07-Dec-2023

ତୁଷୁରା (ପଞ୍ଚାନନ ନାଏକ) : ବଲାଙ୍ଗୀର ଜିଲ୍ଲାର ସଇଁତଳା ବୋର୍ଡର ଠାରୁ ନୂଆଁପଡା ଭାୟା ସମରା ଲୁର୍କୀ ରୋଡ ପ୍ରଧାନମନ୍ତ୍ରୀ ଗ୍ରାମ୍ଯ ସଡକ ଯୋଜନାରେ ନିର୍ମିତ ରାସ୍ତା ଏବେ ପାଲଟିଛି ମରଣଯନ୍ତା । ବାରମ୍ବାର ଅଭିଯୋଗ ସତ୍ତ୍ବେ ହେଉନି ମରାମତି । ଖୁବ ଶୀଘ୍ର ଏହି ରାସ୍ତାର ମରାମତି କରାଯିବବୋଲି ଦାୟିତ୍ଵରେ ଥିବା ବିଭଗୀୟ ଯନ୍ତ୍ରୀ କହୁଥିବା ବେଳେ ଏଯାଏଁ

ରାସ୍ତାର ମରାମତି କାର୍ଯ୍ୟ ହେଉନଥିବାରୁ ଜନଅସନ୍ତୋଷ  ବୃଦ୍ଧି ପାଇବାରେ ଲାଗିଛି । ଲାଗିଥିବା ଫଳକ ଅନୁଯାଇ  ପ୍ରଧାନମନ୍ତ୍ରୀ ଗ୍ରାମ୍ଯ ସଡକ  ଯୋଜନାରେ ନିର୍ମିତ ଏହି ରାସ୍ତାର ଲମ୍ବା ୪.୮୦୦ କିଲୋମିଟର ହୋଇ ଥିବା ବେଳେ ୩କୋଟି ୨୧ଲକ୍ଷ ୯୩ ହଜାର ୭୬୫ଟଙ୍କା ଅଟକଳ ରହିଛି। କାର୍ଯ୍ୟ ଆରମ୍ଭ ତା୫-୭-୨୦୨୨ରିଖ ଓ କାର୍ଯ୍ୟ କାର୍ଯ୍ୟ ଶେଷ ତା୪-୬-୨୦୨୩ରିଖ ରହିଛି। ଠିକାଦାର ଟିଟିଲାଗଡର ଅତୁଲ କୁମାର ଜୈନ ନାମ ରହିଥିବା ବେଳେ ରାସ୍ତାର ଗ୍ୟାରେଣ୍ଟି ୫ବର୍ଷ ରହିଥିବା ସୂଚନା ଫଳକରେ ଉଲ୍ଲେଖ ରହିଛି। କିନ୍ତୁ ଏହି ରାସ୍ତାର ମରାମତି ଓ ରକ୍ଷଣା ବେକ୍ଷଣ ଅଭାବ ଯୋଗୁଁ ରାସ୍ତାର ଅବସ୍ଥା ଅତି ଶୋଚନୀୟ ହୋଇ ପଡିଛି । ରାସ୍ତା ସାରା ବଡବଡ ଖାଲଖମା ସାଙ୍ଗକୁ ରାସ୍ତା ଉପରେ ପାଣି ଜମି ରହୁଥ‌ିବାରୁ ଅଧିକାଂଶ ସମୟରେ ଦୁର୍ଘଟଣାମାନ ଘଟୁଛି। ଏଠି ରାସ୍ତାରେ ଖାଲ ନୁହେଁ
ବରଂ ଖାଲ ଭିତରେ ରାସ୍ତା ବୋଲି ଲୋକେ କହୁଛନ୍ତି । ଏପରିକି ରାସ୍ତାର ଦୁଇ ପାର୍ଶ୍ବରେ ବଡବଡ ଗର୍ତ୍ତ ହୋଇଥିବାରୁ ଏହି ରାସ୍ତା ଦେଇ ଯିବା ଆସିବା କଷ୍ଟକର ହୋଇ ପଡୁଛି । 

ଏହି ରାସ୍ତା ଉପରେ କପସିଲା, ଲୁର୍କୀ, ଟାଣ୍ଟିଗାଁ, ନୂଆଁପଡା,  କନ୍ଦାମୁଣ୍ଡା, ଖାରିବାହାଲ, ଆମ୍ବପାଳି,  ଘୁନସର,  କୁକେଡମାଳ ଆଦି ଗ୍ରାମର ଜନସାଧାରଣ ଏହି ରାସ୍ତା ଉପରେ ନିର୍ଭର କରିଥାନ୍ତି । ତେବେ ଏହି ରାସ୍ତାର ଅବସ୍ଥା ଶୋଚନୀୟ ଯୋଗୁଁ ପିଲା ଠାରୁ ବୟସ୍କ ପର୍ଯ୍ୟନ୍ତ ସମସ୍ତେ ଅସୁବିଧାର ସମ୍ମୁଖୀନ ହେଉଛନ୍ତି । ଏଥି ସହ ବିଭିନ୍ନ କାମରେ ଟିଟିଲାଗଡ ନିର୍ବାଚନ ମଣ୍ଡଳୀ କିମ୍ବା ବଲାଙ୍ଗୀର ଜିଲ୍ଲାପାଳ କାର୍ଯ୍ୟାଳୟକୁ ଯିବାକୁ ଏହି ରାସ୍ତା ଉପରେ ଅନେକ ଲୋକ ନିର୍ଭର କରିଥାନ୍ତି । ପ୍ରତିଦିନ ଏହି ରାସ୍ତାରେ ଦୁଇ ଚକିଆ ଠାରୁ ଆରମ୍ଭ କରି କାର, ବସ, ଟ୍ରକ, ଟ୍ରାକ୍ଟର ମଧ୍ୟ ଯାତୟାତ କରୁଛି । କିନ୍ତୁ ରାସ୍ତାର ପ୍ରାୟ ସ୍ଥାନରେ ଖାଲଖମା ଯୋଗୁଁ ଗାଡି ଚାଳକମାନେ ଅସୁବିଧାର ସମ୍ମୁଖୀନ ହେଉଥିବା ବେଳେ ଯାତ୍ରୀମାନେ ମଧ୍ୟ ଅସନ୍ତୋଷ ଜାହିର କରୁଛନ୍ତି ।  ଏଥିପ୍ରତି ଉଚ୍ଚ ବିଭାଗୀୟ ଅଧିକାରୀ ଦୃଷ୍ଟି ଦେଇ ତୁରନ୍ତ ରାସ୍ତା ମରାମତି କରିବାକୁ ପଦକ୍ଷେପ ନେବାକୁ ସାଧାରଣରେ ଦାବି ହେଉଛି l