30-Jan-2024

ବଲାଙ୍ଗୀର(ଚିତ୍ରସେନ ବେହେରା)-ମହାତ୍ମାଗାନ୍ଧୀଙ୍କୁ ହତ୍ୟା କରାଯାଇପାରେ କିନ୍ତୁ ଗାନ୍ଧୀବିଚାରକୁ ନୁହେଁ । ଗାନ୍ଧୀବିଚାର ଚିରଅମର ଓ ଏହା ଆଗାମୀ ଯୁଗ ଯୁଗ ଧରି ଜନମାନସରେ ରହିବ ବୋଲି ଆଜି ସ୍ଥାନୀୟ ଗାନ୍ଧୀଭବନଠାରେ ଆୟୋଜିତ ମହାତ୍ମାଗାନ୍ଧୀଙ୍କ ତିରୋଧାନ ଦିବସରେ ବକ୍ତାଗଣ ମତବ୍ୟକ୍ତ କରିଛନ୍ତି । ବଲାଙ୍ଗୀର ଗାନ୍ଧୀସ୍ମୃତିକମିଟି ପକ୍ଷରୁ ସାମ୍ବାଦିକ ଯୁଧିଷ୍ଠିର ମେହେରଙ୍କ ସଭାପତିତ୍ୱରେ ଅନୁଷ୍ଠିତ ସ୍ମୃତିଚାରଣ ସଭାରେ ବିଶିଷ୍ଟ ସୂଚନାଅଧିକାର କର୍ମି ହେମନ୍ତ ପଣ୍ଡା,ବରିଷ୍ଠ ନାଗରିକ ଗୋପଭୂଷଣ ନାଥ,ମନୋରଂଜନ ପୁରୋହିତ,ନରେନ୍ଦ୍ର କବାଟ,ପ୍ରେସକ୍ଲବ ସଭାପତି ଅରୁଣ ମିଶ୍ର,ତକ୍ଷକର ସଂପାଦକ ବିଶ୍ୱମୟ ପୂଜାହାରୀ,ସାମ୍ବାଦିକ ପୂର୍ଣ୍ଣଚନ୍ଦ୍ର ପଣ୍ଡା,ବୀରେନ୍ଦ୍ର ଝାଙ୍କର,ବିଭୁକଲ୍ୟାଣ ଗଡତ୍ୟା ଯୋଗଦେଇ ଗାନ୍ଧୀଙ୍କ ସ୍ମୃତିଚାରଣ କରିଥିଲେ । ହେମନ୍ତ ପଣ୍ଡା ତାଙ୍କ ବକ୍ତବ୍ୟରେ ଆଜି ଯୁଦ୍ଧଖୋର ବିଶ୍ୱରେ  ଗାନ୍ଧୀଙ୍କ ବାଣୀର ଯଥେଷ୍ଟ ପ୍ରାସଙ୍ଗିକତା ରହିଛି । ଗାନ୍ଧୀଙ୍କ ଶାନ୍ତି,ଅହିଂସା ଓ ସତ୍ୟର ମାର୍ଗହିଁ ବିଶ୍ୱକୁ ସତମାର୍ଗ ପ୍ରଦର୍ଶନ କରିବ ବୋଲି ଶ୍ରୀ ପଣ୍ଡା କହିଥିଲେ ।  ସାମ୍ବାଦିକ ପୂର୍ଣ୍ଣଚନ୍ଦ୍ର ପଣ୍ଡା ଗାନ୍ଧୀବିଚାର ଭାରତକୁ ବିଶ୍ୱଦରବାରରେ ଉତ୍କର୍ଷତା ଦେଇଛି । କିନ୍ତୁ ଆଜିର ଯୁବପିଢୀଙ୍କୁ ଭୁଲବାର୍ତ୍ତାଦେଇ ପଥଭ୍ରଷ୍ଟ କରାଯାଉଛି । ଏହାକୁ ପ୍ରତିରୋଧ କରିବାକୁ ହେଲେ ଗାନ୍ଧୀ ଓ ଗାନ୍ଧୀବିଚାରକୁ ପଢିବାକୁ ପଡିବ ବୋଲି ଆହ୍ୱାନ ଦେଇଥିଲେ । ସେହିପରି ସାମ୍ବାଦିକ ବୀରେନ୍ଦ୍ର ଝାଙ୍କର ତାଙ୍କ ବକ୍ତବ୍ୟରେ ଗାନ୍ଧୀଙ୍କ ଅହିଂସା ଆନ୍ଦୋଳନ ପୂର୍ବରୁ ଭାରତବର୍ଷରେ ହଜାର ହଜାର ବର୍ଷ ପୂର୍ବରୁ ଅହିଂସାର ପ୍ରଚାର ହୋଇଥିଲା । ବୁଦ୍ଧ,ଜୈନ ଓ ଅନ୍ୟାନ୍ୟ ମହାମନୀଷି ଏହାର ପ୍ରଚାର କରିଥିଲେ । ତେବେ ଗାନ୍ଧୀବାଦରେ ଅସୁୟାତ୍ୟାଗ କରି ପରସ୍ପର ମଧ୍ୟରେ ସହନଶୀଳ ହେଲେ ଶାନ୍ତିପ୍ରତିଷ୍ଠା ହୋଇପାରିବ ବୋଲି କହିଥିଲେ । ଶେଷରେ ସାମ୍ବାଦିକ ବିଭୁକଲ୍ୟାଣ ଗଡତ୍ୟା ଧନ୍ୟବାଦ ଅର୍ପଣ କରିଥିଲେ । ଏହି କାର୍ଯ୍ୟକ୍ରମରେ ପ୍ରଶାନ୍ତ ମହାକୁର,ଗାନ୍ଧୀଭବନର ପାଠକମଞ୍ଚର ଶତାଧିକ ଛାତ୍ରଛାତ୍ରୀ ଉପସ୍ଥିତ ରହି ସହଯୋଗ କରିଥିଲେ । 
ପୁଣି ବିବାଦରେ ବିବିଏମସିଏଚ ହସପିଟାଲ..