22-Nov-2023

ସମ୍ବଲପୁର:-ତା.୨୨.୧୧.୨୩ ସମ୍ବଲପୁର ଜିଲ୍ଲାପାଳ କାର୍ଯ୍ଯାଳୟର ଅବସରପ୍ରାପ୍ତ ବରିଷ୍ଠ କିରାଣୀ ଫକିର ଚରଣ ପଣ୍ଡାଙ୍କ ୭୨ ବର୍ଷ ବୟସରେ ପରଲୋକ ଘଟିଛି। କିଛିଦିନ ହେଲା ସେ ଏକ ଦୂରାରୋଗ୍ଯ ରୋଗରେ ପିଡ଼ିତ ଥିଲେ। ସେଜଣେ ଅତ୍ଯନ୍ତ ଧର୍ମପରାୟଣ, ବନ୍ଧୁବତ୍ସଳ, ପରୋପକାରୀ, ଆମାୟିକ ବ୍ଯକ୍ତି ଥିଲେ। ଗତକାଲି ରାତ୍ର ୧୦ ଟା ୪୫ ମିନିଟ ସମୟରେ ସମ୍ବଲପୁର ମିଲିପଡ଼ାସ୍ଥିତ ଭଡ଼ାଘରେ ତାଙ୍କର ପରଲୋକ ଘଟିଛି। ତାଙ୍କ ବିୟୋଗରେ ପରିଚିତ ମହଲରେ ଶୋକର ଛାୟା ଖେଳିଯାଇଠି। ତାଙ୍କର ମୃତ୍ଯୁ ଶଯ୍ଯା ନିକଟରେ ତାଙ୍କର ଧର୍ମପତ୍ନୀ ଅର୍ଣ୍ଣପୂର୍ଣ୍ଣା ପଣ୍ଡା, ଏକମାତ୍ର ପୁତ୍ର ଦେବାଶିଷ ପଣ୍ଡା, ପୁତ୍ରବଧୂ ଲିଜା, ତିନିକନ୍ଯା ମିତା, ସ୍ବେତା, ଲିନା ତଥା ତିନି ଜାମାତାଙ୍କ ସହିତ ନାତିନାତୁଣୀମାନେ ଉପସ୍ଥିତ ଥିଲେ। ସ୍ଥାନୀୟ ରାଜଘାଟରେ ଆଜି ପୂର୍ବାହ୍ନରେ ତାଙ୍କର ଶେଷକୃତ୍ୟ ସମ୍ପନ୍ନ ହୋଇଛି। ପୁତ୍ର ଦେବାଶିଷ ମୁଖାଗ୍ନି ଦେଇଥିଲେ। ସୁବର୍ଣ୍ଣପୁର ଜିଲା ବୀରମହାରାଜପୁର ଉପଖଣ୍ଡ ଗୁଡ଼ିପାଲିର ମୂଳ ବାସିନ୍ଦା ସ୍ବର୍ଗତ ପଣ୍ଡା ସମ୍ବଲପୁର ଜିଲାପାଳ କାର୍ଯ୍ୟାଳୟରେ ତାଙ୍କର ଚାକିରୀ ଜୀବନ ଆରମ୍ଭ କରି ଝାରସୁଗଡ଼ା ଓ ଲଖନପୁର ତହସିଲ କାର୍ଯ୍ୟାଳୟ, ବ୍ରଜରାଜ ନଗର ଓ ଝାରସୁଗୁଡ଼ା ସିଡିପିଓ କାର୍ଯ୍ଯାଳୟରେ ନିଷ୍ଠାର ସହିତ କାର୍ଯ୍ଯ କରି ୨୦୦୯ ମସିହାରେ ଅବସର ଗ୍ରହଣ କରିଥିଲେ। ଦଶ ଦିନତଳେ ତାଙ୍କର ଜ୍ଯେଷ୍ଠଭଗିନୀ ବେଟିଖାଇଙ୍କ ପରଲୋକ ଘଟିଥିଲା। ସୂଚନାଯୋଗ୍ଯ ଯେ ସ୍ବର୍ଗତ ପଣ୍ଡା ସାମ୍ବାଦିକ ପ୍ରମୋଦ ବହିଦାରଙ୍କ ଶଶୁର ଅଟନ୍ତି।