27-Jun-2023

ବଙ୍ଗୋମୁଣ୍ଡା (ଅନୀଲ କୁମାର ତ୍ରିପାଠୀ ): ବଲାଙ୍ଗୀର ଜିଲ୍ଲା ବଙ୍ଗୋମୁଣ୍ଡା ବ୍ଲକ ସିନ୍ଧେକେଲା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ବଲାଙ୍ଗୀର, କଳାହାଣ୍ଡି ଓ ନୁଆପଡା ଜିଲ୍ଲାର ସୀମାରେ ରହିଛି। ଏହି ଡାକ୍ତରଖାନା ଉପରେ ଆଖପାଖରେ ଥିବା ତିନୋଟି ଜିଲ୍ଲାର ଲୋକେ ସ୍ବାସ୍ଥ୍ୟ ସେବା ପାଇଁ ନିର୍ଭର କରିଥାନ୍ତି। ଉଦାହରଣ ସ୍ୱରୂପ ସ୍ତ୍ରୀ ଓ ପ୍ରସୂତୀ ବିଶେଷଜ୍ଞ ବଦଳି ହେବା ଆଗରୁ ଗୋଟିଏ ବର୍ଷରେ ପ୍ରାୟ ୧୦୦୮ ଡେଲିଭରି ହୋଇଥିଲା ତାହା ବି ଡାକ୍ତରଖାନାରେ ବିଶେଷ ସୁବିଧା ନ ଥିବା ସତ୍ତ୍ବେ । ବର୍ତ୍ତମାନ ମଧ୍ଯ ଡାକ୍ତର ଅଭାବ ସତ୍ତ୍ବେ ପ୍ରତିଦିନ ପ୍ରାୟ ୧୨୦ ରୁ ୧୫୦ ବିଭିନ୍ନ ପ୍ରକାର ରୋଗୀ ଡାକ୍ତରଖାନାକୁ ଆସୁଛନ୍ତି। ଏଭଲି ଏକ ଗୁରୁତ୍ୱପୂର୍ଣ୍ଣ ସ୍ବାସ୍ଥ୍ୟକେନ୍ଦ୍ର ରେ ଏବେ ଡାକ୍ତର ଅଭାବ ଦେଖାଦେଇଛି। ଜିଲ୍ଲା ସ୍ବାସ୍ଥ୍ୟବିଭାଗ କାର୍ଯ୍ୟାଳୟ ପକ୍ଷରୁ ତିନିଦିନ ତଳେ ୨୧ ତାରିଖ ଦିନ ପତ୍ରସଂଖ୍ୟା ୨୯୦୦ ଅନୁସାରେ ଜିଲ୍ଲାକୁ ୪୧ ଜଣ ନୁଆ ଡାକ୍ତର ଆସିଥିବା ବେଳେ ସିନ୍ଧେକେଲା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର କୁ ଦୁଇ ଜଣ ଡାକ୍ତର ଙ୍କ ପୋଷ୍ଟିଂ ହୋଇଛି। ଦୁଇ ଜଣଙ୍କ ମଧ୍ଯରୁ ଜଣେ ଡାକ୍ତର ଧନଞ୍ଜୟ ପଣ୍ଡା ପିଜି ଷ୍ଟଡି ପାଇଁ କଟକ ଯିବେ ଓ ଆଉ ଜଣେ ଡାକ୍ତର ପ୍ରବିଣ କୁମାର ବେହେରା ସିନ୍ଧେକେଲା ସିଏଚସି ରେ ନିୟମିତ ଡାକ୍ତର ଭାବେ ନିଯୁକ୍ତି ପାଇଛନ୍ତି। ପ୍ରକାଶ ଯୋଗ୍ଯ ସିନ୍ଧେକେଲା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ନିୟମ ଅନୁଯାଇ ୯ ଜଣ ଡାକ୍ତର ରହିବା କଥା ହେଲେ ତାହା ପୁରଣ କରିବା ପରିବର୍ତ୍ତେ ଉକ୍ତ ଡାକ୍ତରଖାନାରେ ଥିବା ସ୍ତ୍ରୀ ଓ ପ୍ରସୂତୀ ବିଶେଷଜ୍ଞ ଡାକ୍ତର ଙ୍କୁ ଏକ ମାସ ତଳେ କଳାହାଣ୍ଡି ବଦଳି କରି ଦେବା ସହ ଆଉ ଜଣେ ଏମବିବିଏସ ଡାକ୍ତର ଙ୍କୁ ଖୋଲାନ ସିଏଚସି ବଦଳି କରି ତା ବଦଳରେ ଦୁଇଜଣ ଡାକ୍ତର ତ ଦିଆଗଲା ହେଲେ ତାଙ୍କ ମଧ୍ଯରୁ ଜଣେ ପିଜି ଷ୍ଟଡି ପାଇଁ କଟକ ଗଲେ ଓ ଜଣେ ନିୟମିତ ଡାକ୍ତର ଭାବେ ଯୋଗ ଦେଇଛନ୍ତି। ଏବେ ଏହି ଡାକ୍ତରଖାନା ରେ ମାତ୍ର ଦୁଇ ଜଣ ନିୟମିତ ଏମବିବିଏସ ଡାକ୍ତର ଓ ତିନିଜଣ କଣ୍ଟ୍ରାକ୍ଚୁଆଲ ଏମବିବିଏସ ଡାକ୍ତରଙ୍କୁ ନେଇ ସ୍ବାସ୍ଥ୍ୟସେବା ଚାଳିଛି। ତେବେ ଏହାକୁନେଇ ସୋସିଆଲ ମିଡିଆରେ ଓ ସିନ୍ଧେକେଲା ଅଞ୍ଚଳରେ ଜନ ଅସନ୍ତୋଷ ବଢିବାରେ ଲାଗିଛି। ତେଣୁ ବିଶେଷଜ୍ଞ ଡାକ୍ତର ପଦବୀ ପୂରଣ ପାଇଁ ଅଞ୍ଚଳବାସୀ ଦାବୀ କରିଛନ୍ତି।