10-Aug-2023

ବଲାଙ୍ଗୀର,-ବଲାଙ୍ଗୀର ଜିଲ୍ଲାରେ ନକଲି ସାର୍ଟିଫିକେଟ ମାମଲାକୁ ନେଇ ପୁଣି ସରଗରମ ଆଲୋଚନା ହୋଇଛି । ଜିଲ୍ଲାର ଶିକ୍ଷାବିଭାଗରେ କାମକରୁଥିବା ୪ଜଣ ଶିକ୍ଷକ/ଶିକ୍ଷୟୀତ୍ରୀଙ୍କ ସାର୍ଟିଫିକେଟ ନକଲି ବୋଲି ରାଜ୍ୟଯାଞ୍ଚ କମିଟିରୁ ରିପୋର୍ଟ ଆସିବାପରେ ସେମାନଙ୍କ ନାମରେ ଥାନାରେ ଏତଲା ଦିଆଯାଇଛି । ବଲାଙ୍ଗୀର ଡିଇଓ ଧୃବଚରଣ ବେହେରା ବଲାଙ୍ଗୀର ଟାଉନଥାନାରେ ରଣ୍ଡା ହାଇସ୍କୁଲର ହିନ୍ଦୀଶିକ୍ଷୟିତ୍ରୀ ମନ୍ମୟୀ ପଣ୍ଡା,ବଙ୍ଗୋମୁଣ୍ଡା,ସୁଲେକେଲା ଓ ଗଣ୍ଡପତ୍ରାପାଲି ସ୍କୁଲର ଶିକ୍ଷକଙ୍କ ନାମରେ ଏତଲା ଦେଇଛନ୍ତି । ବୁଧବାର ଦିନ ଆଦର୍ଶଥାନା ପୋଲିସ ରଣ୍ଡାର ହିନ୍ଦିଶିକ୍ଷୟିତ୍ରୀ ମନ୍ମୟୀ ପଣ୍ଡାଙ୍କୁ ଗିରଫ କରି ଅଅଜି କୋର୍ଟ ଚାଲାଣ କରୁଛି । ଶ୍ରୀମତୀ ପଣ୍ଡା ଗତ ୨୦୧୧-୧୨ ମସିହାରେ ଚୁକ୍ତିଭିତ୍ତିକ ହିନ୍ଦିଶିକ୍ଷକ ଭାବରେ ନିଯୁକ୍ତି ପାଇ ପୁଇଁତଳା ବ୍ଲକର ରଣ୍ଡା ହାଇସ୍କୁଲରେ ଚାକିରି କରୁଥିଲେ । ତାଙ୍କ ଶିକ୍ଷାଗତ ଯୋଗ୍ୟତା ସାର୍ଟିଫିକେଟ ଯାଞ୍ଚ ବେଳେ ସେ ୧୯୯୯ ମସିହାରେ ସେପଟେମ୍ବର ମାସରେ ମାଟ୍ରିକ ସପ୍ଲିମେଣ୍ଟାରୀରେ ପାସ କରିଥିଲେ । କିନ୍ତୁ ସେ ୨୦୦୨ରେ ଯୁକ୍ତଦୁଇରେ ପାସ କରିବା ବଦଳରେ ୨୦୦୧ର ଏକ ସାର୍ଟିଫିକେଟ ଦାଖଲ କରିଥିଲେ । ସେହିପରି ସେ ସେହି ୨୦୦୧ ମସିହାରେ କଟକସ୍ଥିତ ସରକାରୀ ହିନ୍ଦି ପ୍ରଶିକ୍ଷଣ କେନ୍ଦ୍ରରୁ ପାଠପଢି ସାର୍ଟିଫିକେଟ ପାଇଥିବା ଦର୍ଶାଇଛନ୍ତି । ଫଳରେ ଏବେ ଶିକ୍ଷାବିଭାଗର ସାର୍ଟିଫିକେଟ ଯାଞ୍ଚବେଳେ ତାଙ୍କର ସାର୍ଟିଫିକେଟକୁ ନେଇ  ସନ୍ଦେହ ଜାତ ହୋଇଥିଲା ଓ ତାହା ଯାଞ୍ଚ ପାଇଁ ରାଜ୍ୟସ୍ତରକୁ ପଠାଯାଇଥିଲା । ସେହି ଯାଞ୍ଚ ବେଳେ କେବଳ ମାଟ୍ରିିକ ସାର୍ଟିଫିକେଟ ଠିକ ଥିବା ବେଳେ ବାକି ସବୁ ସାର୍ଟିଫିକେଟ ନକଲି ବୋଲି ଜଣାପଡିଥିଲା । ସେପଟୁ ବଲାଙ୍ଗୀର ଡିଇଓଙ୍କ ଏହି ରିପୋର୍ଟ ଆସିବା ପରେ ଗତକାଲି ପୋଲିସରେ ଏତଲା ଦିଆଯାଇଥିଲା । ଶେଷରେ ନକଲି ସାର୍ଟିଫିକେଟଧାରୀ ଶିକ୍ଷୟିତ୍ରୀଙ୍କୁ ଗିରଫ କରାଯାଇଛି । ସେପଟେ ଅନ୍ୟ ତିନିଜଣ ଅଭିଯୁକ୍ତ ଫେରାର ରହିଛନ୍ତି ଓ ପୋଲିସ ତାଙ୍କୁ ଖୋଜୁଥିବା ଜଣାପଡିଛି ।    
     ପ୍ରକାଶ୍ୟ ଯେ,ବଲାଙ୍ଗୀର ଶିକ୍ଷାବିଭାଗରେ ହିନ୍ଦିଶିକ୍ଷକ ନିଯୁକ୍ତିରେ ବ୍ୟାପକ ଅନୀୟମିତତା ହୋଇଥିଲା । ସେତେବେଳେ ଗଣମାଧ୍ୟମରେ ଅନେକଥର ଖବର ପ୍ରକାଶ ପରେ ମଧ୍ୟତ ତତକାଳିନ ଡିଇଓ ସିଂ ବାବୁ ନକଲି ଶିକ୍ଷକଙ୍କୁ ସୁରକ୍ଷା ଦେଉଥିଲେ । ତଥାପି ଭୟରେ ୮ଜଣ ନକଲି ସାର୍ଟିଫିକେଟଧାରୀ ଚାକିରିଛାଡି ଦେଇଥିଲେ । ତଥାପି ଆଜି ପର୍ଯ୍ୟନ୍ତ ପ୍ରାୟ ୩୧୪ ଜଣ ନକଲି ସାର୍ଟିଫିକେଟଧାରୀ ଜିଲ୍ଲାରେ ଚାକିରି କରୁଥିବା ଅଭିଯୋଗ ରହିଛି । ଗତ କିଛିମାସ ତଳେ ରାଜ୍ୟର ନକଲି ସାର୍ଟିଫିକେଟର ଚେର ଥିବା ଜଣାପଡିଥିଲା । ନକଲି ବିଇଡି,ନକଲି ଏମବିଏ ଓ ଗ୍ରାଜୁଏସନ ସାର୍ଟିଫିକେଟ ଦେଇ ପୋଷ୍ଟାଲ,ଶିକ୍ଷାବିଭାଗ ଓ ସମବାୟ ବିଭାଗରେ ଚାକିରି କରୁଥିବା ଜଣାପଡିଥିଲା । ବଲାଙ୍ଗୀର ଟାଉନଥାନା ପୋଲିସ ଏହି ଘଟଣାରେ ମୁଖ୍ୟଅଭିଯୁକ୍ତ ମନୋଜ ମିଶ୍ର ଓ ଆଲୋକ ଉଦଗାତାଙ୍କ ସମେତ ୧୯ଜଣଙ୍କୁ ଗିରଫ କରି କୋର୍ଟ ଚାଲାଣ କରିଥିଲା । କିନ୍ତୁ ଘଟଣାରେ ୪ଦିନ ପରେ ରାଜ୍ୟସରକାର ଏହାର ତଦନ୍ତ ଦାୟୀତ୍ୱ କ୍ରାଇମବ୍ରାଞ୍ଚକୁ ଦେଇଥିଲା । କ୍ରାଇମବ୍ରାଞ୍ଚର ଏକ ୫ଜଣିଆ ଟିମ ଆସି ଅନେକ କିଛି ଖୋଲତାଡ କରିଥିଲେ । କିନ୍ତୁ ଏପର୍ଯ୍ୟନ୍ତ ସେମାନେ ଆଉ କାହାକୁ ଗିରଫ କରିପାରିନାହାଁନ୍ତି । ଫଳରେ କ୍ରାଇମବ୍ରାଞ୍ଚର ସ୍ୱଚ୍ଛତା ନେଇ ମଧ୍ୟ ପ୍ରଶ୍ନବାଚୀ ସୃଷ୍ଟି ହୋଇଛି । ରାଜ୍ୟସରକାର ତୁରନ୍ତ ଏଦିଗରେ ପଦକ୍ଷେପ ନିଅନ୍ତୁ ବୋଲି ଜନସାଧାରଣରେ ଦାବି ହେଉଛି ।