05-Nov-2023

କଣ୍ଟାମାଳ(ଜୟ କୁମାର ମହାରଣାଙ୍କ ରିପୋର୍ଟ ): ହର୍ଷଉଲ୍ଲାସ ଓ ଉତ୍ସାହ ଉଦ୍ଦୀପନା ସହ ବାଜା,ରୋଷଣୀ, ନାଚଗୀତ ମଧ୍ୟରେ ମେଲାଣି ନେଲେ ପଲସାଗୋରା ମା ଗଜଲକ୍ଷ୍ମୀ l କୁମାରପୂର୍ଣ୍ଣିମା ଠାରୁ ଗତ ୭ ଦିନ ଧରି ପଲସାଗୋରା ସ୍ୱସ୍ତିକ କ୍ଲବ ଦ୍ୱାରା ମକରପଡ଼ିଆ ଠାରେ ଚାଲିଥିବା ୨୫ତମ ରୌପ୍ୟ ଜୟନ୍ତୀ ଗଜଲକ୍ଷ୍ମୀ ପୂଜା ବିପୁଳ ଉତ୍ସାହ ଉଦ୍ଦୀପନା ଓ ଜନସମାଗମ ମଧ୍ୟରେ ସମ୍ପନ୍ନ ହୋଇଛି l ଚଳିତ ବର୍ଷ ରୌପ୍ୟ ଜୟନ୍ତୀ ଅବସରରେ ଅଷ୍ଟଲକ୍ଷ୍ମୀ ପୂଜା ସହ ମୁରାସୁର ଦରବାର, ମୀନାବଜାର ର ଆୟୋଜନ କରାଯାଇଥିଲା l ପ୍ରତିଦିନ ସନ୍ଧ୍ୟାରେ ମା ଗଜଲକ୍ଷ୍ମୀଙ୍କ ଦର୍ଶନ ସହ ମୀନାବଜାରରେ ବୁଲି ବୁଲି ଚଟପଟି ଖାଦ୍ୟ ଖାଇବା, ଦୋଳିରେ ବସିବା ସହ ବିଭିନ୍ନ ପ୍ରକାର ମନୋହରି ଜିନିଷ କିଣିବାର ମଜା ଉଠାଇଥଲେ l ପରେ ହଜାର ହଜାର ଦର୍ଶକ ବିଳମ୍ବିତ ରାତି ପର୍ଯ୍ୟନ୍ତ ମୁରାସୁର ଦରବାରରେ ନୃତ୍ୟଗୀତ ସହ ବିଶ୍ୱ ପ୍ରସିଦ୍ଧ ବରଗଡ଼ ଧନୁଯାତ୍ରା ର କଂସ ଭୂମିକାରେ ଅଭିନୟ କରିଥିବା ହୃଷିକେଶ ଭୋଇଙ୍କ ନିଖୁଣ ଅଭିନୟକୁ ମନଭରି ଉପଭୋଗ କରୁଥିବା ଦେଖିବାକୁ ମିଳୁଥିଲା l ପ୍ରତିଦିନ ସଂନ୍ଧ୍ୟାରେ ସମଗ୍ର ମକରପଡ଼ିଆ ଲୋକାରଣ୍ୟ ହେବା ସହ ଉତ୍ସବମୁଖର ହୋଇଥିଲା l ସ୍ୱସ୍ତିକ କ୍ଲବର ସମସ୍ତ ସଦସ୍ୟ ଉତ୍ସବର ସଫଳତାରେ ଖୁସି ବ୍ୟକ୍ତକରି ପରସ୍ପର କୁ ରଙ୍ଗ ଅବିର ଲଗାଇ ବାଜା ରୋଷଣୀ ନୃତ୍ୟ ଗୀତ ସହ ମା ଗଜଲକ୍ଷ୍ମୀଙ୍କୁ ଶୋଭାଯାତ୍ରାରେ ନେଇ ନିକଟସ୍ଥ କାନ୍ଦୁଲମୁଣ୍ଡା ବନ୍ଧରେ ବିସର୍ଜନ କରିଥିଲେ l