10-Aug-2023

ବଲାଙ୍ଗିର:  ବଲାଙ୍ଗିର ପୌରାଞ୍ଚଳ ଅନ୍ତର୍ଗତ ୱାର୍ଡ ନଂ. ୧୩ ରେ ଜାତୀୟ ସହରାଞ୍ଚଳ ଜୀବିକା ମିଶନ ଯୋଜନାରେ ବାସହୀନଙ୍କ ପାଇଁ ନିର୍ମିତ ଆଶ୍ରୟସ୍ଥଳୀ ଏବେ ଜରାଜୀର୍ଣ୍ଣ ଅବସ୍ଥାରେ ବ୍ୟବହାର ଯୋଗ୍ୟ ନ ହୋଇ ପଡି ରହିଛି। ଯେଉଁଥି ପାଇଁ ବଲାଙ୍ଗିର ସହରର ନିରାଶ୍ରୟଙ୍କ ଆବଶ୍ୟକ ସ୍ଥଳେ ତାହା ବ୍ୟବହାରରେ ଆସି ପାରୁ ନାହିଁ। ତେଣୁକରି ଅନେକ ଗରିବ ଖଟିଖିଆ ଅସୁବିଧାର ସମ୍ମୁଖୀନ ହେଉଥିବା ପରିଲକ୍ଷିତ ହେଉଛି।
ଆଶ୍ରୟସ୍ଥଳୀର କୋଠରୀ ଗୁଡିକ ଅପରିଷ୍କାର ହୋଇ ପଡି ରହିଥିବା ବେଳେ ଝରକା କବାଟ ଗୁଡିକ ଭଙ୍ଗାରୁଜା ଅବସ୍ଥାରେ ରହିଛି। ଶୋଇବା ପାଇଁ ବ୍ୟବହୃତ ହେଉଥିବା ଗଦି, ତକିଆ, ବେଡସିଟ ଆଦି ଚିରା ଫଟା ଅବସ୍ଥାରେ ଏଣେତେଣେ ପଡି ରହିଛି। ଆଶ୍ରୟସ୍ଥଳୀରେ ପୁରୁଷ ମହିଳାଙ୍କ ବ୍ୟବହାର ନିମନ୍ତେ ଭିନ୍ନ ଭିନ୍ନ ଭାବରେ ଥିବା ଶୌଚାଳୟ ଗୁଡିକ ଅପରିଷ୍କାର ହୋଇ ରହିଛି। ଜଳ ଯୋଗାଣ ବିଛିନ୍ନ ହୋଇଯାଇ ଥିବାରୁ ଆଶ୍ରୟସ୍ଥଳୀର କୌଣସି ନଳରେ ପାଣି ଆସୁ ନାହିଁ।
ମଣିଷ ମାନଙ୍କ ଆଶ୍ରୟ ପାଇଁ ନିର୍ମିତ ଆଶ୍ରୟସ୍ଥଳୀର ବାରଣ୍ଡାରେ ଗାଈଗୋରୁ, କୁକୁର ମାନେ ଆଶ୍ରୟ ନେଉଛନ୍ତି। ଆଶ୍ରୟସ୍ଥଳୀର ରକ୍ଷଣାବେକ୍ଷଣ ଓ ପରିଚାଳନା ଦାୟିତ୍ବ ବର୍ତ୍ତମାନ କାହାର ଅଧୀନରେ ନ ଥିବା ହେତୁ ଏଠାକାର ଛାତ ଉପରେ ନିଶାଡିଙ୍କ ଆଡ୍ଡା ସବୁବେଳେ ଜମି ରହୁଛି। ଆଶ୍ରୟସ୍ଥଳୀରୁ ବାହାରିବା ମାତ୍ରେ ମୁଖ୍ୟ ରାସ୍ତା କଡରେ ବିପଦ ସଙ୍କୁଳ ଅବସ୍ଥାରେ ଗୋଟିଏ ମୁକୁଳା ଟ୍ରାନ୍ସଫର୍ମର ରହିଛି। ଯଦ୍ୱାରା ଏହାର ସଂସ୍ପର୍ଶରେ ଆସି କେତେବେଳେ କାହାର ମୃତ୍ୟୁବରଣ ଘଟିଯିବ କିଛି କୁହାଯାଇ ପାରିବ ନାହିଁ। ବିଦ୍ୟୁତ ବିଭାଗ ସହ ପୌର ପରିଷଦ ପରାମର୍ଶ କରି ଟ୍ରାନ୍ସଫର୍ମର ଚାରିପଟେ ବାଡ ଦେବା ବ୍ୟବସ୍ଥା କରିବାର ଆବଶ୍ୟକତା ରହିଛି।
ପୌରାଞ୍ଚଳ ନିରାଶ୍ରୟଙ୍କ ପାଇଁ ନିର୍ମିତ ଏହି ଆଶ୍ରୟସ୍ଥଳୀରେ ବର୍ତ୍ତମାନ ଅସହାୟ ଅବସ୍ଥାରେ ଦୁଇଜଣ ମହିଳା ବିଗତ ବର୍ଷେ ଧରି ଆଶ୍ରୟ ନେଉଛନ୍ତି। ସେଥିମଧ୍ୟରୁ ଜଣେ ମହିଳା ସୁବର୍ଣ୍ଣପୁର ଜିଲ୍ଲା ତରଭା ଅଞ୍ଚଳର ହୋଇଥିବା ବେଳେ ଅନ୍ୟ ମହିଳା ଜଣକ ପାଟଣାଗଡ ଅଞ୍ଚଳର ରହିଛନ୍ତି। ସେହି ମହିଳା ଦ୍ୱୟଙ୍କୁ ଅନ୍ୟତ୍ର ଉପଯୁକ୍ତ ଥଇଥାନ କରିବାର ଆବଶ୍ୟକତା ରହିଛି।
ଏହି ଆଶ୍ରୟସ୍ଥଳୀର ରକ୍ଷଣାବେକ୍ଷଣ ଓ ପରିଚାଳନା ଦାୟିତ୍ୱ ଯେହେତୁ ଏପର୍ଯ୍ୟନ୍ତ କାହାକୁ ହସ୍ତାନ୍ତର କରାଯାଇ ନାହିଁ, ଫଳରେ ଅନେକ ନିରାଶ୍ରୟ ଆଶ୍ରୟ ଟିକିଏ ନେବା ପାଇଁ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ଯଥାଶୀଘ୍ର ଉକ୍ତ ଆଶ୍ରୟସ୍ଥଳୀର ଆବଶ୍ୟକୀୟ ମରାମତି କରାଯାଇ ଏହାର ପରିଚାଳନା ଦାୟିତ୍ବ ବିଭାଗୀୟ ବ୍ୟବସ୍ଥା ଅନୁଯାୟୀ ଯେକୌଣସି ସଂସ୍ଥାକୁ ହସ୍ତାନ୍ତର କରାଯାଇ ସହରାଞ୍ଚଳର ଅନେକ ନିରାଶ୍ରୟଙ୍କ ପାଇଁ ଏହା ଆଶ୍ରୟ ଉପଯୋଗୀ କରିବା ନିମନ୍ତେ ଦାବି ଜଣାଇ ବଲାଙ୍ଗିର ସ୍ବେଚ୍ଛାସେବୀ ସଂଗଠନର ଗୋବିନ୍ଦ ଚନ୍ଦ୍ର ଶତପଥୀ, ସନ୍ତୋଷ ପଟ୍ଟନାୟକ, ଏମ୍. ଡି. ବବଲୁ, ଅଜୟ ନାଗ, ଦେବରାଜ ନାଗ, ବିରେନ୍ଦ୍ର ପାଣ୍ଡେ, ପ୍ରଦୀପ ଜୁଏଡ, ସୁମିତ ମିଶ୍ର, ଶ୍ଵେତା ସାହୁ, ଅନିତା ମିଶ୍ର, ଚିନ୍ମୟୀ ବୀର ପ୍ରମୁଖ ନିର୍ବାହୀ ଅଧିକାରୀ ଓ ପୋୖରାଧ୍ୟକ୍ଷାଙ୍କୁ ସାକ୍ଷାତ କରିଥିଲେ। ମିଳିଥିବା ପ୍ରତିଶ୍ରୁତି ମୁତାବକ ଆଗାମୀ ୧୫ ଦିନ ମଧ୍ୟରେ ଆଶ୍ରୟସ୍ଥଳୀର ଆବଶ୍ୟକୀୟ ସମ୍ପୂର୍ଣ୍ଣ ମରାମତି କରାଯାଇ ସ୍ଥାନୀୟ ଏକ ସ୍ୱୟଂ ସହାୟକ ଗୋଷ୍ଠୀକୁ ଏହାର ରକ୍ଷଣାବେକ୍ଷଣ ଓ ପରିଚାଳନା ଦାୟିତ୍ବ ହସ୍ତାନ୍ତର କରାଯାଇ ଆଶ୍ରୟ ଉପଯୋଗୀ କରିବାର ବ୍ୟବସ୍ଥା କରାଯିବ।