11-Aug-2023

ବଲାଙ୍ଗୀର(ପ୍ରେରଣା ଖବର)-ବଲାଙ୍ଗୀର ଜିଲ୍ଲା ପୁଇଁତଳା ଥାନା ଅନ୍ତର୍ଗତ ଖମାରମୁଣ୍ଡାରେ ଥିବା ବାଲାଜୀ ଯୁକ୍ତ ଦୁଇ ସାଇନ୍ସ କଲେଜରେ ଜଣେ ଦଳିତଛାତ୍ରକୁ ସେହି କଲେଜର ଜଣେ ଅଧ୍ୟାପକ ପ୍ରବଳ ମାଡ ମାରିଥିବା ଥାନାରେ ଅଭିଯୋଗ ହୋଇଛି । ଏନେଇ ଅଭିଯୋଗ ପାଇଲା ପରେ ପୁଇଁତଳା ଥାନା ପୋଲିସ ଅଭିଯୁକ୍ତ ଅଧ୍ୟାପକକୁ ଆଣି ଅଟକ ରଖି ଘଟଣାର ତଦନ୍ତ କରୁଥିବା ଜଣାଯାଇଛି । 
    ଅଭିଯୋଗରୁ ଜଣାଯାଇଛି ଯେ, ଦେଓଗାଁ ଅଞ୍ଚଳର ମଧୁସୁଦନ ବାରିକଙ୍କ ପୁଅ ସାହିଲ ବାରିକ ଖମାରମୁଣ୍ଡାର ବାଲାଜୀ କଲେଜରେ ଯୁକ୍ତ ଦୁଇ ବିଜ୍ଞାନର ପ୍ରଥମ ବର୍ଷର ଛାତ୍ର ଭାବରେ ହଷ୍ଟେଲରେ ରହି ପାଠପଢୁଛନ୍ତି । ଗତକାଲି ମେଘା ମାଡାମ ନାମକ ଜଣେ ଅଧ୍ୟାପିକା କଲେଜରେ କ୍ଲାସ କରୁଥିବା ବେଳେ କେହିଜଣେ ପଛରୁ କମେଣ୍ଟ ମାରିଥିଲେ । ଏହାକୁ ନେଇ ଅଧ୍ୟାପିକା ଜଣକ କିଛି ଛାତ୍ରଙ୍କୁ ଛିଡା କରାଇ ମାଡ ମାରିଥିଲେ । କିନ୍ତୁ ସାହିଲ ମୁଁ କମେଣ୍ଟ କରିନାହିଁ ମାଡ ମରାଯାଉଛି କାହିଁକି ବୋଲି ପ୍ରତିବାଦ କରିଥିଲା । ଏହି ଘଟଣାରେ ଉତ୍ତେଜିତ ହୋଇ ସେହି କଲେଜର ରସାୟନ ବିଭାଗର ଅଧ୍ୟାପକ ସଚିନ କ୍ଷେତୀ ସାହିଲଙ୍କୁ ମୁହଁରେ ପ୍ରବଳ ମାଡ ମାରିଥିଲେ । ଏପରିକି ଛାତ୍ରର ଜାତିକୁ ନେଇ ଆକ୍ଷେପ କରିଥିଲେ ବୋଲି ଅଭିଯୋଗ ହୋଇଛି । ସେହି ମାଡରେ ସାହିଲର ଆଖିଉପର ପତା ପଚା ପଡିଯାଇଥିବା ବେଳେ ମୁହଁ ମଧ୍ୟ ଫୁଲିଯାଇଛି । ଛାତ୍ରଜଣକ ଏ ବିଷୟରେ ତାଙ୍କ ବାପାଙ୍କୁ କହିବା ପରେ ସେ କଲେଜରେ ପହଞ୍ଚି ତାଙ୍କ ପୁଅକୁ ଧରି ପୁଇଁତଳା ଥାନାରେ ଏତଲା ଦେଇଥିଲେ । ଏତଲାକୁ ଭିତ୍ତିକରି ପୁଇଁତଳା ଥାନାରେ ଏକ ଏସସିଏସଟି ନିର୍ଯ୍ୟାତନା ଆଇନରେ ମାମଲା ରୁଜୁ ହୋଇ ତଦନ୍ତ ଆରମ୍ଭ ହୋଇଛି । ପୋଲିସ ଅଭିଯୁକ୍ତ ଅଧ୍ୟାପକଙ୍କୁ ଗିରଫ କରିଥିବା ବେଳେ ଅଧ୍ୟାପିକାଙ୍କ ସମ୍ପୃକ୍ତି ନେଇ ତଦନ୍ତ କରୁଛି । ଏହି ଘଟଣାପରେ ଦଳିତ ସମାଜ ପକ୍ଷରୁ ତୀବ୍ର ଉତ୍ତେଜନା ପ୍ରକାଶ ପାଇଛି । ଦଳିତନେତା ତଥା ଆଇନିଜୀବୀ ଦୀନେଶ ନାଗ, ତ୍ରୀଲୋଚନ ନନ୍ଦ ଓ ଅନ୍ୟକିଛି ଲୋକ ପହଞ୍ଚି ପୁଇଁତଳା ପୋଲିସ ତୁରନ୍ତ ପଦକ୍ଷେପ ନେବାକୁ ଦାବି କରିଛନ୍ତି । ସେପଟେ ଏହି ଘଟଣାକୁ ନେଇ କଲେଜର ମାଲିକ କୈଳାସ ଅଗ୍ରୱାଲଙ୍କୁ ଫୋନରେ ଯୋଗାଯୋଗ କରିବାରୁ ଗତକାଲି ସେଭଳି କିଛି ଅପ୍ରୀତିକର ଘଟଣା ହୋଇଛି । ତେବେ ଛାତ୍ରଜଣକ କଲେଜରେ ବାରମ୍ବାର ଉତ୍ପାତ କରୁଥିବା ଓ ଅଧ୍ୟାପିକା ଜଣକ କ୍ଲାସ କରୁଥିବା ବେଳେ ଛାତ୍ରଜଣକ କମେଣ୍ଟ କରିଥିବା ବିଷୟକୁ ନେଇ ଅଧ୍ୟାପକ ସଚିନ କ୍ଷେତି ଚଟକଣାଟିଏ ମାରି ତାଗିଦ କରିଥିବା କହିଥିଲେ ।