05-Nov-2023

କଣ୍ଟାମାଳ( ପ୍ରେରଣା ଖବର ): କଣ୍ଟାମାଳ ବ୍ଲକ ନାରାୟଣପ୍ରସାଦ ପଞ୍ଚାୟତ ପଣ୍ଡରାପିଟା ଓ ଲୁଣ୍ଡୁରୁବାହାଲ ୱାର୍ଡବାସୀଙ୍କୁ ନେଇ ଗୌନ୍ତିଆ ଶ୍ରୀବତ୍ସ ଭୋଇଙ୍କ ସଭାପତିତ୍ବରେ ଏକ ବୈଠକ ଅନୁଷ୍ଠିତ ହୋଇଥିଲା l ସଭାରେ ପୂର୍ବତନ ୱାର୍ଡ ସଭ୍ୟ ଭୀମସେନ ବିଶ୍ୱାଳ, ବଳରାମ ରଣା ଏବଂ ପୂର୍ବତନ ନାଏବ ସରପଞ୍ଚ ଜମ୍ବେଶ୍ୱର ରଣା, ଲୁଣ୍ଡୁରୁବାହାଲ ଗୌନ୍ତିଆ ଚିନ୍ମୟ ଭୋଇ ପ୍ରମୁଖ ଯୋଗଦେଇ ଆଲୋଚନା କରିଥିଲେ l ଘଣ୍ଟାପଡା ପଞ୍ଚାୟତର କୁନାଶିଲା ଛକରୁ ନାରାୟଣପ୍ରସାଦ ପଞ୍ଚାୟତର ପଣ୍ଡରାପିଟା ଦେଇ ଲୁଣ୍ଡୁରୁବାହାଲ ଠାରୁ ରିଙ୍ଗାପଡା ପର୍ଯ୍ୟନ୍ତ ରାସ୍ତା ଦୟନୀୟ ହୋଇପଡିଛି l

ମେଟାଲିଂ ପରିବର୍ତ୍ତେ କାଁଭାଁ ମୁରୁମ କାମ ହେଉଛି ଫଳରେ ରାସ୍ତାର ଅବସ୍ଥା ଗୋଦଣ୍ଡା ସଦୃଶ ଦିଶୁଛି l ଝାରବାହାଲି ନାଳରେ ପୋଲ ନିର୍ମାଣ ହେଇପାରୁନି l ଫଳରେ ବର୍ଷା ଚାରିମାସ ରାସନ, ଭର୍ତ୍ତା କିମ୍ବା ଅନ୍ୟାନ୍ୟ କାର୍ଯ୍ୟରେ ପଞ୍ଚାୟତ କାର୍ଯ୍ୟାଳୟକୁ ଯିବା ଆସିବା କରିହେଉ ନାହିଁ l ଛାତ୍ରଛାତ୍ରୀଙ୍କ ପାଠପଢା ମଧ୍ୟ ବ୍ୟାଘାତ ହେଉଛି l ଏକଦା ଗ୍ରାମର କିଛି ଲୋକ ପାଣି ଭିତରେ ପଶିବା ଯୋଗୁଁ ନାଳରେ ଭାସି ଯାଇଥିଲେ l ବହୁ କଷ୍ଟରେ ତାଙ୍କୁ ଉଦ୍ଧାର କରାଯାଇଥିଲା l ରାସ୍ତା ସମସ୍ୟା ଯୋଗୁଁ ଗ୍ରାମକୁ ଆମ୍ବୁଲାନ୍ସ ଆସିପାରେ ନାହିଁ, କେହି ରୋଗୀ ଗୁରୁତର ହେଲେ କୁନାଶିଲା ଛକ ପର୍ଯ୍ୟନ୍ତ ଖଟିଆରେ ବୋହିବାକୁ ପଡିଥାଏ ବୋଲି ଆଲୋଚନା କରିଥିଲେ l ଦୀର୍ଘବର୍ଷ ହେବ ଅଞ୍ଚଳର ସମସ୍ୟା ବିଷୟରେ ଜନ ପ୍ରତିନିଧି ଠୁ ଆରମ୍ଭ କରି ପ୍ରଶାସନକୁ ଅବଗତ କରାଯାଇ ଥିଲେ ହେଁ କେହି ଗୁରୁତ୍ୱ ଦେଉ ନାହାନ୍ତି ବୋଲି କ୍ଷୋଭ ପ୍ରକାଶ କରିଥିଲେ l ଅଞ୍ଚଳର ସମସ୍ୟାକୁ ନେଇ ବୌଦ୍ଧ ଜିଲାପାଳକୁ ଏକ ଦାବିପତ୍ର ପ୍ରଦାନ କରାଯିବ ବୋଲି ୱାର୍ଡ ବାସିନ୍ଦା ଦରଖାସ୍ତ କରିଥିଲେ l ବିଧାନସଭା ନିର୍ବାଚନ ପୂର୍ବରୁ ରାସ୍ତା ଓ ପୋଲ ନିର୍ମାଣ କରାନଗଲେ ଦୁଇ ୱାର୍ଡବାସୀ ଭୋଟ ବର୍ଜନ କରିବେ ବୋଲି ଚେତାବନୀ ଦେବାସହ କଳସ ସ୍ଥାପନ କରି ଶପଥ କରିଥିବା ଜଣାପଡିଛି l