ଏକ ମାମ୍‌ଲା ରୁଜୁ କରି ପଦ୍ମାଳୟାଙ୍କ ଶବ ଜବତ କରି ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଛି ।