30-Jan-2024

ବଲାଙ୍ଗୀର(ଚିତ୍ରସେନ ବେହେରା)-ବଲାଙ୍ଗୀର ଭୀମଭୋଇ ମେଡିକାଲକଲେଜ ହସପିଟାଲରେ ବାରମ୍ବାର ଚିକିତ୍ସାରେ ଅବହେଳା ଅଭିଯୋଗ ଉଠୁଛି । ଅନେକଥର ଏନେଇ ରୋଗୀମାନଙ୍କ ପରିବାର ବର୍ଗ ଡାକ୍ତରଙ୍କୁ ଆକ୍ରମଣ ମଧ୍ୟ କରୁଥିବାରୁ ହସପିଟାଲ ଅଶାନ୍ତ ହେଉଛି । ଗତ ନଭେମ୍ବର ମାସରେ ଜଣେ ହାଉସସର୍ଜନ ଡାକ୍ତରଙ୍କୁ ମାଡ ହୋଇଥିଲା ଓ ସେହି ଘଟଣାରେ ଦୁଇଜଣ ଅଭିଯୁକ୍ତ ଗିରଫ ହୋଇଥିଲେ । ପ୍ରଶାସନ ସେମାନଙ୍କ ବିରୁଦ୍ଧରେ ଏନଏସଏ ରୁଜୁ କରିଥିଲା । ସୋମବାର ରାତିରେ ପୁଣି ଏକ ଅଘଟଣ ଘଟିଛି । ଜଣେ ରୋଗୀଙ୍କୁ ଦୀର୍ଘ ଅଢେଇ ଘଣ୍ଟା ପର୍ଯ୍ୟନ୍ତ ଚିକିତ୍ସା ସେବା ନମିଳିବାରୁ ଯୁବକଟିର ମୃତ୍ୟୁ ହୋଇଯାଇଥିଲା । କାର୍ଯ୍ୟରତ ଡାକ୍ତର ମଦ୍ୟପାନ କରିଥିବାରୁ ଚିକିତ୍ସା ଅବହେଳା ହୋଇଥିବା ଅଭିଯୋଗ କରି ରୋଗୀଙ୍କ ପରିଜନ ଡାକ୍ତରଙ୍କୁ ପ୍ରବଳ ମାରିଛନ୍ତି । ଡାକ୍ତର ଜଣକ ଡ.ରାଜେନ୍ଦ୍ରନାରାୟଣ ସିଂଦଳପତି ବୋଲି ଜଣାଯାଇଛି । ତେବେ ଏହି ଘଟଣା ଲୋକଲୋଚନକୁ ଆସିବା ପରେ ବିବିଏମସିଏଚ ହସପିଟାଲର ଅଧିକ୍ଷିକା ଡ.ମାନସୀ ପଣ୍ଡା ଏକ ଉଚ୍ଚସ୍ତରୀୟ ତଦନ୍ତ ନିର୍ଦ୍ଦେଶ କରିଛନ୍ତି । ବରିଷ୍ଠ ଡାକ୍ତରଙ୍କୁ ନେଇ ଏକଟିମ ଗଠନ କରି ଏହାର ତଦନ୍ତ କରିବାକୁ ନିର୍ଦ୍ଦେଶ କରିଛନ୍ତି । ଏହି ଡାକ୍ତରଟିମ ତଦନ୍ତ କରି ରିପୋର୍ଟ ଦେବାପରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଅଧିକ୍ଷିକା ଡ.ପଣ୍ଡା କହିଛନ୍ତି । 
       ମିଳିଥିବା ସୂଚନାରୁ ଜଣାଯାଇଛି ଯେ,ସୋମବାର ରାତିରେ ବଲାଙ୍ଗୀର ସହରର କନ୍ଧପାଲିପଡାର ନିତୁ ବାରିକ(୩୦)ଙ୍କ ଦେହ ଅସୁସ୍ଥ ହେବାରୁ ଭୀମଭୋଇ ମେଡିକାଲକଲେଜ ହସପିଟାଲରେ ଭର୍ତ୍ତି କରିଥିଲେ । ତାଙ୍କର କୁଆଡେ ରକ୍ତବାନ୍ତି ହେଉଥିଲା । ସେମାନେ ହସପିଟାଲରେ ଆଇସିୟୁରେ ଭର୍ତ୍ତିକରିଥିଲେ । ସେଠାରେ ତାଙ୍କର ଅବସ୍ଥା ଗୁରୁତର ହୋଇଥିଲା । ସେମାନେ ନର୍ସମାନଙ୍କ କହିବା ଅନୁଯାୟୀ ରାତି ଏମାର୍ଜେନ୍ସୀ ଡ୍ୟୁଟିରେ ଥିବା ଡାକ୍ତର ରାଜେନ୍ଦ୍ରନାରାୟଣ ସିଂଦଳପତିଙ୍କୁ ଖୋଜିଥିଲେ । କିନ୍ତୁ ଦୀର୍ଘ ଅଢେଇ ଘଣ୍ଟା ପର୍ଯ୍ୟନ୍ତ ସେ ହସପିଟାଲରେ ମିଳିନଥିଲେ । ସେ ଯେତେବେଳେ ଆସିଲେ ସେତେବେଳେ ସେ କୁଆଡେ ମଦ୍ୟପାନ କରି ଆସିଥିବାରୁ ସେ ଭଲରେ ରୋଗୀଙ୍କୁ ଦେଖିବାର ଅବସ୍ଥାରେ ନଥିଲେ । ଭଲକରି କଥା ମଧ୍ୟ କହିପାରୁନଥିଲେ । ସେହି ସମୟରେ ନିତୁ ବାରିକର ମୃତ୍ୟୁ ହୋଇଯାଇଥିଲା । ଫଳରେ ମଦ୍ୟପାନ କରୁଥିବାରୁ ଡାକ୍ତର ଶୀଘ୍ର ଆସିପାରିନଥିଲେ ଓ ଚିକିତ୍ସାରେ ଅବହେଳା କରିଥିଲେ ବୋଲି ଅଭିଯୋଗ୍ କରି ରୋଗୀଙ୍କ ପରିଜନ ଡାକ୍ତରଙ୍କୁ ପ୍ରବଳ ମାଡ ମାରିଥିଲେ । ଡାକ୍ତର ମଦ୍ୟପାନ କରିଥିବା କାରଣରୁ ଭଲରେ କଥା କରିପାରୁନଥିବା ଓ ତାଙ୍କୁ ମାଡ ମରାଯାଉଥିବାର ଭିଡିଓ ମଧ୍ୟ ଉତ୍ତୋଳନ କରି ସେମାନେ ସାମାଜିକ ଗଣମାଧ୍ୟମରେ ଭାଇରାଲ ମଧ୍ୟ କରିଥିଲେ । ହସପିଟାଲର ସୁରକ୍ଷାକର୍ମିମାନେ ବହୁକଷ୍ଟରେ ଡାକ୍ତରଙ୍କୁ ଉଦ୍ଧାର କରିଥିଲେ । ତେବେ ମଙ୍ଗଳବାର ସୁଦ୍ଧା ଡାକ୍ତର କିମ୍ବା ରୋଗୀଙ୍କ ପରିଜନ ପୋଲିସରେ କୌଣସି ଅଭିଯୋଗ କରିନଥିଲେ । ଭାଇରାଲ ହୋଇଥିବା ଭିଡିଓକୁ ନେଇ କିଛି ଗଣମାଧ୍ୟମରେ ଖବର ପ୍ରସାରଣ ପରେ ହସପିଟାଲର ଅଧିକ୍ଷିକା ଡ.ମାନସୀ ପଣ୍ଡା ଘଟଣାର ତଦନ୍ତ ନିର୍ଦ୍ଦେଶ କରିଛନ୍ତି । ଆହୁରି ସୂଚନା ମିଳିଛି ଯେ,ଏହି ଡାକ୍ତରଙ୍କ ଅବହେଳାରୁ ଜଣେ ବିଷପାନ କରିଥିବା ରୋଗୀର ମଧ୍ୟ ଜୀବନ ଚାଲିଯାଇଛି । ଦୀର୍ଘ ସମୟ ପର୍ଯ୍ୟନ୍ତ ରୋଗୀଜଣକ ଗୁରୁତର ଥିଲେ ହେଁ ଡାକ୍ତର ଆସି ଦେଖିନଥିଲେ ବୋଲି ଅଭିଯୋଗ ହୋଇଛି । ଠିକ ସେହିପରି ଡାକ୍ତରଙ୍କ ଅବହେଳାରୁ ଜଣେ ରୋଗୀକୁ ଦୀର୍ଘ ୩ଘଣ୍ଟା ପର୍ଯ୍ୟନ୍ତ ରକ୍ତ ଦିଆଯାଇ ପାରିନଥିଲା ବୋଲି ଅଭିଯୋଗ ହୋଇଛି । ବଲାଙ୍ଗୀର ଭୀମଭୋଇ ମେଡିକାଲ କଲେଜ ହସପିଟାଲ ପରିଚାଳନାରେ ବ୍ୟାପକ ତୃଟି ରହୁଥିବା     ଓ ଯୁବଡାକ୍ତରମାନେ ମ୍ୟାନେଜମେଣ୍ଟକୁ ବିଲକୁଲ ଖାତିର କରୁନଥିବା ଅଭିଯୋଗ ଉଠୁଛି । ତେଣୁ ସମସ୍ୟାର ସମାଧାନ ପାଇଁ ଏକ ଉଚ୍ଚସ୍ତରୀୟ ତଦନ୍ତର ଆବଶ୍ୟକତା ରହିଛି ବୋଲି ଜନସାଧାରଣରେ ଦାବି ହେଉଛି ।