03-Feb-2024

କଣ୍ଟାମାଳ(ଜୟ କୁମାର ମହାରଣାଙ୍କ ରିପୋର୍ଟ ): କଣ୍ଟାମାଳ ବ୍ଲକ ଘଣ୍ଟାପଡ଼ା ଥାନା ଅଧିନ ଖୁଣ୍ଟିଗୋରା ପଞ୍ଚାୟତ ଅଞ୍ଚଳରେ ଗତ କିଛିଦିନ ହେବ ନକଲି ନୋଟ କାରବାର ଚାଲିଥିବା ନେଇ ଅଞ୍ଚଳରେ ଚର୍ଚ୍ଚା ହେଉଛି l ଅଞ୍ଚଳରେ ଜାଲ ନୋଟ କାରବାର ଚାଲିଥିଲେ ହେଁ ପୋଲିସ ପାଖରେ କୌଣସି ପ୍ରକାର ଅଭିଯୋଗ ନାହିଁ କିମ୍ବା ଏନେଇ ପୋଲିସ ମଧ୍ୟ କୌଣସି ସୁରାକ ନପାଇବା ଲୋକଙ୍କୁ ବିସ୍ମିତ କରିଛି l ପୌଷ ପୂର୍ଣ୍ଣିମା ସମୟରେ ଗୋଛାଗୋରା ଯାତ୍ରା ପଡିଆରେ କେହି ଜଣେ ବ୍ୟକ୍ତି ଏକ ଚାର୍ଟ ଦୋକାନରୁ ଚାର୍ଟ ଖାଇ ୨୦୦ ଟଙ୍କିଆ ନୋଟ ଦେଇ ଚାଲି ଯାଇଥିଲା l ପରବର୍ତ୍ତୀ ସମୟରେ ତାହା ନକଲି ବୋଲି ଜଣା ପଡ଼ିଥିଲେ ହେଁ ଚାର୍ଟ ଦୋକାନୀ ଜଣକୁ କୌଣସି କାରଣରୁ ପୋଲିସକୁ ଜଣାଇ ନଥିଲା l ଗତ ଗୁରୁବାର ଖୁଣ୍ଟିଗୋରା ଛକ ସ୍ଥିତ ଏକ ଔଷଧ ଦୋକାନରୁ କେହି ଔଷଧ ନେଇ ୨୦୦ ଟଙ୍କିଆ ନୋଟ ଦେଇଥିଲା l ଦୋକାନୀ ବ୍ୟସ୍ତଥିବାରୁ ସେ

ଜାଣିପାରି ନଥିଲେ କିନ୍ତୁ କିଛିକ୍ଷଣ ପରେ ଦେଖିବାରୁ ତାହା ଜାଲ ନୋଟ ବୋଲି ଜଣା ପଡିଛି l ଦୋକାନୀ ଜଣକ ଏପର୍ଯ୍ୟନ୍ତ ପୋଲିସକୁ ଜଣାଇ ନଥିବା ଜଣାଯାଇଛି l ଗତବର୍ଷ ମଇ ମାସରେ ମସିଣାଗୋରା ଗ୍ରାମର ଲକ୍ଷ୍ମଣ କଲତା ମେଣ୍ଢା ବିକିବାକୁ ଆମ୍ବଗାଁ ବଜାର ଯାଉଥିବା ସମୟରେ ଦୁଇଜଣ ବ୍ୟକ୍ତି ଏକ ବାଇକରେ ଆସି ରାସ୍ତାରେ ମୁଲଚାଲ କରି ୧୨ହାଜର ୫ଶହ ଟଙ୍କାରେ ସ୍ଥିର କରି ୨୫ଟି ୫ଶହ ଟଙ୍କିଆ ନୋଟ ଦେଇ ମେଣ୍ଢା ନେଇ ଚାଲି ଯାଇଥିଲେ l ଘରକୁ ଆସି ଦେଖିବାରୁ ସମସ୍ତ ନୋଟ ଜାଲ ବୋଲି ଜଣା ପଡିଥିଲା l ତେବେ ବର୍ତ୍ତମାନ ବିଭିନ୍ନ ସ୍ଥାନରେ ଜାଲ ନୋଟ ଘୁରି ବୁଲୁଥିବା ନେଇ ଅଞ୍ଚଳରେ ଚର୍ଚ୍ଚା ହେଉଛି l ଟଙ୍କା ଦେଣନେଣ ସମୟରେ ସମସ୍ତେ ଜାଗ୍ରତ ରହିବା ଉଚିତ l ପୋଲିସ ଏଦିଗରେ ତଦନ୍ତ ପୂର୍ବକ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସାଧାରଣରେ ଦାବି ହେଉଛି l