09-Jan-2024

ବଲାଙ୍ଗୀର, - ଜମୁଛି ନାଟ୍ୟପ୍ରେମୀ ଓ କଳାକାରଙ୍କ ଭିଡ । ବଲାଙ୍ଗୀରର ଅଗ୍ରଣୀ ସାଂସ୍କୃତିକ ଅନୁଷ୍ଠାନ ଭୂମିକା ଓ ମଠଖାଇ ମହୋତ୍ସବ ପାଳନ କମିଟି ପକ୍ଷରୁ ସ୍ଥାନୀୟ କୋଶଳ କଳାମଣ୍ଡଳ ପଡିଆ ଠାରେ ଆୟୋଜିତ ପଞ୍ଚଦଶତମ ସର୍ବଭାରତୀୟ ମଠଖାଇ ମହୋତ୍ସବର ଆଜି ହେଉଛି ତୃତୀୟ ସଂଧ୍ୟା । ଭୂମିକା ପରିବାରରର ବ୍ୟାସଦେବ ନନ୍ଦଙ୍କ ସଭାପତିତ୍ୱରେ ଅନୁଷ୍ଠିତ ଏହି ସଭାର  ଆଜିର ସଂଧ୍ୟାରେ ମୁଖ୍ୟ ଅତିଥି ଭାବରେ ମଧୁସୂଦନ ଆଇନ ବିଶ୍ୱବିଦ୍ୟାଳୟର ଭାଇସ୍ ଚାନ୍‌ସେଲର ପ୍ରଫେସର ଡ. କମଲଜିତ ସିଂହ ଯୋଗ ଦେଇ ଆଜିର ଆଧୁନିକ ଯୁଗରେ ନାଟକ ପରମ୍ପରାକୁ ବଂଚାଇବା ଦିଗରେ ଭୂମିକା ଅନୁଷ୍ଠାନର ଅବଦାନକୁ ଭୂୟସୀ ପ୍ରଶଂସା କରିଥିଲେ । ବରେଣ୍ୟ ଅତିଥି ଭାବରେ  ବଲାଙ୍ଗୀର ଡିଏଫ୍‌ଓ ନିତିଶ କୁମାର  ମଂଚାସୀନ ରହି ନିଜର ବକ୍ତବ୍ୟ ପ୍ରଦାନ କରିଥିଲେ ।

ସଭା ପ୍ରାରମ୍ଭରେ କବି ତଥା ଯୁବ କଳାକାର ଅର୍ଜୁନ ସାହୁ ଅତିଥି ପରିଚୟ ପ୍ରଦାନ କରିଥିଲେ । ଏହି ଅବସରରେ ନାଟ୍ୟକାର ତଥା ଭଲିବଲ ଖେଳାଳି ଅନୁପ ସାହୁଙ୍କୁ ମଠଖାଇ ମହୋତ୍ସବ କମିଟି ପକ୍ଷରୁ ମାନପତ୍ର ଓ ଉପାୟନ ଦେଇ ମଠଖାଇ ସମ୍ମାନରେ ସମ୍ମାନିତ  କରାଯାଇଥିଲା । ମହୋତ୍ସବ କମିଟିର ଅଧ୍ୟକ୍ଷ ତଥା ବିଧାୟକ  ନରସିଂହ ମିଶ୍ର ନିଜ ଅଭିଭାଷଣରେ ସମସ୍ତେ ନାଟକକୁ ଉପଭୋଗ କଲେ  ନାଟ୍ୟ ପରମ୍ପରା ସମୃଦ୍ଧ ହେବ ବୋଲି କହିଥିଲେ । ଶେଷରେ ଅଭିନେତା ତଥା କବି ବିଜୟ ତ୍ରିପାଠୀ  ଧନ୍ୟବାଦ ଅର୍ପଣ କରିଥିଲେ । ଦିନବେଳା ସ୍ଥାନୀୟ ବଲାଙ୍ଗୀର କଲେଜ ରେ ଭୂମିକା ପକ୍ଷରୁ ‘ଆମେ କାଏଁ ଯେ ନାଟ୍ କର୍‌ମା’  ଶୀର୍ଷକ ବିଷୟ ଉପରେ ଉକ  ଆଲୋଚନାଚକ୍ର

ଅନୁଷ୍ଠିତ ହୋଇଥିଲା । ସ୍ୱର୍ଗତ ହରିହର ମିଶ୍ରଙ୍କ ନାମରେ ଆଜିର ମଂଚକୁ ସମର୍ପଣ କରାଯାଇଥିଲା । ପରେପରେ ନାଟ୍ୟକାର ଅଶୋକ କୁମାର ବହିଦାରଙ୍କ ଲିଖିତ  କୋସଲୀ ନାଟକ ‘ତୋର୍ ପାର୍ କେ ମୋର ପାହାର୍‌’ ମଂଚସ୍ଥ ହୋଇଥିଲା । ମୟୁରଭଂଜର ଛଉ ନୃତ୍ୟ ଓ ବରପାଲିର ଘୁଡ୍‌କା ନୃତ୍ୟ କୁ ଦର୍ଶକ ମାନେ ଉପଭୋଗ କରିଥିଲେ ।  ୫ ଦିନ ଧରି ଅନୁଷ୍ଠିତ ହେବାକୁ ଥିବା  ଏହି ନାଟ୍ୟ ମହୋତ୍ସବରେ ଶତାଧିକ ନାଟ୍ୟପ୍ରେମୀ, ଭୂମିକା ପରିବାରର ସଦସ୍ୟ  ଓ କାଳକାର ମାନଙ୍କ ସମାଗମ ହୋଇଥିଲା ।