22-Nov-2023

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ):  ଗତକାଲି ପାଟଣାଗଡ ପୁଲିସ୍ ଦ୍ବାରା  ଲାଠୋରର ମହିଳା ସର୍ଦ୍ଦାର ତୁଳସୀ ରଣା ଓ ତାଙ୍କର ସମ୍ପର୍କୀୟ ସହଯୋଗୀ କପସିପାଲିର ସଞ୍ଜୟ ରଣା ଓ ଅଷ୍ଟମ ରଣାଙ୍କୁ ଝୁଲେନବର ଗ୍ରାମର ଜଣେ ଯୁବକଙ୍କୁ ଅପହରଣ କରିନେଇ ଲାଠୋରର ଘରେ ଅଟକ ରଖିବା ଅଭିଯୋଗରେ ଗିରଫ କରାଯାଇ କୋର୍ଟ ଚାଲାଣ କରାଯାଇଛି । କାରଣ ସ୍ବରୂପ ଅଭିଯୁକ୍ତ ପକ୍ଷରୁ କୁହାଯାଉଛି ଯେ, ଉକ୍ତ ଯୁବକ ବେଲାରସେନ ରଣା ଅଭିଯୁକ୍ତମାନଙ୍କର ଜାତିସମ୍ପର୍କୀୟ ହୋଇଥିଲେ ହେଁ, ସେକେଣ୍ଡ୍ ସର୍ଦ୍ଦାର ପାଲଟି ଶ୍ରମିକ ଯୋଗାଡ ନିମନ୍ତେ ମଧ୍ୟସ୍ଥି ସାଜି ୬ ଲକ୍ଷ ଟଙ୍କା ଅଗ୍ରୀମ ନେଇ ଅଧବାଟରୁ ଶ୍ରମିକମାନଙ୍କୁ ଫେରାଇଦେଇ ଠକେଇ କରିଥିବାରୁ ତାକୁ ସେମାନେ ଗାଁ'ରୁ ଉଠାଇ ନେଇ ଅଟକ ରଖିଥିଲେ । ଏ ସମ୍ପର୍କରେ ବେଲାରର ସମ୍ପର୍କୀୟ ସୁରେନ୍ଦ୍ର ରଣା ପାଟଣାଗଡ ଥାନାରେ ଏକ ଅପହରଣ ଅଭିଯୋଗ କରିଥିଲେ । ଶେଷରେ ଜାମିନ୍ ନାମଞ୍ଜୁର ହେବାରୁ ଅଭିଯୁକ୍ତମାନଙ୍କୁ ଜେଲ୍ ହାଜତକୁ ପଠାଇ ଦିଆଯାଇଛି । ଉକ୍ତ ମହିଳା ସର୍ଦ୍ଦାର ତୁଳସୀ ରଣା ଉକ୍ତ ଶ୍ରମିକମାନଙ୍କୁ ରାଜ୍ୟ ବାହାରକୁ ଚାଲାଣର ଯୋଜନା କରୁଥିଲେ ।

ଉଲ୍ଲେଖନୀୟ ଯେ, ସଂପ୍ରତି ଦାଦନଚାଲାଣ ଋତୁରେ ଜିଲ୍ଲାରୁ ବାହାରକୁ ଦାଦନଚାଲାଣର ସୁଅ ଛୁଟୁଛି । ଶ୍ରମବିଭାଗ , ପ୍ରଶାସନ ଓ ପୁଲିସ୍ ର ସମ୍ପୂର୍ଣ୍ଣ ଜାଣତରେ ଏହା ରାତିଦିନ ଚାଲିଛି । ହରିଶଙ୍କର ରୋଡ ବନାମ ଲାଠୋର ରେଳ ଷ୍ଟେସନରେ ପୂର୍ବବର୍ଷ ପରି ଚଳିତବର୍ଷ ଦାଦନଶ୍ରମିକଙ୍କୁ ସର୍ବାଧିକ ଚାଲାଣ କରାଯାଉଛି । ଏହି ରେଳ ଷ୍ଟେସନ ଓ ଲାଠୋର ଥାନା ପଛରେ ସର୍ଦ୍ଦାରମାନେ ବସତି ସ୍ଥାପନ କରି ରହିଛନ୍ତି ।  ଲେଡି ଡନ୍ କୁହାଯାଉଥିବା ଏହି ମହିଳା ସର୍ଦ୍ଦାର , ତାଙ୍କ ଦିଅର ଓ ଅନ୍ୟକେତକ ସର୍ଦ୍ଦାରଙ୍କର ସହିତ ଲାଠୋର ପୁଲିସ୍ ର ସୁସମ୍ପର୍କ ରହିଆସିଛି । ନିୟମିତ ମୋଟାଅଙ୍କର ବଟିନେଇ ଉପରିସ୍ଥ ଅଧିକାରୀଙ୍କୁ ତୁଷ୍ଟକରି ପୁଲିସ୍ ଏକପ୍ରକାର ଏହି ଦାଦନଚାଲାଣର ସହଯୋଗୀ ପାଲଟିଯାଇଥିବା ସମସ୍ତେ ଜାଣନ୍ତି ।  ଦୀର୍ଘବର୍ଷ ଧରି ସର୍ଦ୍ଦାରସ୍ବାମୀ ରଘୁର ପ୍ରଚୁର ମଦ୍ୟପାନ କରି ପଡିରହିବା କାରଣରୁ କିଛିବର୍ଷତଳୁ ତାର ପତ୍ନୀ ଉକ୍ତ ଯୁବତୀ ତୁଳସୀ ରଣା ସାଙ୍ଗରେ ସହଯୋଗୀ  ଅସାମାଜିକ ଓ ଗୁଣ୍ଡାପ୍ରବୃତ୍ତିର ଯୁବକମାନଙ୍କୁ ରଖି ଏହି ବେପାର ସମ୍ଭାଳି ନେଇଥିଲା । ସେ ରାତିରେ ତୁରେକେଲା , କଣ୍ଟାବାଞ୍ଜି ଓ ଅନ୍ୟାନ୍ୟ ସ୍ଥାନକୁ ଦଳବଳ ଧରି ଗାଡିରେ ବୁଲି ନିଜେ ଓ ସେକେଣ୍ଡ୍ ସର୍ଦ୍ଦାରଙ୍କ ଜରିଆରେ ବର୍ଷ ବର୍ଷ ଧରି ଅଗ୍ରୀମ ଦେଇ ଶ୍ରମିକସଂଗ୍ରହ କରି ରାଜ୍ୟ ବାହାରକୁ ବେଆଇନ ଶ୍ରମିକଚାଲାଣରେ ଜଡିତ ରହିଆସିଛି । ପାଠଶାଠ ପଢିଥିବାରୁ ସେ ମଧ୍ୟ ଘରପାଖର ହରିଶଙ୍କର ରୋଡ ରେଳ ଷ୍ଟେସନରେ ବିଭାଗୀୟ  ବୁକିଂ କାଉଣ୍ଟରରେ ଟିକେଟ୍ କାଟିଥାଏ । ତା' ସମେତ ଥାନାପଛପଟର ଏହିସମସ୍ତ ଦାଦନସର୍ଦ୍ଦାରଙ୍କ ଘରକୁ ରାଜ୍ୟ ବାହାରର ତେଲୁଗୁ ତାମିଲ୍ ସେଠ୍ ମାନେ ଗାଡିରେ ଆସି କୋଟି କୋଟି ଟଙ୍କା ଅଗ୍ରୀମ ବାଣ୍ଟିବାକୁ ଦେଇଯାଇଥା'ନ୍ତି ।  ମଝିରେ ମଝିରେ କାହା କାହା ସହିତ ଏହି ମହିଳାସର୍ଦ୍ଦାର  କିଛିନପାଇଁ କୁଆଡେ ପଳାଇଯାଉଥିବା ପଡୋଶୀଦିଅର ସର୍ଦ୍ଦାରଠାରୁ ପ୍ରକାଶ । ପୂର୍ବରୁ ତା'ର ସ୍ବାମୀ ମଧ୍ୟ ଜଙ୍ଗଲରୁ କାଠଚୋରି ଓ ଅନ୍ୟାନ୍ୟ ମାମଲାରେ ଏକାଧିକବାର ଜେଲ୍ ଯାଇଥିବା ଶୁଣିବାକୁ ମିଳିଛି । ଏଣୁ ଏଭଳି ବେଆଇନ ଦାଦନଚାଲାଣ ଓ ଆପରାଧିକ କାଣ୍ଡକାର୍ଖାନା କରି ଜମି କୋଠାବାଡି ଓ ସମ୍ପତ୍ତି ଠୁଳ କରିଥିବା ଏହି ମହିଳାସର୍ଦ୍ଦାର ସଂଗଠିତ ଭାବେ ପୁଣି ଏଭଳି ଅପରାଧ ଘଟାଇବାର ଆଶଙ୍କାକୁ ଏଡାଇ ଦିଆଯାଇ ନପାରେ ବୋଲି ଚର୍ଚ୍ଚା ହେଉଛି ।