10-Oct-2023

ବିନିକା(ହିମାଂଶୁ ଶେଖର ପୁଟେଲ) ଭୀମଭୋଇ ତାଙ୍କ ବାଣୀରେ କହିଥିଲେ "ମୋ ଜୀବନ ପଛେ ନର୍କେ ପଡ଼ିଥାଉ ଜଗତ ଉଦ୍ଧାର ହେଉ" ଶୀର୍ଷକ କବିତାକୁ ପାଥେୟ କରି ଆସୁଥିବା ବାବା ଅଯୋଧ୍ୟା ଦାଶଙ୍କ(୬୫) ଆଜି ଅଚାନକ ପରଲୋକ ଘଟିଥିଲା।ଖବର ପ୍ରଚାରିତ ହେବା ମାତ୍ରେ ଆଖପାଖ ସମେତ ଅଞ୍ଚଳର ବିଭିନ୍ନ ସ୍ଥାନରୁ ବନ୍ଧୁବାନ୍ଧବ, ଶୁଭେଛୁ ଆସି ତାଙ୍କର ଶେଷ ଦର୍ଶନ କରିବାର ସୁଯୋଗ ପାଇଥିଲେ।ସୂଚନା ଯୋଗ୍ୟ ଯେ ବିନିକା ବ୍ଲକ ଫୁଲମୁଠୀ ଗ୍ରାମର ସ୍ବର୍ଗତ ଶ୍ରୀଦାଶ ଅବିବାହିତ ଜୀବନ ନିର୍ବାହ କରି ଆସୁଥିଲେ ।ସେ ଅଞ୍ଚଳର ସାମୁହିକ,ବ୍ୟକ୍ତିଗତ ସମସ୍ୟା ନେଇ ବିଭିନ୍ନ ଅଭିଯୋଗ ପତ୍ର ଲେଖି ସମସ୍ତଙ୍କର ପ୍ରିୟ ହୋଇଥିଲେ ।ନୀତି ପ୍ରତିଦିନ ଭୋର ସକାଳୁ ଶୟନ କକ୍ଷରୁ ଉଠି ନିତ୍ୟକର୍ମ ସାରିବା ସହ ଆଧ୍ୟାତ୍ମିକ ମାର୍ଗ ଉପରେ ଗୁରୁତ୍ତ୍ଵ ଦେଉଥିଲେ ।ଲୋକଙ୍କ ବିଭିନ୍ନ ସମସ୍ୟା ସମାଧାନ କରିବାରେ ପ୍ରମୁଖ ଭୂମିକା ନିଭାଇ ଆସୁଥିଲେ ।ଆଜି ଭୋର ସକାଳୁ ନଉଠିବାରୁ ପରିବାର ଲୋକେ ତାଙ୍କ ଶୟନ କକ୍ଷକୁ ଯାଇ ଦେଖିବା ପରେ ସେହି ସମୟରେ ହିଁ ସେ ଶେଷ ନିଃଶ୍ୱାସ ତ୍ୟାଗ କରି ସାରିଥିଲେ ।ମୃତ୍ୟୁ ଶଯ୍ୟା ନିକଟରେ ତାଙ୍କର  ସମସ୍ତ ଭାଇ,ଭାଇ ବୋହୁ,ଭଉଣୀ,ପୁତୁରା ଉପସ୍ଥିତ ଥିଲେ। ଅମର ରହେ ଧ୍ଵନୀ ସହ ବାଜା ବଜାଇ ତାଙ୍କ ମର ଶରୀରକୁ ଏକ ବିରାଟ ଶୋଭାଯାତ୍ରାରେ ଗ୍ରାମ ପରିକ୍ରମା  ପରେ ପୁଣ୍ୟପୀଠ ପାପକ୍ଷୟ ଶ୍ଵସାନକୁ ନିଆଯାଇଥିଲା ସେଠାରେ ତାଙ୍କର ପୁତୁରା ଆଶିଷ ଦାଶ ମୁଖାଗ୍ନୀ ପ୍ରଦାନ କରିଥିଲେ।ଅନ୍ୟପକ୍ଷରେ  ବିନିକା ମୁହୁରୀ ସଂଘ ପକ୍ଷରୁ ଆୟୋଜିତ ଶୋକ ସଭାରେ ସମସ୍ତ କର୍ମକର୍ତ୍ତା ଯୋଗଦେଇ ଶ୍ରୀ ଦାଶଙ୍କ ଅମର ଆତ୍ମାର ସଦଗତି ପାଇଁ ନୀରବ ପ୍ରାର୍ଥନା କରିଥିଲେ ।